تەخا بەهرەمەندا پێتڤی پشتەڤانیا حكوومەتێ یە بۆ ئەنجامدانا داهێنانان
تۆرا لالش یا راگەهاندنێ/خێرهات بێدرڤان
بەهرەمەند و كەسانێن دبیاڤێ هۆنەرێ دا ئاماژێ ب وێ چەندێ ددەن،ژبەر نەبوونا دەلیڤە و فەرسەندێن كاری داكو گەنج ولاو بەهرەمەندی و شیانێن خۆ بەرچاڤ بكن و ببەنە ئەلەمەنتێن ئەرێنی و بەرهەمدار،ئەڤ تەخا گرنگ یا جڤاكی د دوودلی و نیگەرانیێ دا دژیت و جهێ گرنگیێ یە كەرتێ هۆنەری نەئێتە قورخكرن،پێتڤیە حكوومەت ب رۆلێ خۆ رابت چ حكوومەت بخۆ پشتەڤان بت یانژی هەماهنگی دناڤبەرا كەرتێن تایبەت و بەهرەمەندان دا چێكت بۆ هندێ كو ئەڤێن خودان ئارەزو بەردەوام داهێنانێ بكن و ئەنجامبدەن،كو ئەگەر كەرت هەبن دێ شارەزا و زانا بن دكارێ خۆدا.
بەهرەمەند”عەدنان حاجی”دبێژت:”ئەگەر كەرت هەبن مرۆڤ وێ شارەزا و زانا بت دكارێ خۆدا و ئازادیا كار دێ پتر هەبت وهەست وسۆز پتر ژبۆ مرۆڤ چێ دبن،ژبەركو مرۆڤ دزانت هندەك كەس هەنە گرنگیێ بەهرەمەندا ددەن و گەلەك جاران بەهرەمەند كارا دكت و كارێن وی دئێنە دزین”.
مامۆستا ل پەیمانگەها هۆنەرێت جوان بەشێ شانۆیێ”جەعفەر سمۆ”دیاركر:”نۆكە ل پرانیا وەلاتێن پێشكەفتی گرنگیێ ب كەرتێ تایبەت ددەن،ژبۆ بەهرەمەندان ژی پێتڤیە حكوومەت ب رۆلێ خۆ رابت چ حكوومەت بخۆ پشتەڤان بت یانژی هەماهنگی دناڤبەرا كەرتێن تایبەت و بەهرەمەندان دا چێكت بۆ هندێ كو ئەڤێن خودان ئارەزو بەردەوام داهێنانێ بكن”.
نڤیسەر”شەمال ئاكرەی”گۆت:”بەهرەمەندییا گەنجان، سەرمایەكا پەراوێز خستییە و گەنجینەیەكە نیشتیمانییە، و پیڤەرەكە هێز و شیانا پێشەرۆژا هەر مللەتەكی پێ دئێتە هەلسەنگاندن،دیسان گەنج سەركردە و لیدەرێن سوبەهی نە،مخابن گرنگی و پووتەیەكێ باش و ژ هەژی پێڕا نەهاتیە دان ئەگەر ئەم فەرسەندێن گەنجێ مە لگەل گەنجێ جڤاكەكێ دی یێ پێشكەفتی جێواز بكەین، رۆژانە ئەم تاكێن ڤێ تەخا جڤاكی دبینین كو گلی و گازندان دكن،ژبەر نەبوونا دەلیڤە و فەرسەندێن كاری داكو ئەڤ گەنج و لاوە، بەهرەمەندی و شیانێن خۆ بەرچاڤ بكن و ببەنە ئەلەمەنتێن ئەرێنی و بەرهەمدار، مە هەژمارەكا مەزن ژ دەرچوویێن پەیمانگەه و زانینگەهان هەیە بێی كو دەرگەهێن دامەزراندن و كاركرنێ ژبۆی وان دڤەكری بن، لەوڕا ئەڤ تەخا گرنگ یا جڤاكی د دوودلی و نیگەرانیێ دا دژیت و تا رادەیەكی بێ هیڤیبوون ژ سوبەهی لجەم وان پەیدا بوویە”.
دەرهێنەر”نەوزاد شێخانی”خویاكر:”جهێ گرنگیێ یە كو كەرتێ هۆنەری نەئێتە قورخكرن ژلایێ دەزگایێن دەولەتێ ڤە یان ژلایێ پارتان ڤە،ب ڤی رەنگی ئەو نكارن دەربرینەكا راستەقینە ژ ئاراستە و نامەیێن خۆ یێن مرۆڤایەتی بكەتن و پاشی هۆنەرمەند نكارە رامانا راستەقینەیا هۆنەری بەرجەستە بكت ب هەموو شێوازێن وێ ڤە ،ل سەر ڤی بنیاتی پێدڤی ب هەبوونا كەرتەكێ تایبەتە بۆ بەهرەمەندا و ل سەر هەموو بیاڤا و هەروەسا هەبوونا پشتەڤانیەكا دروست ژبۆ وەرگرتن و چاڤدێریا بەهرەمەندا ژ پێخەمەتی هۆنەرەكێ سەربەخۆ كو بكاربە دۆزێن چارەنڤیساز یێن گەلێ مە خۆ لێ بكت خودان”.
تُتاح هذه الصورة أيضا في: کوردی