چالاكڤانه‌ك: پێتڤیه دایك و باب زارۆكێن خۆ د ژینگه‌هه‌كا ساخله‌م و به‌خته‌وه‌ر دا مه‌زن بكن
تۆرا لالش :ناسر شهوانى
په‌روه‌رده‌كرنا خێزانه‌كا به‌خته‌وه‌ر و سه‌رفه‌راز و سه‌ركه‌فتى ژ گرنگترین فاكته‌ڕێن ئاڤاكرنا جڤاكى یه،ل سه‌ر دایك و بابان فه‌ره به‌رده‌وام هه‌ول بده‌ن ئاریشێن خۆ دناڤبه‌را خۆ دا چاره‌سه‌ركه‌ن،چالاكڤانه‌كا كچ ژى دبێژت:یا دروست ئه‌وه دایك و باب ب ڕێزگرتن و حه‌زژێكرن و لێك تێگه‌هشتن ل پێش زارۆكێن خۆ سه‌ره‌ده‌ریێ بكن و زارۆكێن خۆ ل ژینگه‌هه‌كا ساخله‌م دا مه‌زن بكن،داكو ژیانا وان یا سه‌ركه‌فتى و به‌خته‌وه‌ر بت.
ڤیان سلێمان،وه‌كو ده‌یكه‌ك دبێژت:په‌روه‌رده‌كرنا خێزانه‌كا به‌خته‌وه‌ر و سه‌رفه‌راز و سه‌ركه‌فتى ژ گرنگترین فاكته‌ڕێن دى یێن ئاڤاكرنا جڤاكى یه،چنكو زارۆك تێدا گه‌ش دبن و فێرى ڕه‌وشت و تیتال و ڕه‌فتارێن كه‌سایه‌تى و جڤاكى دبن،له‌وما پێتڤیه ئه‌ڤ پرۆسه بتر ل سه‌ر ڤیان و دلخۆشى و هه‌ست و هیڤیان ئاڤا بت،هه‌روه‌سا دڤێت هه‌ردوو لایه‌ن باش بزانن دڤێت ئه‌و ببنه ئه‌گه‌رێ كه‌یف خۆشیا هه‌ڤدوو چنكو ئه‌گه‌ر توو كه‌یف خۆشیێ دخێزانا خۆ دا نه‌بینى توو ل چ جیا نابینى،ژبه‌ركو مال تاكه وارگه‌هێ ئارامیێ یه بۆ هه‌ر مرۆڤه‌كى و ده‌ما توو دمالا خۆ دا یێ ئارام و كه‌یفخۆش بى دێ ژ ده‌رڤه ژى كه‌سه‌كێ سه‌ركه‌فتى و كه‌یفخۆش و خودان به‌رهه‌م بى.
مامۆستا مه‌حسن عه‌لى،ئه‌ڤه بۆچۆنا وى بوو،وه‌كو ئه‌م دزانین كاركرنا بێ پلان ئه‌نجامێ وێ هه‌ر شكه‌ستن و ئاریشه‌یه،هه‌روه‌سا پێتڤیه ل ده‌ستپێكا پێكئینانا هه‌ڤژینیێ مرۆڤ پلانه‌كا بهێز به‌رامبه‌ر هه‌ر گهۆرینه‌ك و ئاریشه‌كێ دانت ژبۆ هندێ ژینگه‌ها خێزانێ تووشى دوودلى و بێزاریێ ل پاشه‌ڕۆژێ دا نه‌بت و یا پاقژ و راست و دروست و دوور بت ژناڤچۆنێ بت،ل ئاستێ جڤاكى ل هه‌ڤددوو ئانكو په‌یوه‌ندیێن مه نێزیكى هه‌ڤ بن و ته‌مه‌ن ژى یێ گونجایى بت و به‌خته‌وه‌ر و تێگه‌هشتن و ڤیان و خۆشى دناڤدابت،داكو ببنه خودانێن خێزانێن سه‌ركه‌فتى، وئه‌گه‌ر ئه‌ڤ چه‌نده به‌رچاڤ نه‌ئێنه وه‌رگرتن خێزان دێ ئالۆزبت و تووشى گه‌له‌ك نه‌خۆشیان بت.
ئه‌حمه‌د ده‌خیل،مامۆستایه‌كه دیاركر،سه‌ركه‌فتن و به‌خته‌وه‌ریا خێزانێ بتنێ ل ناڤ مالا خێزانێ دا نینه، به‌لكو پێتڤیه ل سه‌ر ئه‌ندامێن خێزانێ ببن نموونه ژ خێزانه‌كا خودان به‌هانه وجیێ رێزێ ل نك خه‌لكێ و ب كه‌یف و خۆشى وجوامێرى دگه‌ل هه‌موو كه‌سان و جیران و دۆست و هه‌ڤالێن خۆ بژین و ده‌مێن خۆش دگه‌ل وان بۆرینن،هه‌ڤژینیا سه‌ركه‌فتى دڤێت چاڤدێریكرن بۆ هه‌بت،چاڤدێریكرنا به‌حس ژێ دكه‌م بتنێ ئه‌و حه‌ز ژێكرنا هه‌ردوو كور و كچان به‌س نینه كو به‌رى پرۆسا هه‌ڤژینیا وان هه‌ى،به‌لكو هه‌ڤژینى وه‌كى باخچه‌كێ گولانه،دڤێت به‌رده‌وام و رۆژانه چاڤدێرى بۆ بێته كرن و د ئێك و دوو بگه‌هن چنكو تێگه‌هشتن و تفاق وته‌بایى دخێزانێ دا زۆر یاگرنگه ژبۆ پاراستنا خێزانه‌كا به‌خته‌وه‌ر و تێگه‌هشتى و ڤیان و خۆشى دناڤدا بت.
ژبال خۆڤه چالاكڤانا كچ سه‌میره ئیسماعیل،ب ڤى شێوه‌ى بۆچۆنا خۆ دیاركر،بێگۆمان پێكئینانا هه‌ڤژینیه‌كا به‌خته‌وه‌ر و سه‌ركه‌فتى دبته ئه‌گه‌رێ ئاڤاكرنا ژیانه‌كا تژى به‌رپرسایه‌تى و داخوازى و ئه‌رك و ماف و ڤیان و هاریكارى و دلۆڤانى، لێ خێزانه‌ك یا هه‌ى دایك و باب به‌رده‌وام ب شه‌ڕن ئه‌ڤجا جۆرێ شه‌رى چ شه‌ڕه‌ده‌ف یان لێدان بت و ل پێش چاڤێن زارۆكێن خۆ و زارۆیێن خۆ د كه‌ش و هه‌وایه‌كێ نه‌ئارام دا مه‌زن دكن و ئه‌ڤ چه‌نده دبته ئه‌گه‌رێ په‌یدابوونا ئاریشێن خێزانى و جڤاكى دناڤ ئه‌ندامێن خێزانێ دا، لێ ب مخابنى ڤه ئه‌ڤ چه‌نده یا دووره ژ خێزانه‌كا به‌خته‌وه‌ر و سه‌رفه‌راز، یا دروست ئه‌وه كو دایك و باب ب ڕێزگرتن و حه‌زژێكرن و لێك تێگه‌هشتن ل پێش زارۆكێن خۆ سه‌ره‌ده‌ریێ بكن و زارۆكێن خۆ ل ژینگه‌هه‌كا تژى حه‌زژێكرن و ڤیان و لێبۆرین و دلۆڤانى و ڕێزگرتن ڤه مه‌زن بكن،داكو ژیانا وان یا سه‌ركه‌فتى و به‌خته‌وه‌ر بت.
هه‌روه‌سا پارێزه‌ر سه‌عید شنگالى گۆت:دڤى سه‌رده‌مى دا ژبه‌ر ئاسته‌نگ و بارودۆخێن ژیانێ هنده‌ك جاران لاوازى دكه‌فته د په‌یوه‌ندیێن خێزانى دا، و خێزان تووشى گه‌له‌ك نه‌خۆشیان و ته‌نگاڤیا دبت لێ وه‌كو ئه‌م دزانین چ خێزان نینن هه‌موو ده‌مان خۆشى دناڤ دابن و دگه‌ل ئێكدوو ب ئارامى و بێ ئاریشه بژین، دڤێت هه‌ردوو لایه‌ن زانبن د پرۆسا هه‌ڤژینیێ دا هه‌موو ئاریشه دێ ئێنه چاره‌سه‌ركرن،له‌وما پێتڤیه ل سه‌ر دایك و بابان به‌رده‌وام هه‌ول بده‌ن ئه‌و ئاریشێن خۆ دناڤبه‌را خۆ دا چاره‌سه‌ركه‌ن و نهێنیێن خۆ بپارێزن و لێكتێگه‌هشتن و حه‌زژێكرن و ڤیان و گرنگیپێدان دناڤبه‌را وان دا هه‌بت.
س.س
تُتاح هذه الصورة أيضا في: کوردی