سەفین دزەیی: ھەرێم بەرھەڤە ل گۆر دەستووری دەست ب دانوستاندنان بکەت
WAAR-دهۆك:
پەیڤدارێ حکومەتا ھەرێما کوردستانێ راگەھاند؛ حکومەتا ھەرێمێ پێشوازیێ ل ھەر پێنگاڤەکا ئەرێنی بۆ دەستپێکرنا دانوستاندنان د ناڤبەرا ھەولێر و بەغدایێ دا دکەت.
ل گۆری مالپەرێ فەرمیێ حکومەتا ھەرێمێ، سەفین دزەیی پەیڤدارێ حکومەتا ھەرێمێ گۆت: ئەو پێشوازیێ ل ھەر پێنگاڤەکا ئەرێنی بۆ دەستپێکرنا دانوستاندنان ژبۆ چارەکرنا کێشەیان د ناڤبەرا ھەولێر و بەغدایێ دا دکەن، دوپاتکر کو جڤاتا وەزیرێن ھەرێمێ ل داوی کۆمبوونا خوە بەرھەڤییا خوە بۆ دەستپێکرنا دانوستاندنان ل سەر بنەمایێ دەستوورێ ئیراقێ نیشان دایە.
پەیڤدارێ حکومەتا ھەرێمێ پێنگاڤێن حەفتییا بۆری یێن بەغدایێ ب ئاوایەکێ نیازپاکیێ ناڤکرن، ئەوژی پشتی سەرەدانا شاندەکا حکومەتا ئیراقێ بۆ ھەرێما کوردستانێ و داخوازکرنا لژنەیەکا ھەڤپشک بۆ دانوستاندنان ل سەر دەریێن سنۆری و فرۆکخانە و بەنداڤان و ھەروەسا لیستەیێن مووچەیێن ھەردو وەزارەتێن ساخلەمیێ و پەروەردەیێ ژبۆ ھنارتنا مووچەیێن وان.
سەبارەت ڤەکرنا دەریێن سنۆری یێن ھەرێما کوردستانێ د گەل ئیرانێ دا ژی گۆت: حکومەتا ھەرێمێ پێشوازیێ ل وێ پێنگاڤێ دکەت، ھەروەسا بەرھەڤە ل سەر کێشەیێن ب رێڤەبرنا دەریێن سنۆری و فرۆکخانەیان د گەل حکومەتا ئیراقێ دانوستاندنان ل گۆری میکانزمێن دەستوورێ ئیراقێ بکەت، بۆ وێ یەکێ بگەھن چارەیەکا ھەڤپشک د بەرژوەندا ھەردو ئالیان دا بیت.
تُتاح هذه الصورة أيضا في: کوردی