بنگەهێ لالش: پیرۆزباهی ب هەلكەفتا جەژنا رەمەزانا پیرۆز
داخوازی بۆ هێزێن سیاسی و گەلێ كوردستانێ ژبۆ هاریكاری و بەرهەڤیێ ژبۆ بریارا چارەنڤیس ب هەلكەفتا هاتنا جەژنا رەمەزانا پیرۆز جوانترین و گەرمترین پیرۆزباهیان پێشكێشی جیهانا ئیسلامی ب گشتی دكەین و گەلێ كوردستانێ ب تایبەتی بۆ هەمی حەژێكەر و خێرخواز و ئاشتیخوازێن ل جیهانێ.
ب ڤێ هەلكەفتا پیرۆز ،ئۆمێدەوارین ئارامی و گەشەپێدان ل كوردستانێ بەرقرارببیت و هەمی لایەك كاربكەت ژبۆ بنبركرنا هزرێن خرابكار و ئەوێن دبنە ئەگەرێ وێرانكرنێ و ژناڤبرنێ و ژێكڤەكرنا كۆمەلگەهان ،كو تاكە رێكا باشتر بۆ هەمیان ژبۆ شادبوون ب ئارامییێ و تەناهیێ دا ،ئەو ژی ل چارچۆڤێ پشتەڤانیا بنەمایێن پێكڤەژیان و لێبۆرینا ئۆلی و نەتەوەیی دناڤبەرا پێكهاتەیێن ئۆلی و نەتەوەیی.
هەروەسا ئاماژێ ددەنە قۆناغا چارەنڤیساز و ئێكلایكەر و ئەوا چاڤەرێی گەلێ كوردستانێ ل حەفتەیێن داهاتی دا ، ئەوا گرێدايی راپرسییێ ژ پێخەمەتی بریاردانا چارەنڤیسی ، ئەو ژی مافەكێ سروشتی و گرنتی ل دیڤ پەیماننامە و بەلگەنامەی نێڤ دەولەتی ، و ل سەر ڤێ چەندێ داخوازێ ژ تەڤایا هێزێن سیاسی یێن كوردستانێ دكەین و گەلێ كوردستانێ یێ خۆراگر دكەین بۆ هاریكاریكرن و هەڤگرتنێ ژبۆ سەرئێخستنا شەهیانا جەماوەری یا چاڤەرێكری ل ۲٥ ئیلولا داهاتی ، رێزگرتن بۆ گیانێ ب سەدان هزارێن شەهیدێن گەلێ مەیێ كوردستانێ ژ پێشمەرگە و سڤیلان یێن گیانێ خوە پێشكێشكرین و كرینە قوربانی ب درێژاهیا پێڤەژوویا بزاڤا ئازادیخوازا كوردستانێ داكو گەلێ مە ب مافێ خوە یێ رەوا شادببەڤە ژوەك هەمی گەل و نەتەوا.
جارەكا دی پیرۆزباهیێن خوە پێشكێش دكەین ب هەلكەفتا جەژنا رەمەزانا پیرۆز ، ئۆمێدەوارین كو گەلێ مەیێ كوردستانێ ئاهەنگێ بگێرە ب ڤێ هەلكەفتێ ل سالا داهاتی و شادببە ب دەولەتا خوە یا سەربەخوە و چاڤەرێكری.
دەستەیا بلندا بنگەهێ لالش / دهۆك
25/6/2017
تُتاح هذه الصورة أيضا في: کوردی