ئاوارێن دێرەبوونێ بۆ كەمپان دێ ئێنە ڤەگوهاستن
تۆرا لالش یا راگەهاندنێ/شەمال خدر
ل سەرێ كانیا دێرەبوونێ 77 خێزانێن ئاوارەیێن شنگالێ دناڤ خیڤەتان دا دژین،ژبەركو دناڤ ئەردێ چاندنیێ دا دئاكنجینە،ئەڤە ماوەیەكە هیچ هاریكاریەك ژ ئالیێ رێكخراوێن مرۆڤایەتی ڤە نەگەهشتینە وان و ژ لیستا رێكخراوان دا هاتینە دەرێخستن، رێڤەبەرێ ناوچەدارییا رزگاری ئاشكەراكر كو ل دەمەكی نێزیك ئەڤ ئاوارنە و یێن دكاڤلان دا دێ بۆ كەمپان ئێنە ڤەگوهاستن.
ئاوارەیێ شنگالێ”قائید دەرویش” ل دەڤەرا دێرەبوونێ ئاكنجییە دیاركر:”ئەز و خێزانا خۆ ل سەرێ كانیا دێرەبوونێ دناڤ خانیەكێ ئاخێدا دژین و ژیانا مە گەلەك یا ب زەحمەتە و كارەك نینە ئەم بكن،داكو پاریەكی نانی بۆ زارۆكێن خۆ دابین بكن ل سەر هندێ را ئەڤە ماوەیەكە هیچ هاریكاریەك ژ ئالیێ رێكخراوێن مرۆڤایەتی ڤە نەگەهشتینە مە و ئەم 77 خێزان ب ئێكجاری ژ لیستا رێكخراوان دا هاتینە دەرێخستن و هاریكاریان نادەنە مە و دبێژن ب بریارا پارێزگەهێ ناڤێن وە هاتینە راكرن و ب هیچ رەنگەكی نابت هاریكاری بگەهنە وە،مە سەرەدانا هنەك لایەنێن شۆلەژێ كر و گۆتن هوون دناڤ ئەردێ چاندنیێ دا دئاكنجینە و دڤێت بێنە ڤەگوهاستن و ژبەر ڤێ چەندێ ل سەر وە هاتینە برین،ئەڤجا ئەم داخوازێ ژ جهێن شۆلەژی دكن ب زووترین وەخت رێكە چارەیەك بۆ مە بێتە دیتن”.
هەروەسا”خێری مەروان” ئاوارەیەكێ دی یێ شنگالێ یە دبێژت:”ئەم 77 خێزان ژ ئاوارەیێن شنگالێ ل سەرێ كانیا دێرەبوونێ دناڤ هندەك خیڤەتێن بێ سەروبەردا دژین و ئەڤە ماوەیەكە هیچ هاریكاریەك نەگەهشتیە مە ژلایێ چ رێكخراوان ڤە و رێكخراوا (ئەی_ سی_ ئێف) یا فەرەنسی هەیڤانە كارتە ل سەر مە بەلاڤدكرن و ئەو كارتە ژی مە بۆ خۆ ل ماركێت و بازاری دمەزاختن بەرامبەر كەل وپەلێن خوارنێ و پێدڤیاتیێت رۆژانە یێن ژیانێ،بەلێ ل هەیڤا بۆری ڤێ رێكخراوێ ئەڤ كارتە نەدانە مە و گۆتە مە ناڤێن وە هاتینە دەرێخستن و هوون ئێدی ناوەرگرن ،لەورا مە هیڤییە چارەیەك ل مە بێتەكرن”.
ل دۆر ڤێ چەندێ،رێڤەبەرێ ناوچەدارییا رزگاری”سەروەر سەعید” گۆت:”ئەڤ خێزانێن ئاوارەیێن شنگالێ یێن ل دێرەبوونێ دئاكنجی ئەڤێن هاریكاری ژئالیێ رێكخراوان ڤە ل سەر وان هاتینە برین هەموو ژی ئەون یێن ل ناڤ ئەردەكی چاندنیێ دا دژین و خودانێن ئەردی ژی هاتینە نك مە و گازندەكرینە و دڤێت بێنە راكرن ژ وی جهی،نە بتنێ ئەو 70 خێزانێن دناڤ ئەردێ چاندنیێ دا دژین بەلكو هەموو ئاوارەیێن دناڤ خیڤەتان دا ل دەوروبەرێ دێرەبوونێ دژین دێ ئێنە راكرن،مە ئەڤ بابەت گەهاندیە پارێزگەهێ و بۆردێ كاروبارێن مرۆڤایەتی ل دەمەك نێزیك كەمپە دێ بۆ وان ئێنە دابینكرن و هەموو ئەو ئاوارەیێن دناڤ خیڤەت وكاڤلان دا دژین دێ ئێنە ڤەگوهاستن بۆ كەمپا ول وی دەمی هاریكاری و كەل وپەل ژئالیێ حكوومەتێ و رێكخراوان ڤە ب شێوەیەكێ رێكخستی و رێك وپێك دێ ل سەر وان ئێنە بەلاڤكرن”.
پشتی كارەساتا ب سەرێ ئێزدیان ل شنگالێ دا هاتی ل سەر دەستێ رێكخراوا تیرۆرستیا داعشێ،ب هەزاران خەلكێ وێ ئاوارەی دەڤەرێن جودایێن هەرێما كوردستانێ بوون،هەتا نۆكە نێزیكی 950 خێزانێن ئاوارەیێن شنگالێ ل ناڤ دێرەبوونێ و دەوروبەرێن وێ دناڤ خیڤەت و كاڤلان دا ژیانا خۆ دبۆرینن.
تُتاح هذه الصورة أيضا في: کوردی