شەرم كارتێكرنێ لسەر كەسایەتیا مرۆڤی دكت
عزەت برۆ
شەرمینی هەستەكێ ڤەشارتی یە د ناخێ هەموو كەساندا هەیە بەلێ ژ ئالیێ رێژێ ڤە جیاوازی هەیە ژ كەسەكی بۆ كەسەكێ دی، نۆرمالە ئەگەر كەسەكی شەرم ل دەڤ هەبت لدەمێ سەرەدانا جیەكێ نوو دكت یان دانوستاندنێ دگەل هندەك كەسێن نەناس دكت یان كارەكێ نوو ئەنجام بدەت،پشتی دەمەكی كێم دێ خۆ ژێ قورتال كەت و شەرم لدەڤ نامینت.
بەلێ ئەگەر هات و ئەڤ شەرمە یە بەردەوام بوو بۆ ماوەیەكێ درێژ لدەڤ كەسەكی بمینت و ببتە رێگر بۆ پێشڤەچۆنا وی كەسی د كارو چالاكیێن وی یێن رۆژانە دا،هەروەسا ئەو كەسە هەست ب بێزاریێ و نەئارامیێ بكت دگەل كەسێ دەوروبەرێن خۆ دڤێت ئەڤ جۆرە كەسە بێنە چارەسەركرن چنكو ئەگەر شەرم گەهشتە رادەیەكێ وەسا دێ بتە ئەگەرێن فشارێن دەروونی.
ئەگەرێن پەیدا بوونا شەرمێ ئەون كو پەروەردەكرنا نەیا دروست یا خێزانێ دەمێ زارۆكی گەلەك نازدار دكت و نەهێلن تێكەلی كەسێن دی بت و هەروەسا نەهێلن زارۆك لدۆر شیانێن خۆ كاران ئەنجام بدەم یان ژی پشتگوه هاڤێتنا زارۆكی و دابین نەكرنا پێتڤیێن وی،هەروەسا لێدان و ئاخفتنێن كرێت ئەڤ چەندە دبتە ئەگەر كو زارۆك ببتە كەسەكی شەرمینوك و باوەری بخو نەبت.
دیسان هندەك جاران كەسێن دەوروبەر دبنە ئەگەر كو هەست ب شەرمێ بێتە كرن لدەمێ سفكاتی ب وی كەسی دئێتە كرن یان دەمێ كەسەكی كێماسیەكا لەشی هەبت و كەسێن بەرامبەر ترانا پێ بكن.
هەروەها نەبوونا پێزانینا دبتە جیێ شەرمێ ب تایبەت بۆ قوتابیان دەمێ مامۆستا داخوازا گۆتنا بابەتەكی ژێ دكت و پێزانین لسەر نەبن، هندەك جاران تاكە كەس بخۆ دبتە ئەگەر كو شەرم لدەڤ پەیدا دبت لدەمێ بەراوردیا خۆ دگەل كەسەكی دن دكت و خۆ كێم ببینت بەرامبەر خەلكی وەسا هزر دكت كو خەلك ژ وی باشترە.
چەند ئامۆژگاریەك تاكو ئەو كەسێ هەست ب شەرمێ دكت داكو نە گەهتە وی ئاستی كو ببتە ئەگەرێ تێك چۆنا بارێ دەروونی،بۆ نموونە پەروەردەكرنا دروست ژ ئالیێ دەیك و بابان ڤە بۆ زارۆكی نابت زارۆك بێتە نازداركرن ب رێژەیەكا زێدە و نابت بێتە پشتگوه هاڤێتن ژی و دڤێت پێتڤیێن زارۆكی بۆ بێنە دابینكرن ،هەروەسا فەرە ل قوتابخانێ مامۆستا رۆلێ خۆ ببینت دەمێ دبینت كو قوتابی یێ شەرمینە بزاڤێ بكت بەشداری دكار و چالاكیێن رۆژانە دا بكت و پەیوەندیێن وی دگەل قوتابیێن دی دروست بكت،دیسان دەمێ كەسەكی كێم ئەندام بێتە دیتن دڤێت رێزێ لێ بگرن داكو خۆ بگونجینت دگەل كەسێن ئاسایی و نەبتە كەسەكێ شەرمینوك و گوشەگیر.
تُتاح هذه الصورة أيضا في: کوردی