ئاوارێن شنگال ژ ڕۆلێ ڕێكخراوان ل كەمپان درازی نینن
تۆرا لالش:
ئاوارێن شنگالێ یێن ل ناڤا كەمپاندا ئاكنجی ئاماژێ ب وێ یەكێ ددەن،كو ڕۆژ بۆ ڕۆژێ بەلاڤكرنا هاریكاریێن هەمەجۆر بسەرئاواراندا شنگالێ كێم بووینە و هاتینە بڕین و ڕۆلێ رێكخراو و دەزگەهان كێم و لاواز بوویە و ڕێژەیەكا مەزن ژ ڕێكخراوین مرۆڤایەتی كارێ خۆ یێن سەرەكی بجهـ هێلاینە.هادی داود،ئاكنجیێ كەمپا بێرسڤێ یە بۆ دەنگێ لالش دیاركر،ل هەموو قۆناغێن دژوار و تەنگاڤیا دەمێ ئاوارە پێتڤی هاریكاریێ دبن ڕێكخراوێن مرۆڤی قەستا كەمپان دكەن و هاریكاریا پێشكێشی ئاواران دكەن،لێ ب مخابنی ڤە ئیرۆ ڕۆژ هاریكاری ل سەر ئاوارێن شنگالێ یێن دناڤ كەمپان دا كێم بووینە و هاتینە بڕین و ڕۆلێ رێكخراو و دەزگەهان كێم و لاواز بووینە و ڕێژەیەكا مەزن ژ ڕێكخراوین مرۆڤایەتی كارێ خۆ یێن سەرەكی بجهـ هێلاینە ،لەوا ژیانا خەلكێ گەلەك ب زەحمەت لێ هاتیە،دبینم د نۆكەدا ئاوارە پێتڤی ب هەموو جۆرێن هاریكاریانە ب تایبەتی دابەشكرنا گوژمێ دراڤی ل سەر خێزانان كو ژلایێ كۆمپانیا ئاسیا حەوالە دهاتە دابەشكرن، هەروەسا دخوازم بتر گرنگی ب كەلوپەلێن ساخلەمیێ و پێتڤێن پەروەردا د ناڤ كەمپان دا باشتر بێتە دان و كێماسی بێنە دابینكرن.
هەرەسا خالد حەجی ئەوژی ئاوارەیێ خەلكێ شنگالێ یە ل كەمپا شاریا ئاكنجی یە،بۆ دەنگێ لالش دبێژت:سەرەڕای ڕەوشا ئاوارەبوونێ و ئێش و ئازاران و ژیانا ب زەحمەت یان ل بن خیڤەتان دا و مەترسییا باهۆز و بارانێ و سۆتنا خیڤەتان، هاریكاریا ئاواران ل ئاستێ پێتڤی نینە و ئاریشێن وان ڕۆژ بۆ ڕۆژێ زێدە دبن،هەروەسا ب مخابنی ڤە ڕێكخراوا( WFP )هاریكاریا ماددی ل سەر هەزاران ئاواران بڕینە و ڤێ چەندێ كارتێكرنەكا مەزن ل سەر ژیانا وان یا رۆژانە كریە و خەلك بێزار بوویە لەوما ئەم دبینین ڕۆژانە ئاریشە و گازندێن ئاواران زێدەتر دبن، ئەم داخواز دكەن هاریكاریا ئاواران بێتە كرن و پێتڤیان ل سەر بەلاڤ بكەن و دخوازم حكومەت و جیێن شۆلەژێ و ڕێكخراوین مرۆڤایەتی بەرسڤا داخوازیێن ئاواران بدەن و چارەسەریا ئاریشێن وان بكەن و نەئێنە پشتگوهـ هاڤێتن.
ژبال خۆڤە مەسعود خودێدا،كو ئاوارەیەكێ كەمپا ئێسیایە بۆ دەنگێ لالش گۆت:بڕینا گوژمێ دراڤی ئەوێ ژلایێ ڕێكخراو ( WFP)دهاتە دابینكرن بوویە جیێ دلگرانی و نەخۆشیا خەلكێ مە یێ دناڤ كەمپاندە و زەرەرمەندێ سەرەكی یێن ڤێ چەندێ هەژار و بەلنگازن،چنكو ب هەزارێن خێزانان دناڤ كەمپاندا چاڤێ وان ل سەر وان هاریكاریانە، ب مخابنی ڤە ئەو هاریكاری ب شێوەیەكی نەراست و نەیاسایی دئێنە دابەشكرن و بتریا خێزانێن هاریكاریا وەردگرن ئەون یێن خودان مووچە و دەرماڵەیێ فەرمانبەران و خودان واستە، بتنێ ئەڤ هاریكاری ل سەر هەژار و بەلنگازان هاتینە بڕین،نەدادپەوەری و گەندەڵییەكا مەزن د ڤی كاری دا هەیە ئەوژی ب هەماهەنگی دگەل ڕێڤەبەریا كەمپان، و ب ڤێ چەندێ كارتێكرنەكا مەزن ل سەر ژیانا ئاوارێن كەمپان كریە و بوویە ئەگەرێ پەیدابوونا ئاریشێن جڤاكی و خێزانی و ئاریشێن دەروونی پێتڤیە حكومەت و ڕێكخراوێن مرۆڤایەتی د هەموو بواران دا هاریكاریا ئاواران بكەن و ئەڤێ ئاریشێ ب زووترین دەم چارەسەر بكەن.
سەرەرای بۆرینا هەشت ساڵان،هێشتا ب هەزاران خەلكێ شنگالێ دناڤا كەمپاندا ل سنوورێ پارێزگەها دهۆكێ و چەند دەڤەرێن دیتر ژیانا خۆ دەرباز دكەن و دڕەوشەكا پەریشان دا دژین.
تُتاح هذه الصورة أيضا في: کوردی