پەرتووك نێزیكی 25 ڤەكۆلینێن ئەكادیمی بخۆڤە دگرت و ل بیرەوەریا كارەساتێ دێ ئێتە بەلاڤكرن
راپۆرت:ئیڤان حەجی
لژنا ڤەكۆلینێ ل دەستەیا بلندا بنگەهێ لالش ل دهۆكێ دەست ب چێكرنا پەرتووكەكێ ل سەر كارەساتا شنگالێ كریە،ئەڤ پەرتووك چەندین لایەنا بخۆ ڤە دگرت و 400 لاپەرن و ناڤێ وێ هێشتا نەهاتیە دانان،كو دێ ب زمانێ ئەرەبی بت و هەول دێ ئێنە دان بۆ زمانێ ئینگلیزی بێتە ڤەگۆهاستن،نێزیكی 25 ڤەكۆلینێن ئەكادیمی یێن زانستی بخۆڤە دگرت و هاتینە دابەشكرن ل سەر هەموو بابەتێن كارەساتێ،دڤی پرۆژەیی دا نێزیكی 25 ڤەكۆلەرێن ئێزدی و بیانی بەشداری تێدا كریە،كو ل بەرە ل 3/8/2016 ب هەلكەفتا بیرەوەریا كارەساتێ بكەفتە بەردەستێ خووندەڤانان.
ئەندامێ لژنا ڤەكۆلینێ ل دەستەیا بلندا بنگەهێ لالش و ڤەكۆلەرێ جڤاكی(حەجی مەغسۆ)بۆ دەنگێ لالش خویاكر،ئەڤ پەرتووكە چەندین لایەنا بخۆ ڤە دگرت،ئێك ژوانا ل سەركاردكەم لایەنێ كۆمەلایەتی و دەروونی یە كا كارتێكرنا وان ل سەر كۆمەلگەها ئێزدی ب شێوەیەكی گشتی و ب تایبەتی شنگال چاوایە،ب دیتنا من ئەڤ لایەنە گەلەك گرنگە و هەر ژ فەرمانێن بەری نۆكە و ئەو تشتێن ب سەرێ ئێزدیان هاتی و چ كارتێكرن ل سەر ئێزدیان هەبوو و جڤاكێ مە چاوا كت و پر كریە و بەر بەلاڤ كریە و كارتێكرنا وێ ل سەر خێزانێ و ل سەر ئاوارەبوونێ و جه بەردانێ،هەروەسا ڤێ كارتێكرنەكا مەزن ل دەروونێ زارۆكا كریە چاوا بێ سەمیان دبنە بێ دایك و باب و ژێك ڤە بوونا خێزانێ ژی كارتێكرنەكا مەزن ل ئێزدیان كریە،ب تایبەت ل خەلكێ شنگالێ ل دەمێ تیرۆرستێن داعش كچ و ژن و زاروكێن ئێزدیان برن و زەلام كوشتن هەموو ب دكیۆمێنت و بەلگە و داتایێن نەتەوەیێن ئێكگرتی وسەر زارێ خەلكێ و ژ نڤیسینێن بەرێ ژی،دیسان دڤێ كارەساتێ دا ژی كا چاوا ئەو ژن و زارۆك برنە مووسلێ و سووریا من ئیناینە و نڤیسینە ،هەروەسان مە پتر گرنگی دایە تشتێت هەبوونا مە دا چنكو مەب چاڤێ خۆ دیتیە و چەند چاڤپێكەفتن ژی مەكرنە دگەل وان كەسێن ژ دەستێ داعش دەركەفتین و هەتا هندەك چاڤپێكەفتن ژ میدیایان من ئیناینە و ژ ئالیێ كۆمەلایەتی تێكدانا خێزانا ئێزدی و تێكدانا جڤاكێ ئێزدی،خۆش بەختانە ئەڤ كەسێن ژ دەستێ داعش رزگاربووین دناڤ جڤاكێ مەدا وەك ئێزدی پاقژترین كەس هاتنە وەرگرتنە و ب بیرمەندێ هەموو خەلك و رەوشەنبیر و زەلامێن ئاینی و جڤاتا رۆحانی ،گۆتژی نهۆ ژی كارتێكرنەكا كۆمەلایەتی ل كەمپا یا هەی هندەك زارۆك وێ هەین دبێ دەیك و بابن و دبێ خودانن و ژ قوتابخانا دبێ بەهرن و گەلەك ژوان ئەوێن كەفتینە د دەستێ داعش دایە و ئاینێ وان هاتینە گهۆرینە و هاتینە فرۆتنە و درەندەترین سەرەدەری دگەل دا هاتە كرن و دگەل وان هیچ مرۆڤاتی بەرچاڤ نەهاتیە وەرگرتنە،ل سەر ڤی بابەتی نێزیكی 30 لاپەران من نڤیسیە و هێشتا كێمە و ئەم چاڤەرێنە هەگەر هاتوو دەرفەت هەبت ئەم دێ چەندین برگێن دی چێكەین و دێ بەرهەڤبن.
ئەندامێ دەستەیا بلندا بنگەهێ لالش(شەمۆ قاسم)بۆ دەنگێ لالش دیاركر،پشتی ئەڤێ هزرێ مە وەك دەستەیا بلندا بنگەهێ لالش و لژنا ڤەكۆلینا چەندین كۆمبوون ئەنجام دان، بریار هاتە دان ڤێ پەرتووكێ چێكەین ل سەر كارەساتا شنگالێ،لژنا ڤەكۆلینان ئەڤ كارە دانا سەر ملێ خۆ و مە ئەو ڤەكۆلین دابەشكرن ل دووڤ پێشەیا وی ڤەكۆلەری و دماوێ دوو هەیڤ ونیڤان دا گشت ڤەكۆلین هاتنە كۆمكرن و هەتا نۆكە 23 ژوان وێت گەهشتینە مە ب تنێ دوو ژوان ێت ماین ئەو ژی وێ د قۆناغا داویێ دا و نۆكە ژی ئەم وێ كار ل سەر دكەین بۆ بژارتنا وان،چنكو گەلەك ژ وان ب زمانێ كوردی بوون گهۆرین بۆ زمانێ ئەرەبی چنكو پەرتووك ب زمانێ ئەرەبیە،ئاشكەراكر ژی ناڤێ پەرتووكێ هێشتا مە نە دانایە و پەرتووك 400 لاپەرن و نۆكە ئەڤە بەرگەكە و هەكە دشیان دابوو دێ چەندین بەرگێن دی دەرێخین و مە ل بەرە بۆ 3/8/2016 بكەفتە بەردەستێ خووندەڤانان و هەر دوێ رۆژێ دا بێتە بەلاڤكرن.
مامۆستایێ زانكویا دهۆكێ و ئەندامێ لژنا ڤەكۆلینێ(كۆڤان رێسان) بۆ دەنگێ لالش دبێژت:دەمێ كارەساتا شنگالێ چێبووی مە دیت هەركەسەك یان هەرنڤیسەرەك ژ ئالیەكی ڤە بەحسی كارەساتێ دكر،لێ من هزركر تشتەك بێتە نڤیسین گشتی بت و ب رەنگەكێ گشتی بەحسا هەموو كارەساتێ بكت و ب شێوەیەكێ ئەكادیمی زانستی ب رێك و پێك ،چنكو گەلەك كەسا و نڤیسەران تشتێن ب سەرێ مللەتێ مەهاتی ب رێك و پێكی نە نڤیسیە و بەروڤاژی شوونا خزمەتێ بكن ژ ئەنجامێ لاوازیا نڤیساندنێ یان نەبوونا شێوازەكێ زانستی ل شوونا خزمەتەكێ بكت ژ بەهایێ وێ ئینایە خوارە،بۆ نموونە گەلەكا دیدار دگەل كچ و ژنێن رزگاربووی كریە و بوویەر تۆماركرینە ل شوونا پتر ب شێوازەكێ هوسا یێ كارتێكەر بنڤیست و كارتێكرنێ ل خەلكی بكت،بەروڤاژی وێ چەندێ ژ بەهایێ وێ بوویەرێ و وێ دیرۆكێ ئینایە خوارە،ڤێجا مە هزركر ئەم پرۆژەكێ هۆسا چێكەین یێ بەرفرەه بت و ب رەنگەكێ زانستی بێتە نڤیسین و ب رەنگەكێ گشتی بێتە چێكرن و تشتەك نەئێتە ژ بیركرن و ژ هەموو لایان ڤە ئەڤ كارەساتە ببتە دیرۆك،چنكو گەلەك فەرمان ب سەرێ ئێزدیان هاتنە وهەتا نۆكە ئەم چ ژێ نزانینە،چنكو نەبووینە مێژوویە و نەهاتینە نڤیسینە،ڤێجا من هزركر ئەم انسكلوپیدیەكێ چێكەین ژ 12 بەرگا و من پلانەك ژی چێكربوو و هەر بەرگەك بەحسێ تشتەكی بكت و چ ژ كارەساتێ نەدهێلا لێ وەكی ئەم د زانن نۆكە هەرێما كوردستانێ دقەیرانەكێ دا دەرباز دبتە،پشتی مە ئەڤ پرۆژە پێشكێشی بنگەهێ لالش كری ژبەر قەیرانا دارایی وان وەسا دیت ل دەستپێكێ وەكو ئێك پەرتووك بێتە بەلاڤكرن و گەلەك یا بەرفرەه بت،دیسان ژی هەموو بابەتان بخۆ ڤە بگرت و ب شێوەیەكێ گشتی و پۆخت و تیرو تەسەل بت.
هەروەسا مامۆستایێ زانكۆیا دهۆكێ و ئەندامێ لژنا ڤەكۆلینێ(ئەرشەد حەمەد)بۆ دەنگێ لالش گۆت:پرۆژێ ڤێ پەرتووكێ تایبەتە ب كارەساتا شنگالێ ڤە،ئەوا ژلایێ تیرۆرستێن داعش ڤە هاتی ئەنجامدان ل 3/8/2014،نێزیكی 25 ڤەكۆلینێن ئەكادیمی یێن زانستی نە و هاتینە دابەشكرن ل سەر هەموو بابەتێن كارەساتا شنگالێ هەر ژ دەست پێكا كارەسات چێبوویی،ژوانا رەڤینا خەلكێ و گرتن و كوشتن و ئێخسیر و رزگاربوون و گورێن بكۆم و ،هەروەسا ژ ئالیێ مێژوویی ڤە ئەڤێ فەرمانێ چ رەهەندێن خۆ هەبون و ژ ئالیێ یاسای ڤە ژی كا ئەڤ كارەسات دبتە جینۆساید یان نە و ئەو گۆرێن ب كۆم هاتینە دیتن،دڤی پرۆژەیی دا نێزیكی 25 ڤەكۆلەرێن ئێزدی و بیانی بەشداری تێدا كریە و مەل بەرە ب هەلكەفتا بیرەوەریا كارەساتا شنگالێ ل 3/8/2016 ڤێ پەرتووكێ بێخنە بەردەستێ خووندەڤانان و ئەڤ پەرتووك دێ ب زمانێ ئەرەبی بت،چنكو مەدڤیا خەلكەكی دی ژی ب ڤێ كارەساتێ بگەهیت و دێ هەولدەن ڤێ پەرتووكێ ب ڤەگۆهێزین بۆ زمانێ ئینگلیزی،داكو جیهان هەموو بزانت چ بسەرێ ئێزدیان هاتیە.
تُتاح هذه الصورة أيضا في: کوردی