ل کەمپێن ئاواران بازرگانیکرن ب مرۆڤان زێدەبوویە
ئەڤرۆ نیوز:
رێڤەبەرا گشتی یا مافێ مرۆڤی ل ھەرێما کوردستانێ ئاشکرا کر کو بازرگانیکرن ب مرۆڤان د ناڤ کەمپێن ئاواران دا زێدەبوویە و گۆت: “ھەتا نوکە حوکمەتا عیراقێ و رێکخراوێن بیانی ھەڤکار نەبووینە بۆ چارەسەرکرنا ئەڤێ ئاریشێ و دابینکرنا داخوازیێن ئاوارەیان داکو بازرگانیکرن ب مرۆڤان بھێتە کێمکرن”.
تاڤگە عومەر، رێڤەبەرا گشتی یا مافێ مرۆڤی ل ھەرێما کوردستانێ بۆ رۆژناما ئەڤرۆ دیار کر کو رێژا پێشێلکرنا مافێن مرۆڤی د ناڤ کەمپێن ئاواران دا زێدەبوویە و بۆ وان ئەڤ چەندە پشتڕاستبوویە، کو بازرگانی ب مرۆڤان د ناڤ کەمپێن ئاواران دا دھێتەکرن و دەستدرێژیا سێکسی د ناڤ کەمپێن ناڤبری دا ھەیە و کچێن ژیێ وان ژ 18 سالیێ کێمتر ددەنە شوو و گۆت: “چەندین حالەتێن دی یێن دژی مافێن مرۆڤان ھەنە و ئەڤە ژی ل ھەموو دنیایێ ھەیە ب تایبەت د ناڤ ئاوارن دا ژ بەر ڤێ چەندێ دەستەیا مافێ مرۆڤی کار بۆ کێمکرنا رێژەیا ئەڤان پێشێلکاریان کریە و دێ د بەردەوام ژی بین”.
ناڤھاتیێ ئاماژە دا وێ چەندێ کو ھەتا نوکە حوکمەتا عیراقێ ل دووڤ داخوازیێن ئاواران نەھاتیە و چو داخوازیێن وان بجە نەئیناینە و سەرەرایی ڤێ چەندێ رێکخراوێن بیانی ژی وەکو پێدڤی ھاریکاریا ئاواران نەکریە ئەڤە ژی بوویە ئەگەرێ وێ چەندێ کو بازرگانیکرن ب مرۆڤان زێدەبیت و گۆت: “دخوازم رێکخراوێن بیانی پتر رۆلێ خوە ببینن بۆ کێمکرنا رێژا بازرگانیکرنێ ب مافێ مرۆڤی د ناڤ کەمپێن ئاواران دا ل ھەرێما کوردستانێ”.
تُتاح هذه الصورة أيضا في: کوردی