بنگەهێ لالش:راپرسیا كوردستانێ بۆ سەرخوەبوونێ ..پێنگاڤەكە ئازایە وگەلەك ماینە چاڤەرێ
پشتی دەهێن سالان قوربانیێن گران،ئەوێن گەلێ مەی كوردستانێ پێشكێشكری كو پێنووس نكاریت دەربرینێ ژ وێ زیان و زەرەرێ بكەت ل سەرتەڤایا ئاستێت مرۆڤایەتی و ئابووری و ژینگەهێ ، ژناڤبرنا ب هەزارا گوندا و راكرنا خەلكێ وان ، تاوانێن ئەنفالا و لێدانا وان ب گازا ژەهراوی ،نێزیك بوویە رۆژا ئازادیێ بهەلیت ل سەر ئەردێ كوردستانێ داكو گەلێ كوردستانێ ببنە سەروەرێ ئاخا خوە یا دیرۆكی بێ هیچ دەسەلات و داگێركرنەكێ ژبلی كوردا .
ب گرنگیدانەكا مەزن مە دیڤچوون كریە و دیڤچوونا پێنگاڤێن سەركردایەتیا هەرێما كوردستانێ دكەین بەرەف راپرسینا مللی بۆ مافێ چارەنڤیسێ كوردستانێ ، هەڤركییا كاودانێن ناڤخۆی یێن هەرێمایەتی یێن ئالۆز و رێڤەچوون بەرەف كەش و هەوایەكی ئازاد سەرەرای هەمی ئاستەنگان ،ئەم باش هەست دكەین كو ئەو پەككەفت و ئاستەنك ناكەڤنە بەرامبەری ڤیانا وی گەلێ تێهنیێ ئازادیێ و قورتالبوویێ بن دەستیێ ، نەخشێ ئاواتێن رەوا هاتە كێشان ب رۆناهیا رۆژا بیست و پێنجی ئەیلولا داهاتی وەك ژڤانێ ئەنجامدانا راپرسیا سەرخوەبوونا چاڤەرێكری یا ب دەهێن سالان ژ زولم و ستەمكاریێ و ژێستاندنا ڤیانێ ب نە هەقی .
ئەو چەندا ورەیا مە زێدەكری ژبۆ پشتەڤانیا ڤێ پێنگاڤا ئازا یا كو ئەم گەلەك ماینە ل چاڤەرێیا وێ ،ئوا كو هەمی كوڕێن گەلێ كوردستانێ بەر ڤێ راپرسیێ كەتی ، دناڤ واندە خەلكێ مەیێ كوردێ ئێزدی ل دەڤەرێن وان یێن گەرم و بریندار ، ئەوێن پتریا وان هاتینە ئازادكرن ب خوون و قوربانیدانا پێشمەرگەیێن قەهرەمان ،ئەم ل ڤێدەرێ دووپات دكەین كو بنگەهێ لالش ب تەڤایا كادرێن خوەڤە دێ هەمی شیانێن خوە دەنە كاری بۆ پشتەڤانیا ڤێ پێنگاڤا پیرۆز و دەنگدان ب “بەلی” بۆ سەرخوەبوونێ و “بەلێ ” ژبۆ ب دەستڤەئینانا مافێ چارەنڤیس و “بەلێ ” ژبۆ ئاڤاكرنا وەلاتێ كوردستانێ داكو گەلێ وی شادببە ب بایێ ئازادیێ وەك گەلێن دن .
ئەم دبینن پێڤاژۆیا سەرخوەبوونا گەلێ كوردستانێ پێدڤییە بلند ببە ل سەر هەمی ناكۆكیێن پارتایەتی و سیاسی دناڤبەرا كوڕێن ئێك وەلاتی ، و ئەڤ ناكۆكیێن هە رەوشەكا ساخلەم و راستەقینەیە دچارچۆڤێ دیموكراسیێ دا ، ئەم ب هیڤینە راپرسیا ب دەستەڤەئینانا مافێ چارەنڤیس دەلیڤەك بە بۆ دووبارە ئاڤاكرنا مالا كوردستانی ،چنكو ئازادیا گەلێ مە و سەرخوەبوونا وی ل سەر هەمی وان ناكۆكیایە یێن كو چارەسەریا وان هەی ب ڕێكێن دیالۆكێن كوور دناڤبەرا سەركردایەتیا كوردستانێ و پارتێن كوردستانی، ب هیچ رەنگەكی نابیت سڤكاتی ب مافێن گەلێ كوردستانێ بێتەكرن و بازرگانی پێ بێتەكرن ل بن هێجەتا ناكۆكیێن سیاسی ،ژبەركو مافێن گەلێ كوردستانێ بلندتر و پترە و ب روومەتترە ژ هەر ناكۆكیەكا دەرفەتا چارەسەریا وی هەی ،ئەو مافەكە نابیت هیچ لایەنك موزایدێ ل سەربكەت . بێ هیچ گومانەك كو راپرسیا مافێ چارەنڤیسێ گەلێ كوردستانێ ،ئەو رێزگرتنە ژبۆ گیانێن سەدان هزارێن جانگۆریێن گەلێ مەیێ كوردستانێ ، هەر دیسان ئەو رێزگرتنە ژبۆ گیانێن قوربانیێن كوردێن ئێزدی ل پێڤاژۆیا بزاڤا ئازادیخوازا كوردستانێ ، چنكو ئێزدی وەكو هێلا ئێكێ بوون ب درێژاهیا خەباتا بزاڤێن ئازادیخوازا كوردستانێ ب حوكمێ جوگرافیا وان یا بەرنیاس بۆ هەمیان ، گوندێن وان ببوون وەك بەربەستان و هێلێن بەرەڤانیێ یێن ئێكێ ژبۆ بەرگریێ ژكوردستانێ ،زێدەباری كو وێ دەستێ هاریكاریێ و پشتەڤانیێ پێشكێشی پێشمەرگەیێن قەهرەمان دكر ژبلی هەمی رێكارێن توند ژلایێ رژیمێن عیراقێ یێن شوفێنی یێن پێشوو .
پێدڤییە ل سەر مە ئێزدیان ئەم ل ئاستێ قوربانیدانا خوە بن یێن ب درێژاهیا پێڤاژۆیا بزاڤا ئازادیخوازا كوردستانی ، و ئەم خوە دووربكن ژ تەڤلیهەڤكرنا بابەتان ل ڤا دەمێن چارەنڤیساز ،كو دەرفەت نینە ژبۆ شاشیان ، ل پێشیا مە دوو رێك هەنە ،كوردستان یان عەرەبستان پرس یە چارەنڤیسسازە و ئێك لایكەرە نە تەنها گرێدای رەوشا مەیە نهۆیە بەلكو گرێدای بەرەبابێن داهاتییە ، و ل سەر مە فەرە ئەم چارەنڤیسێ خوە و غەدرا ل تەباخا ۲٠۱٤ ل مە هاتی كرن تەڤلیهەڤ نەكن ئەوا هەتا ئیرۆ ژی ئەم ژبە دنالین .
و ژ هەژی ئاماژەكرنێ یە كو سەرۆك مەسعود بارزانی ل چەندین جڤینان دووپاتكریە كو بریارا ئێزدیان د دەستێ واندە یە و ئەو دێ بریارێ ل سەر چارەنڤیسێ خوە دن ، و ئەڤەیە رۆژا دیاركرنا چارەنڤیسێ مە كو بریار ب دەستێ مەیە ن د دەستێ چ لایەنێن دیتر دایە ،و پرس ئەوە كو پێدڤییە ب ئاقلمەندی سەرەدەری ل گەل بێتەكرن نە ب خوەشكرنێن چارچۆڤەكری و ئاراستەكرنێن سیاسی یان پارتایەتی دگەل ڤی لایەنی و لایەنێ دیتر ،جهـ نینە بۆ خوەشكرنێ دڤان رەوشێن ئێك لایكەردا كێشانا نەخشێ هەرێمایەتی دێ دووبارەكەت هەروەسا دێ ئێزدیان ژی كەتە بەرامبەر هلبژاردەیەكێ دیرۆكی ل تەرخانكرن و بلندكرنا ژێیاتیا ئەردێ باب و باپیران یان ڤەقەتیان ژێ حەتا حەتای ب سەدەمێن دلداری یێن كو نەگونجای دگەل قەبارێ هەڤركیێن نهۆ هەی .
دەستەیا بلندا بنگەهێ لالش یێ رەوشەنبیری و كۆمەلایەتی /دهۆك
۸_٦_۲٠۱۷
تُتاح هذه الصورة أيضا في: کوردی