پتریا رێكخراوێن ل شنگال كاردكن گەنجێن دەڤەرێ نادەنە كاری
تۆرا لالش یا راگەهاندنێ/رائد غانم
گەنجێن ئێزدی یێن خودان باوەرنامە ل شنگال و ناوچەداریا سنوونێ دئاكنجی ئاماژێ ب وێ چەندێ ددەن كو پتریا كەسێن ل رێكخراوێن ل شنگال كار دكن دئێنە وەرگرتن نەخەلكێ دەڤەرێ نە ل شوونا وان هاتینە وەرگرتن.
(خدر بەرەكات) دەرچۆیێ بەشێ ژمێریاری یە ل سەنتەرێ باژێرێ شنگالێ ئاكنجی دبێژت:زانیاریێن خۆ بۆ گەلەك رێكخراوا و جیێن حكومی پێشكێشكرینە،بەلێ هەتا نهۆ كەس ل مە نەپرسیە و مالێن مە هاتینە وێرانكرن و مە هەموویان پێتڤی ب كاری هەیە و ئەو كەسێن ل رێكخراوان ل شنگال دئێنە وەرگرتن نە خەلكێ دەڤەرێ نە سەرەرای كو ب سەدان دەرچۆیێن كولیژ و پەیمانگەها ل ناڤ مەدا هەنە ژ پشكێن جودا جودا،ئەم هیڤیدارن پووتە پتر ب گەنجێن دەڤەرێ بێتە دان و ل رێكخراو و جیێن حكومی بێنە وەرگرتن داكو ئەم بكارن هاریكاریا خێزان و خزمەتا خەلكێ خۆ بكن و پاشەرۆژەكا گەش بۆ شنگالێ مسۆگەر بكن و ب چەسپینن كو گەنجێن مە هێز و شیان هەنە دهەموو بواران دا كاربكن.
هەروەسا(ناجی حەجی)دەرچۆیێ پشكا كارگێری كارە ل ناوچەداری سنوونێ دژیت ئاشكەراكر، ئەو دەرچۆیێن ل رێكخراو و جیێن حكومی ل شنگال وەك گرێبەست كار دكن پتریا وان نە خەلكێ دەڤەرێ نە ،ئەم دخوازن ل شونا وان گەنجێن مە بێنە وەرگرتن داكو بكارن ئیدارەیەكا وەسا دروست كن دەڤەرا خۆ ب رێڤەببەن،لێ ئەوێن واستە نەبن نائێنە وەرگرتن و پتریا ئەوێن دگەل رێكخراوا كاردكن باوەرنامەیێن كێمتر ژ وان باوەرنامەیێن مە هەین هەنە بەلێ مە وەرناگرن،دیسان ئەوێن دئێنە وەرگرتن ژی ب كوژمەكی كێم یێ دراڤی كاردكن گەلەك ژ وان وەك كرێكارن نەك وەك خودان باوەرنامە سەرەدەریێ دگەل دا دكن ئەو ناچارن بڤی شێوەی كار بكن داكو بكارن ژیانا خۆ ب رێڤەببەن.
ژلایەكی دی ڤە(شەعلان حسێن) دەرچۆیەكی خەلكێ شنگالێ یە خویاكر،هەر ژ دەستپێكا ئەم ئاوارەبووین و هەتا نهۆ تەخا گەنجان ل ناڤا كەمپان دا ل دەلیڤێن كاری دگەرن بەلێ ژمارەكا كێم بووینە خودان كار،هەروەسا گەلەك رێكخراوان گەنجێن مە ب دەرفەت دیتینە ژبەركو سۆز داینە كو وان دامەزرینن هەتا كو ب شێوەیەكی خۆبەخش كار بكن،لێ پشتی كار ب وان گەنجان نەمینت ئەو نا وەرگرن و هندەك كەسێن ژ دەرڤەی كەمپان وەردگرن و ئەو كەس نە خودان باوەرنامەنە ژی و هەر وەردگرن،ژ ئەنجامێ ڤان رەفتارێن رێكخراوان و پشتگۆه هاڤێتنا گەنجێن دناڤ كەمپان دا رێژا بێكاریێ بەرەف زێدەبوونێ یە و دیاردەیێن خراب ل جڤاكی دا پەیدادبن ژ ئەگەرێ بێكاریێ و پتریا گەنجان كارێ وان بوویە دوكێل،ئەڤجا ئەم داخوازدكن پووتە ب تەخا گەنجا بێتە دان و دەلیڤێن كاری بۆ بێە دابینكرن.
لدۆر نەوەرگرتنا گەنجێن شنگالێ ژ ئالیێ رێكخراوان ڤە،بەرپرسێ رێكخراوا پرا گەنجان یا مەدەنی ل شنگال(فەرحان ئیبراهیم)بڤی شێوەی ئانی زمان،ئەم وەك ژمارەیەكا گەنجان ب شێوەیەكی خۆبەخش ل شنگال كاردكن هەرچەندە چ پشتگیری بۆ مە نائێتە كرن لێ سەر كارێ دبەردەوامن،ئاشكەراكر ژی ئەو رێكخراوێن دی یێن ل دەڤەرێ كار دكن هندەك كەسان وەردگرن نە خەلكێ شنگالێ نە ل دەمەكی پتریا گەنجێن مە یێن خودان باوەرنامە دبێكارن و پێتڤی ب دەلیڤێن كاری نە،دیسان گەلەك گەنجێن شنگال ب شێوەیەكی خۆبەخش بۆ وان رێكخراوا كاردكن پشتی رێكخراو كارێ خۆ دگەل وان ب داوی دئینن وان پشتگۆه دهاڤێژن و دچن هندەك كەسێن دی دئینن بۆ كاری،ئەم نزانین لسەر چ بنەمایەكی گەنج دئێنە وەرگرتن ژبەركو هەموو سالوخەتێن گەنجێن مە هەین پێتڤی بوو نهۆ گەلەك ژ وان دگەل رێكخراوان كاركربان و خودان باوەرنامەنە و شارەزایی دهەموو بواران دا هەیە،ئەم داخواز دكەین پتر گەنجێن دەڤەرێ ل رێكخراوان بێنە وەرگرتن.
تُتاح هذه الصورة أيضا في: کوردی