شێخ شامۆ:هەلویستێ ئێكگرتویا ئیسلامیا كوردستانێ ل دهۆکێ بەرامبەر کارەساتا شنگالێ نائێتە ژبیركرن
تۆرا لالش یا راگەهاندنێ
ب مەرەما پیرۆزكرنا (23) سالیا دامەزراندنا ئێكگرتویا ئیسلامی كوردستان،ل رێككەفتی 9/2/2017ێ،بەرێز”شێخ شامۆ”سەرۆكێ دەستەیا بلندا بنگەهێ لالش ل دهۆكێ دگەل ئەندامێن دەستەیا بلند سەرا مەلبەندێ سێ یێ ئێكگرتویا ئیسلامی كوردستان ل دهۆكێ دا، ژلایێ”د. محمد مستەفا”بەرپرسێ مەلبەندی وكادر وئەندامێن مەلبەندی ڤە ب گەرمی پێشوازی لێ هاتە كرن.
دپەیڤەكێ دا بەرێز”شێخ شامۆ”دیاركر:”ب مەرەما پیرۆزكرنا (23) سالیا دامەزراندنا ئێكگرتویا ئیسلامی كوردستان،مە پیرۆزباهیێن بنگەهێ لالش ئاراستەی ڤێ پارتا كوردستانی كرن و هەلویستێن ئێكگرتوو بەرامبەر كارەساتا شنگالێ ئینا زمان و گۆت:درۆژێن تەنگاڤیان دا ئێكگرتوو و جەماوەرێ وێ ل دەڤەرا دهۆکێ ژئالیێ خۆڤە تەخسیری نەكرن بۆ خزمەتكرنا خەلكێ مە یێ لێقەومیایی و هاریكاریێن مرۆڤی پێشكێشكرن،ئەڤ یەك ژی مە هانددەت پتر پەیوەندیێن مە خۆرتر لێ بێن بۆ پێكڤەكاركرن بۆ خزمەتكرنا پێكڤەژیان و پێشئێخستنا ڤان پەیوەندییان”.
ژبال خۆڤە،”د. محمد مستەفا”بەرپرسێ مەلبەندێ سێ یێ ئێكگرتویا ئیسلامی كوردستان ب گەرمی ب خێرهاتنا شاندێ بنگەهێ لالش كر و دیاركر وەكو ئێكگرتوو چوو جاران بەرێ خۆ نەدایە رەنگ و بیر و باوەرێ مرۆڤا ،بەلێ بەروڤاژی ڤێ یەكێ وەك مرۆڤ بەرێ خۆ دایە هەر كەسەكی ومە ب ئەركێ خۆ یێ مرۆڤایەتی زانی ل وان رۆژێن تەنگاڤیان دا جەماوەرێ خۆ هان بدەین و هەریکاریا خەلکێ لێقەومیایی بکەن،،دیسان دووپات ل ئێك رێزیا ناڤ مالا كوردستانی و پارت و لایەنێن سیاسی و ئۆلی كر ژبۆ پاراستنا ڤێ ئەزمونا ل کوردستانێ هەیی و رێگری کرن ل مەترسیا ل سەر كوردستانێ هەی ژئالیێ دوژمنان ڤە،هەتا كو كوردستان سەرفەراز و ژڤان دووژمنان رزگاربە”.
هەروەسا بەرپرسێ مەلبەندێ ناڤهاتی داخوازا پتەوكرنا پەیوەندییان د ناڤبەرا ئێزدیان و ئێكگرتویا ئیسلامی كوردستان دا كر كو پتر لێك نێزیك بوون لگەل بنگەهێ لالش و سازیێن ئێزدیان هەبت.
تُتاح هذه الصورة أيضا في: کوردی