ئاههنگهك بۆ (150) پشكداربوویێن خۆلێن وهرزێ هاڤینێ هاته ل دارخستن
تورا لالش :
ل ڕۆژ پێنج شهمبوویێ ڕێكهفتى 25/8/2022، بنگههێ لالش تایێ شاریا ب ههماههنگى لگهل ڕێكخراوا بهارا هیڤییا، ڕێكخراوا نوپێل و ناڤهندا ئافرهتێن شاریا ب ئامادهبوونا هژمارهكا زۆر یا نوینهرێن حكوومى و حزبى و ڕێكخراوێن جڤاكێ سڤیل و ههلبژێرێن گوندان و مامۆستا و ڕهوشهنبیرێن دهڤهرێ، ڕابوون ب سازكرنا ئاههنگهكێ بۆ پترى (150) گهنجێن كۆمهڵگهها شاریا و ئاوارێن خهلكێ شنگال ژ ههردوو ڕهگهزان ئهوێن پشكدارى خۆلێن وهرزێ هاڤینێ بووین، كو پێكهاتبوون ژ خۆلێن (كۆمپیوتهر، فێركرنا زمانێ ئینگلیزى و بابهتێ زمانێ ئینگلیزى بۆ پۆلا دوازدێ ئامادهیى.
ئهڤێ ئاههنگێ چهندین بڕگێن ههمهجۆر بخۆڤه گرتبوون، لدهستپێكێ خولهكهك ڕاوهستیان لسهر گیانێ پاكێ شههیدێن كوردستانێ و قوربانیێن ئهنفالان، د دووڤدا چهندین پهیڤ هاتنه خواندن ژلایێ بهڕێزان (د.ڤیان سلێمان) سكرتێرا سكرتاریهتا ئافرهتێن كوردستانێ، (لیسا میارا) سهرۆكا ڕێكخراوا بهارا هیڤییا و (دلگهش سهلیم) بهرپڕسێ بنگههێ لالش تایێ شاریا.
پاشى بڕگهیهكا ژهنینا مۆزیكێ هاته پێشكێشكرن ژلایێ گرۆپێ مۆزیكیێ ڕێكخراوا بهارا هیڤییا و د بهردهوامییا ئهڤێ چاڵاكیێدا دوو خهلاتێن ڕێزلێنانێ هاتنه پێشكێشكرن ژلایێ سكرتاریهتا ئافرهتێن كوردستانێ بۆ بهڕێزان (فارۆق یوسف) بهرپڕسێ لیژنا ناوچا فهیدیێ و (دلگهش سهلیم شهمۆ) بهرپڕسێ بنگههێ لالش تایێ شاریا ژبهر خزمهتا ئهوان یا بهرچاڤ لدهڤهرێ.
ژلایهكى دیڤه پارچهكا ڤیدیۆیێ كو پێكهاتبوو ژ پانۆراما خۆلێن وهرزێ هاڤینێ هاته نمایشكرن بۆ ئامادهبوویێن ئاههنگێ، ل داویێ ژى سوپاسنامه ب راهێنهرێن خۆلان هاتنهدان و باوهرنامێن پشكداربوونێ ژى بسهر پشكداربوویێن خۆلان هاتنه دابهشكرن.
تُتاح هذه الصورة أيضا في: کوردی