دهستهیا ڤهكۆلینێ و كۆمكرنا بهلگهنامهیان:بهلگهیێن مه تێرا هندێ ههنه جینۆسایدا ئێزدیان بێته ناساندن
باسنيوز:
سهرۆكێ دهستهیا ڤهكۆلینێ و كۆمكرنا بهلگهنامهیێن جینوسایدێ دیاركر، پتر ژ 1300 كهسان سكالا ل سهر تیرۆرستێن داعش تۆماركرنە و 28 مهزارگههێن ئاینێ یێن هاتێنه دیكومێنتكرن دگهل ههژمارهكا زۆر یا بهلگهنامه و دیدهڤان و قوربانیێن كارهساتا شنگال و دهشتا مووسلێ ههتا نوكه ڤی كهیسی ئهنجامێن زۆر باش ئێناینه.
دادوهر ئهیمهن مستهفا سهرۆكێ دهستهیا ڤهكۆلینی و كۆمكرنا بهلگهنامهیێن جینوسایدێ ل دهۆكێ بۆ (باسنیوز) راگههاند، د ڤهكۆلینێن مه دا ئاشكرابوویه مهرهما تیرۆریستان ئهو بوویه ئێزدیان ژناڤ ببهن، نوكه ڤهكۆلین دهێته كرن ل دویڤ دا دێ دویڤچوون ل سهر كارهساتا شنگال دهست پێ كهت، ل دویڤ ههمی ستانداردێن جیهانی كارهساتا شنگال جینوسایده و ل دویڤ ئهنجامێن ڤهكۆلینێن هاتینه كرن ههتا نوكه گهلهك تشت ئاشكرا بووینه تیرۆرستێن داعش ڤیاینه ئولا ئێزدیان ژناڤ ببهن.
دادوهر ئهیمهن مستهفا گۆت “هژمارهكا زۆر یا قوربانیان یێن هاتینه دیتن و گهلهك جۆرێن بهلگهنامهیان یێن هاتینه كۆمكرن وهكو مادی و جنائی و دیكۆمێنتان، زێدهباری فوتو و ڤیدیو و ئاخڤتن یێن قوربانی و دیدهڤانان و ههموو جۆرێن بهلگهنامه و دیكومێنتان یێن هاتێنه كۆمكرن و تێرا هندێ دكهن بریارا جینوسایدێ ل سهر بهێته دان”.
سهرۆكێ دهستهیا ڤهكۆلینی و كۆمكرنا بهلگهنامهیان بۆ جینوسایدێ ل دهۆكێ ئاشكرا كر كو ههتا نوكه لیژنێن نهتهوهیێن ئێكگرتی یا سهلماندی ئهوا ل شنگال هاتیه كرن جینوسایده، ههتا نوكه ئهم یێن گههشتینه ئهنجامێن زۆر باش، لێ ئهم نهشێین بریارا جینوسایدێ بدهین، ئهڤه دێ مینیت بۆ دادگههێن نێڤدهولهتی، چونكو ب تنێ ئهم بهلگهنامه و ڤهكۆلینێ بۆ جینوسایدێ دكهین.
خۆیا ژی كر حكومهتا ههرێما كوردستانێ دێ كهیسا جینوسایدێ رهوانهی دادگهها نێڤدهولهتی كهت، ئهم نهشێین چارهنڤیسێ گونههباری دهستنیشان بكهین، بۆ نموونه ههكه ئهم گونههباری دهستهسهر بكهن و دانپێدانێ بكهت ئهم سزا بدهین، ئهڤه مه كهیسا جینوسایدێ گرتن و چو دهلیڤه بۆ دادگهها نێڤدهولهتی نامینیت.
گۆتیشی ” 80% دیكومێنت و بهلگهنامه كهسێن سكالا تۆماركرین كوردێن ئێزدینه و 20% بهلگهنامه و دكیومێنت و كهسێن سكالا تۆماركرین مهسیحی و شهبهك و توركمان و كاكائیی”.
تُتاح هذه الصورة أيضا في: کوردی