گیرۆبوونا رزگاركرنا دەڤەرێن شنگالێ…بۆچی؟
ئلیاس نەعمۆ خەتاری
هێرشكرنا تیرۆرێن داعش بۆ شنگالێ وفەرمانا هەرە مەزن ب سەرێ ئێزدیان ئیناین بناڤێ ئاینی وژدانێ دونیایێ هەژاند وچوو جاران نائێتە ژبیركرن،بەلكو ئەڤ فەرمانا هەنێ یا مەزن وبڤی رەنگی درندە ومەزن هێشتا یە بەردەوامە وخلاس نەبوویە.
هێرشكرنا تیرۆرێن داعش بۆ عێراقێ زەرەرەكە مەزن گەهاندە گەلێ عێراقێ،لێ باجا هەرە مەزن ئێزدیان یا دای وهێشتا خلاس نەبوویە،دیسان نائێتە ژبیركرن خیانەتا هەرە مەزن هاتیە كرن ل خەلكێ مە ل شنگالێ ژ ئەرەبێن دەور وبەرێن شنگالێ هەڤالێن نان وئاڤێ،ئانكو كریڤێت خوونێ دەمی دەستێ هاریكاریێ بۆ داعش درێژكری وبووینە داعش وهێرشكرینە سەر گوند ودەڤەرێن ئێزدیان ل شنگال و دئەنجامدا خەلكێ مە هاتنە كوشتن وهاتنە گرتن وكژ وژنێن مە ئَێزدیان هاتنە گرتن وكرنە سەبایا،دیسان بەرامبەری ڤێ چەندێ بەرخودان وبەرگریكرنا شەرڤان و پێشمەرگەیێن قارەمان نەهێلان چیایێ شنگالێ بكەفتە دەستێ داعش وژمارەكا مەزن ژ شنگالێ هاتە رزگاركرن،لێ پرسیار ئەوە ئەرێ بۆجی كۆمەلگەهێن دی هەتا گوندێ كۆچۆ هەتا ڤێ گاڤێ نەهاتینە رزگاركرن،پشتی مووسل بتنێ بەشەك مایی نەهاتیە رزگاركرن ئەرێ كەنگی دێ شنگال ب تەمامی ئێتە ئازادكرن،دیارە قەدەرا خەلكێ وێ ئەوە پشتی فەرمان و وێرانكرن وكوشتن ژیانا خۆ یاداویێ لبن جادا ولناڤ كەمپا دەربازبكن ، وەكو بۆ خەلكێ هەموویان یە دیار وخویاكری ئیرۆ پتر ژ هێزەكا لەشكەری یا كاردكت ل ناڤ شنگالێ،هەر دیسان پتر ئێك ئالی ل سەر ئاخا شنگالێ هاتنە بلندكرنە و وەكو دیار ململانەكە سیاسی ل سەر شنگالێ دئێتە كرنە ومەترسیەك هەیە لدۆر رزگاركرنا ئاخا قەزایێ،دڤیا مللەتێ مە یێ ئێزدی بتە ئێك رێز وئێك بریار وئێك دەست وخۆ دوركت ژ بەرژەوەندێن كەسایەتی وجهێن بەرپرسیار خۆ پتر نێزیكی ئێك بكن،داكو ئەم بكارین بریارەكێ ل سەر شنگالێ بدەین.
ئەرێ ل هێرە دەمێ شنگال نەئێتە رزگاركرن ئەگەر چینە ،داعش ل وێدەرێ یا بهێزە یان حكوومەتا عێراقێ وحكوومەتا هەرێما كوردستانێ رێك ناكەڤن،یانژی خەلكێ شنگال بخۆ ئەگەرێ ڤێ چەندێ یە، یا دی نەرزگاركرنا وێ دەولەتێن دەوروبەرێن عێراق وەكو توركیا وئیران وسوریا هەتا ئەمریكا ناهێلن بێتە رزگاركرن،ئیرۆ خەلكێ مە هەموو دزانن نەرزگاركرنا قەزایێ ئەگەرێن سیاسینە ودڤێت خەلكێ مە خۆ لێ بكەتە خودان وب زووترین دەم شنگال بێتە ئازادكرن ودەست ب ئاڤەدانكرنا وێ بێتە كرن وخەلكێ وێ هەموو بێتە قەرەبووكرن هەر كەسەك ل دووڤ زەرەرمەندیا خۆ،داكو خەلكێ مە بكارت بزڤرتە سەر مال وملكێن خۆ وهێدی هێدی دەست ب ژیانەكە نوو بكت،یادی ژی ئەوە داخوازەكا فەرمی بناڤێ ئێزدیان وخەلكێ شنگالێ بێتەكرن ژحكوومەتا هەرێما كوردستانێ و حكوومەتا عێراقا فیدرال شنگال بێتە رزگاركرن وئێكسەر بێتە ئاڤەدانكرن.
تُتاح هذه الصورة أيضا في: کوردی