شێخ شامۆ:پشتەڤانیكرنا گەنجان و رێكخراوێن جڤاكێ سڤیل ژ ئارمانجێن بنگەهێ لالشە
تۆرا لالش یا راگەهاندنێ
ب ئامادەبوونا”شێخ شامۆ”سەرۆكێ دەستەیا بلندا بنگەهێ لالش و ژمارەیەكا كەسایەتیێن رەوشەنبیری و جڤاكی و رێكخراوێن جڤاكێ سڤیل یێن ناڤخۆیی و نێڤ دەولەتی،ل رێككەفتی 31/10/2016ێ 20قوتابی ژهەردوو رەگەزان ژ خۆلەكا فێكرنا زمانێ ئنگلیزیێ دەرچوون یا ژلایێ سەنتەرێ گەنجێن دهۆك ب پشتەڤانیا رێكخراوا(UPP ) یا ئیتالی و رێكخراوا (مەسەلە)هاتیە ئەنجامدان ب هەماهەنگی لگەل بنگەهێ لالش ل دهۆكێ و بۆ ماوێ نێزیكی دوو هەیڤان یا بەردەوام بوو.
ب ڤێ هەلكەفتێ،سەرۆكێ دەستەیا بلندا بنگەهێ لالش پەیڤەك پێشكێشی ئامادەبوویان كر و پیرۆزباهی ل دەرچوویان كر و گۆت:”زانست دیسا چەكەكێ بهێزە پێ شەرێ دوژمنێن مرۆڤایەتیێ دكەین ئەو ژی ب فێربوونا زمانێن دیتر و ب تایبەت زمانێ ئنگلیزیێ،ئەڤ گەنجە دكارن جڤاكێ مەئاڤەدان بكن بەرەف باشتربوونێ”.
هەروەسا دپەیڤا خۆ دە دووپات ل پشتەڤانیا بنگەهێ لالش كر بۆ هەموو چالاكییێن خۆرتكرنا بنەمایێن پێكڤەژیانا هەڤبەش دناڤبەرا پێكهاتێن جودا ل دهۆكێ و ب تایبەت پشكداران ژ ئاینێن جودا،تەكەزكر كو دەرگەهێ بنگەهێ لالش یێ ڤەكریە بۆ هەموویان و بنگەه مالا هەموویانە.
دئاهەنگا دەرچوونا قوتابیان دە،باوەرنامە ل سەر پشكداران هاتنە بەلاڤكرن و برگەیەكا موزیكێ هاتە سازدان،زێدەباری پێشكێشكرنا پەیڤان ژبال پشكداران ڤە.
تُتاح هذه الصورة أيضا في: کوردی