پارتی: بریارێن جڤاتا نوونەران وەک دەستپێکەکا مەترسیدار دبینین
WAAR-دهۆك:
مەکتەبا سیاسییا پارتییا دیمۆکرات یا کوردستانێ بریارێن جڤاتا نوونەرێن ئیراقێ ل دۆر ئەنجامێن ھەلبژارتنان ب دەستپێکەکا مەترسیدار ناڤکرن و گۆت: پێدڤییە ھەر زوو چاڤ خشاندن ل وان بریار و یاسان بھێت کرن، بەرۆڤاژی دێ وان ھەلوەستەکێ دی ھەبیت.
مەکتەبا سیاسی یا پارتی ئەڤرۆ کۆمبوو و د راگەھاندنەکێ دا دیارکر: پشتی دەرکەفتنا ئەنجامێن ھەلبژارتنێن جڤاتا نوونەران، ئیراق د رەوشەکا نەخوازییار دا دەرباز دبیت، دوپات کر پشتی دوماھی ھاتنا پرۆسەیا ھەلبژارتنان مە داخواز کربوو ل وان جھێن گازندە ھەین ل دووڤ پێدڤییێ دەنگ ب دەست بھێن ھەژمارتن.
مەکتەبا سیاسییا پارتی ئاماژەکر: کو سەرۆکاتییا جڤاتا نوونەران ب پشتەڤانییا ھندەک ئالیان ژمارەیەکا بریار و یاسایێن نەدەستووی دەرخستن و ب وێ پێنگاڤێ پرۆسەیا سیاسی یا ئیراقێ توووشی کێشەیان دکەت و گۆتییە ژی: ھەلوەشاندن و نەھەژمارتنا دەنگێن وەلاتییان پێدڤییە ل گۆرەیی رێکارێن یاسایی و دەستووری بیت و نابیت ل دووڤ داخوازا ئالیێن سیاسی و کەسان بیت.
پارتی ھەلوەشاندنا دەنگێن پێشمەرگەی و ھێزێن ناڤخوە رەت کر و بریار و یاسایێن جڤاتا نوونەران یێن ل دژی داخوازیێن خەلکێ ئیراقێ و گەلێ کوردستانێ دەرکرین ب مەترسیدار ناڤکرن و دیارکر: پێدڤییە ھەرزوو چاڤ خشاندن ل وان بریار و یاسان بھێت کرن، بەرۆڤاژی دێ ھەلوەستەکێ دا وان ھەبیت و داخواز ژ تەڤ ئالیێن ناڤخوە و دەرڤەیی ئیراقێ کر بزاڤێن خوە بۆ چارەکرنا رەوشێ بێخنە کاری
تُتاح هذه الصورة أيضا في: کوردی