ئافرەتا ئێزدی..دەردێن بێ داوی
لازمە شێخ یوسف
رۆژا(3/8)ێ دبە هەفتەمین سالڤەگەرا بیرەوەریا كۆمەلكوژیا ئێزدیێن شنگالێ،ئێش و ئازار د دلێ مە دا زێدە و زێدەتر دبن و دگەل وان ترس زێدە دبت،چنكو بیرەوەریەكا جەرگبر و ب ئێش و ئازارە و مە هەموویان ئازار ددەت ب تایبەتی ئافرەتا ئێزدی یا شنگالی،ژبەركو هێرشا توند و هۆڤانە یا تیرۆرستێن داعش ل بیرا مە دئینت كو رابوون ب كرێتترین تاوانان ژ دزی و تالانكرن و وێرانكرن و رەڤاندنا ئافرەتان، و ژ ئەگەرێ ڤێ چەندێ ب هەزارێن خەلك ئاوارەی سەرێ چیایێ شنگالێ و دەڤەرێن سنوورێ هەرێما كوردستانێ و ناڤ كەمپان ل پارێزگەها دهۆكێ بوون.
تیرۆرستێن داعش ب هەموو رێیان فشار ئێخستنە سەر تاك و پەیرەوێن ئاینێ ئێزدی و زۆری و زۆرداری كرن كو داب و نەریتێن خۆ بهێلن و ئاینێ ئیسلامێ پەیرەوبكن یان دێ رووبرووی چارەنڤیسەكێ نەدیاربن ل سەر دەستێ ئەوان، د ڤی ماوەی دە پشكەكێ ژ تاكێن ئاینێ ئێزدی بەرگەها ڤێ هێرشێ گرتن و ل چیایێ شنگالێ دا بەرەڤانی ژخۆ و پشكەكا زۆر ژ خەلكێ خۆ كرن و ب توندی بەرهنگاری هۆڤێن تیرۆریستێن داعش دبوون،ل رۆژا(3ێ تەباخا سالا 2014)ێَ شنگال كراسەكێ رەش كرە بەرخۆ ژ ئەگەرێ تاوانێن درندە و نەمرۆڤایەتی یێن تیرۆرستێن داعش ب سەرێ وێ ئینایین كو یا بێ وێنەبوو ل چەرخێ نووهـ دە، و جڤاكێ مە ئێزدیان پشكا شێری ژ زیان و قوربانیان بەركەفت، ب هەزاران خوشك و دەیكێن مە ژلایێ چەكدارێن وێ رێكخراوا تیرۆرستی ڤە هاتنە گرتن و ل بازارێن مووسل و رەقایێ كرین و فرۆتن ب وان دهاتە كرن،لەوا فەرە لسەر جڤاكا ئێزدی ڤێ بیرەوەریا نەخۆش ساخ بكت كو ب شەرمەزاری بۆ مرۆڤایەتیێ دئێتە هژمارتن ژ هۆڤایەتیێ، و فەرە بەردەوام ئەڤ رۆژە ب ئازار ل بیرا مە بت وەكو رێزگرتن بۆ قوربانیێن ڤێ كارەساتێ و هەروەسا ب هەزارەها گرتی و رەڤاندی ل بیرا مە بن چنكو گرتنا وان ویژدانێ مرۆڤایەتیێ هەژاند.
بەلێ ئەم ڤێ بیرەوەریێ ساخ دكەین و ئێش و ئازار و زۆرداریا وان ئافرەتێن رزگاربووین ژ دەستێ داعش دە ل بیرا خۆ دئینین كا چاوان رەفتار ل گەل وان دكرن ئافرەتێن گرتین و تێرنەبوون ژ گرتن و دەستدرێژیكرنێ سەر وان،بەلكو ل ناڤ خۆ دا ئەو دفرۆتن و ل بازاری وەكو هەر كەرەستەیەكا ئەرزان دفرۆتن، لێ ژبیركرن كو شەڕەفا ڤان ئافرەتان ژ ریهێن وان یێن قرێژگرتی ب قیمەتترە ، بەلێ ئەگەر هات و دنیا زڤری قەد مافێ وان نائێتە ژبیركرن و چ جارا مافەك بەرزەنەبوویە كو مافخواز ل پشت بن.
ل ڤێرە ل ەر مە فەرە رۆلێ ئافرەتا شنگالی ل كەمپان دە ژبیرنەكەین كو بەرگەها برسێ و گەرمێ و سەرمایێ كریە هەتا كو زارۆكێن خۆ پەروەردە و خودان كرینە، لەوا هەزار سلاڤان بۆ دهنێرین،ئەم ل ڤێدەرێ داخوازێ ژ هەموو لایەنێن پەیوەندیدار دكەین ئەوان دەیك و خوشكێن مە یێن هەتا نهۆ دناڤ دەستێن تیرۆرستێن چەكدارێن داعش دە رزگار بكن.
تُتاح هذه الصورة أيضا في: کوردی