نەخۆشیا سایكۆسۆماتی
عزەت برۆ
سایكۆسۆماتی زاراڤەكە ژ هەردوو پەیڤێن (سایكۆ) ئانكو دەروون و (سۆماتی) ئانكو لەش، رامانا وێ ئانكو نەخۆشیێن دەروونی یێن لەشی پێكهاتیە ،ئەڤ زاراڤە بۆ وان نەخۆشیێن لەشی دئێتە بكارئینان كو تووشی مرۆڤی دبن و ئەگەرێن سەرەكی دەروونینە ژ ئەنجامێن خەم و ئازار و دوودلیێ،مرۆڤی كۆمەكا پێتڤیێن فسیولۆژی هەنە وەك خوارن و ئاڤ و خەو و ئوكسجین و پلەیا گەرماتیێ یا گونجایی و هەستكرن ب ئارامیێ و رێزگرتن و ڤیان و لێبۆرین مرۆڤ بەردەوام هەولا تێركرنا ڤان پێتڤیا ددەت،داكو وەك مرۆڤ بژیت و هەڤسەنگیا خۆ ژ دەست نەدەت ،بەلێ ئەگەر هەرەشە و ئاستەنگ ببن رێگر بۆ تێركرنا وان پێتڤیا ئەو كەس دێ هەڤسەنگیا خۆ ژ دەست دەت دێ تووشی خەم و ئازار و نەخۆشیێن و ترسێ بت،هەروەسا بەردەوامی و دووبارەبوونا وان مرۆڤی تووشی كۆمەكا نەخۆشیێن لەشی دكت وەك سۆتاندنا گەدەیی وقۆلۆن و سەرئێشان و رەبو و بێن تەنگ بوون و بلندبوونا فشارا خوونێ ژبۆی چارەسەركرنا ڤان نەخۆشیا دڤێت دوڤچۆنەكێ ل دەروونێ مرۆڤی و پەیوەندیا وی ب لەشی ڤە بكن ئەم دزانن پەیوەندیەكا بهێز دناڤبەرا بارێ دەروونی و لەشی یێن مرۆڤی دا هەیە،بۆ نموونە دەمێ مرۆڤ گوه ل دەنگ و باسەكی نەخۆش ببت ئێكسەر گەدێ مرۆڤ تێك دچت و ژ هەرسكرنێ راوەستت و تووشی ئازارێ دبت مرۆڤ حەزا خوارنێ نامینت،هەروەسا بارێ دەروونی یێ ئالۆز ژ ئەنجامێن سفكاتی پێكرن یان فشارێن دەروونی و ئیشاندن و هەرەشەلێكرن و كارەساتێ دلتەزین و تێرنەكرنا پێتڤیێ مرۆڤی دبتە ئەگەر مرۆڤ تووشی نەخۆشیێن دەروونی لەشی ببت،بەلێ هەتا نهۆ ژی بۆ پزیشك و دەروونناسا روون نەبوویە چاوا خەم و ئازار و دوو دلی مرۆڤ تووشی ڤان نەخۆشیێن لەشی دكەین و ئەندامێن لەشێ لاواز و نەخۆش دكەین بەلێ یا بۆ مە دیار و روون بوویی ئەگەر خەم و ئازار و نەخۆشی د ناخێ مرۆڤی دا كەفتنە سەر ئێك مرۆڤ دێ تووشی نەخۆشی و فشارێن دەروونی بت بەلێ ئەگەر مرۆڤ شیا خۆ ژ خەم و ترسێ و نە ئارامیێ رزگار بكت دێ كێمتر تووشی نەخۆشیا بت،هێژای گۆتنێ یە رۆژ بۆ رۆژێ رێژا ڤان نەخۆشیا زێدەتر دبت تایبەتی ل وان كۆمەلگەهێ ئاست پێشكەفتی و خودان تەكنەلوژی ژینگەها وان یا جڤاكی یە ئالۆزە،چنكو بەردەوام د ململانەكا دەروونی یا بهێز دانە بۆ دەستڤەئینانا پێتڤیێن خۆ یێن رۆژانە و هەروەسا فشارێن كاری و وەستیان ، ئەو كەسێن ئەڤ نەخۆشیە ل نك هەی گەلەك سەرەدانا نۆژدارا دكت و گەلەك نۆژدارا دگهۆرت و دراڤەكێ زێدە دمەزێخت،بەلێ نائێنە چارەسەركرن گەلەك جارا نۆژدار بۆ هەلگرێ ئەڤی جۆرێ نەخۆشیێ نەشتەرگەریێ ئەنجام ددەن بەلێ ئەڤ چارەسەریە سەركەفتی نابت ئەگەر فاكتەرێن دەروونی نەئێنە چارەسەركرن و ژینگەها وی یا خێزانی و جڤاكی و دەروونی نەئێتە باشتركرن،هەروەسا دڤێت پێتڤیێن وی بێنە تێركرن و ژ ترسێ و خەما بێتە رزگاركرن چنكو ئەگەرێن سەرەكی یێن ئەڤێ جۆرە نەخۆشیێ دەروونینە چی ئەگەرێن لەشی نینن.
تُتاح هذه الصورة أيضا في: کوردی