نێچیرڤان بارزانی پێشوازی ل كچه چالاكڤانه‌كا رۆژئاڤایێ كوردستانێ كر
WAAR-دهۆك:
سه‌رۆكوه‌زیرێ هه‌رێما كوردستانێ، ئه‌ڤرۆ پێشوازی ل كچا چالاكڤانا رۆژئاڤایێ كوردستانێ نوژین مسته‌فا كر و پشته‌ڤانییا خوه بۆ چالاكیێن وێ راگه‌هاند.
ل گۆره‌یی مالپه‌رێ فه‌رمی یێ حكومه‌تا هه‌رێمێ، ئه‌ڤرۆ ل هه‌ولێرێ سه‌رۆكوه‌زیر نێچیرڤان بارزانی، پێشوازی ل كچا چالاكڤانا خه‌لكا باژارێ كۆبانێ نوژین مسته‌فا كر، كو خودان پێدڤیێن تایبه‌ته و ل ده‌رڤه‌یی وه‌لاتی، ب به‌رگریكاره‌كا بهێز ژ مافێن په‌نابه‌رێن سووری دهێته نیاسین و وێ چالاكڤانا كورد، داخوازا پشته‌ڤانیێ ژ سه‌رۆكوه‌زیر بارزانی و حكومه‌تا هه‌رێمێ كر.
نێچیرڤان بارزانی ژی، ده‌ستخوه‌شی ل كار و چالاكیێن نوژینێ كر و پشته‌ڤانییا خوه بۆ هه‌موو كار و چالاكیێن وێ راگه‌هاند و داخوازكر، نووژین بێی جوداهی ببیته به‌رگریكارا هه‌موو پێكهاته‌یێن سووری.
نوژین مسته‌فا چالاكڤانا دیارا كورد، ل ئه‌ورۆپا دژیت و نها ئێك ژ چالاكڤانێن دیاره كو به‌رگریێ ژ مافێن په‌نابه‌رێن سووری دكه‌ت و رێكخستنه‌ك ژی بۆ ڤێ مه‌ره‌مێ ڤه‌كرییه و هاریكارییا په‌نابه‌ران دكه‌ت و هه‌فتییا بووری ب مه‌ره‌ما پشكداریكرنێ د پرۆگرامێ تێدێكس نشتیمان دا، سه‌ره‌دانا هه‌رێما كوردستانی كرییه.
تُتاح هذه الصورة أيضا في: کوردی