خێزانێن برنجێ خراب وەرگرتی دێ ھێنە قەرەبووکرن
ئهڤرۆ نيوز:
ئەنداما لیژنا ئابووری و وەبەرئینانێ ل پەرلەمانێ عیراقێ دیار کر کو بڕیار ھاتەدان ئەو وەلاتیێن برنجێ خراب وەرگرتی بھێنە قەرەبووکرن، بەلێ دڤێت وەلاتی برنجێ خوە یێ خراب بۆ بریکارێ خوە یێ ئاھێن خوارنێ ڤەگەڕینیت و گۆت: “بریکار دێ وی برنجێ خراب بۆ حوکمەتێ زڤرینیت و ل شوونێ دێ وەلاتی ھێنە قەرەبووکرن”.
نەجیبا نەجیب، ئەنداما لیژنا ئابووری و وەبەرئینانێ ل پەرلەمانێ عیراقێ بۆ رۆژناما ئەڤرۆ ئاشکرا کر کو 600 تەنێن برنجێ خراب ل دەف بریکارێن ئاھێن خۆارنێ بەری ل سەر وەلاتیان بھێتە بەلاڤکرن ھاتنە ژناڤبرن، چونکی ژ تاقیگەھێ دەرنەچوو و گۆت: “گۆمان ل سەر 42 ھزار تەنێن برنجێ خرابووی ھەبوو، بەلێ ب وی رەنگی دەرنەکەفت و ب تنێ 600 تەن د خرابووی بوون”.
ناڤھاتیێ ئاماژە دا وێ چەندێ کو ھەکە ل جھەکی برنجێ خرابووی ل سەر وەلاتیان ھاتبیتە بەلاڤکرن دڤێت وەلاتی وی برنجی بۆ بریکارێ خوە یێ ئاھێن خوارنێ ڤەگەڕینیت داکو بھێتە قەرەبووکرن و گۆت: “ھەکە وەلاتی وی برنجێ خرابووی بۆ بریکارێ خوە یێ ئاھێن خوارنێ نەڤەگەرینیت ناھێتە قەرەبووکرن”.
تُتاح هذه الصورة أيضا في: کوردی