مه‌سرور بارزانی، سه‌روكێ حكومه‌تا هه‌رێما كوردستانێ، كه‌ڤرێ بناغه‌یێ پروژێ فریاگوزاریا بله‌ز یا گه‌هاندنا ئاڤێ بو باژێرێ هه‌ولێرێ داتنت
تۆرا لالش
پروژه ب بهایێ 479 ملیون دولاران ژ بودجه‌یا حكومه‌تا هه‌رێما كوردستانێ دێ هێته جێبه‌جێكرن و ب رێژا %100 كێشا كێمئاڤیێ ل سنورێ پارێزگه‌ها هه‌ولێرێ چاره‌سه‌ر دكه‌ت، پروژه دێ د ماوه‌یێ 550 روژان دا و زووتر ژی، ژ لایێ كومپانیا هێمن گروپ ڤه هێته جێبه‌جێكرن.
تێ زانین پروژه پێكهاتیه ژ دوو وێستگه‌هێن پاقژكرنا ئاڤێ ب هێزا 20 هزار مه‌تر سێجا د ساعه‌ته‌كێ دا ل گور ستانداردێن عیراقێ و رێكخراوا ته‌ندروستیا جیهانی.
ده‌رباره‌ی چاوانیا كارپێكرنا پروژه‌یێ، پروژه پێكهاتیه ژ یه‌كه‌یا وه‌رگرتنا ئاڤێ ل سه‌ر زێیێ مه‌زن ل نێزیك گوندێ كه‌ورگوسك، لێ وێستگه‌ها پاقژكرنێ دكه‌ڤته نێزیك گوندێ گاینج، هه‌روه‌سا وێستگه‌هه‌كا به‌لاڤكرنا ئاڤێ ل نێزیك گوندێ سێبیران دێ هێته چێكرن.
10 ئه‌مبارێن ئاڤێ د چارچوڤه‌یا پروژه‌یێ دا دێ هێنه دانان كو شیانا ئه‌مباركرنا 200 هزار مه‌تر سێجا ئاڤێ هه‌یه. هه‌ر د ڤێ پروژه‌یێ دا 200 كیلومه‌تر بوریێن هه‌سنی یێن سپایرول ستیل ب تیره‌یێن 1600 ملم، 1500 ملم، 1200 ملم، 800 ملم، 700 ملم و هه‌تا 300 ملیمه‌تر دێ هێنه به‌كارئینان.
280 كیلومه‌تر بوریێن ئه‌سیلین ب تیره‌یێن 160 ملم و 220 ملم و 250 ملم بو رێڤه‌به‌ریا ئاڤا هه‌ولێرێ د چارچوڤه‌یا پروژه‌یێ دا دێ هێنه دابینكرن.
هه‌روه‌سان كاره‌با نیشتمانی و كاره‌با یه‌ده‌گ ژ رێیا موه‌لیده‌یان ڤه بو پروژه‌یێ دێ هێته دابینكرن. وی روهن كر “پروژه دوو وێستگه‌هن د ناڤ ئێك چارچوڤه‌یێ دا و ب هه‌ردوو وێستگه‌هان 20 هزار مه‌تر سێجا ئاڤ دێ هێته پاقژكرن، ده‌مێ هه‌ر كێشه‌یه‌ك بو وێستگه‌هه‌كێ پێكهات، وێستگه‌ها دی دێ كار كه‌ت و بێئاڤی چو جاران پێك نایه‌ت.
پروژه دێ ئاڤێ گه‌هینته گه‌ره‌كێن ناڤبه‌را هه‌ردوو جادێن 150 مه‌تری و 120 مه‌تری و گه‌ره‌كێن ده‌وروبه‌رێن وان، ل گه‌ل داره‌تو، بنه‌سلاڤه، كه‌سنه‌زان، شاوێس، پیرزین، به‌حركه، عه‌نكاوه، سێبیران.
تُتاح هذه الصورة أيضا في: کوردی
