د ئێک شەڤدا 37 لەشفرۆش ل ھەولێرێ ھاتنە دەستەسەر کرن
ئەڤرۆ نیوز:
ل ھەرێما کوردستانێ ب سەدان ئوتێل و مۆتێل و جھێن مەساجێ ھاتینە ڤەکرن و ل گورەی دووڤچوونەکا رۆژناما ئەڤرۆ دەرکەفتیە کو، پشکەک ژ وان جھان بۆ مەرەمێن نە ھەژی و لەشفرۆشیێ و ئەنجامدانا کریارێن سێکسی دھێنە بکار ئینان، بەرپرسەکێ حوکمەتێ ژی دبێژیت: ل ھندەک ئوتێل و جھێن مەساجێ حەبکێن سێکسی و مەلحەمێن پالدانا زەلاما بۆ کریارێن سێکسی ھەنە، وەلاتی ژی ئەڤێ چەندێ پشت ڕاست دکەن و چەندین جھێن لەشفرۆشیێ ب ناڤێن جودا ھەنە و مەترسینە بۆ بەلاڤبوونا نەخۆشیێن کوژەک.
سەعید خدر، گەنجەکێ باژێڕێ ھەولێرێ یە و بۆ رۆژناما ئەڤرۆ دبێژیت: (نوکە پتریا سەنتەرێن مەساجێ و ئوتێلێن مللی بۆ کارێن لەشفرۆشیێ دھێنە بکارئینان، ئەز بخوە چەندین جھێن لەشفرۆشیێ دزانم کو لژێر ناڤێ مەساجێ ھاتینە ڤەکرن، ب دیتنا من 70% جھێن مەساجێ جھێن لەشفرۆشیێ نە، پتریا وان کەسێن د چنێ ژی گەنجن و خەلکێ ئاسایی نە، چونکی بھایێ وان ژی یێ گونجایە و جھێن ئاسایی 50 ھزار دینارایە، ژبەرکو چ مۆلەتێن تایبەت یێن لەشفرۆشیێ نینن و چ مەرجێن ساخلەمی و قانوونی ژی تێدا نینن، ئەڤە ژی مەترسیە بۆ بەلاڤبوونا پەنجەشێرا ئیدزێ و چەندین نەخۆشیێن دی یێن کوژەک، چونکی ئەو ئافرەتێن دھێنە بکارئینان پتریا وان بیانی نە و خەلکێ رۆسیا و تورکیا و فلیپین و عەرەبن، و لەشفرۆش ل ھەموو سەنتەرێن باژێڕا ل قەزایێن ھەرێما کوردستانێ ھەنە).
سەعید گۆتژی: (ل ڤان سالێن دووماھیێ ئەڤ دیاردە زۆر بویە ھەتا دناڤ مالان ھەیە و خانی ھاتینە گرتن ب کرێ بۆ ڤێ مەرەمێ، ل کافتریا ژی ئەڤ کارە دھێتە کرن، ژبەرکو زۆر کافتریا ئافرەتێن لەشفرۆش کرینە گارسونێن خوە ھەتا بڤێ رێکێ خەلکی بخوە راکێشن و لەشفرۆشی بھێتە کرن).
گەنجەکێ دی بناڤێ ھەلکەفت دبێژیت: (حوکمەت بخوە ل گەل سەنتەرێن مەساجێ شریکە ھەکە شریک نەبیت بۆچی دەزگەھێن پەیوەندیدار رێگریێ ناکەن ل کارێ لەشفرۆشیێ؟ ئەو ھەموو ئافرەتێن لەشفرۆش یێن ھاتینە گرتن دێ ھەموویان ئازاد کەن و ئەڤ سەنتەر و ئوتێلە ژی دێ وەکی خوە کار کەن، ئەڤە ژی ھەموو بۆ ڤێ چەندێ ڤەدگەڕیت کو لایەنێن چاڤدێریێ دکەن د خەمسارن ھەمبەر بجە ئینانا قانوونێ، سەنتەر ھەنە نابێژیت جھێ لەشفرۆشیێ یە، دێ 50 دۆلاران ژ کریا مەساجێ ل کریاری وەرگریت و دەمێ ئەو کەسێ دچیتە ژۆرا مەساجێ ئەو ئافرەتا مەساجێ دکەت، دێ داخواز کەت سێکس ل گەلدا بھێتە کرن و دۆبارە ئافرەت ژی دێ پارەیەکێ دی ل ئەڤی کەسی وەرگریت).
ڤی گەنجی ئەو چەندە ژی نە ڤەشارت و گۆت: (ئەز بخوە ل دەرڤەی کوردستانێ بوویمە و ل ئورۆپا ل جھێن مەساجێ ب ھیچ شێوەیەکی لەشفرۆشی ناھێتە کرن، لێ سەنتەرەک نێزیک مالا مەیە ل کوردستانێ ھەر رۆژ ریکلامەکێ بەلاڤ دکەت و دبێژیت مە ئافرەتێن بەغدادی و تورک و کورد ھەنە، ئێ باشە مەساج تشتەکێ ساخلەمی یە و چ پەیوەندی پێڤە ھەیە کا ئەڤ کەسە خەلکا کیرێ یە ھەکە بۆ مەرەمێن خراپ نەبیت).
نەبەز عەبدولحەمید، قایمقامێ قەزا ناڤەندیا ھەولێرێ بۆ رۆژناما ئەڤرۆ گۆت: (ھژمارەکا زۆر یا وەلاتیان سکالایێن خوە ئیناینە قایمقامیا ھەولێرێ لدور ئەنجامدانا کارێن نە ھەژی ل سەنتەر و ئوتێل و کافتریا، لەوڕا مە ژی ب ھەڤکاریا ھێزێن ئەمنی دووڤچوون بۆ ڤێ پرسێ کریە و ب ھووری چاڤدێریا رەوشا ئەڤان سەنتەڕ و ئوتێلا کریە و ل دووماھیێ بو مە ژی خویا بو کو لبن ناڤێن ڤەکرنا سەنتەرێن مەساجێ کافتریا و ئوتێل بۆ مەرەمێن سێکسی و لەشفرۆشیێ دھێنە بکار ئینان، لەوڕا ھەوەک دەسپێکر و د ئەنجامدا ئەم شیاینە 37 ئافرەتا ب تۆمەتا لەشفرۆشیێ ل سەنتەرێ باژێڕێ ھەولێرێ دەستەسەر بکەین و ددەمێ پشکنینێ دا دەرکەفت ئەڤ جھە بۆ مەرەمێن لەشفرۆشیێ و سێکسی دھێنە بکارئینان، ھەتا ل دەمێ چونا ھێزێن پۆلیسا بۆ ھندەک سەنتەرا مژوولی ئەنجامدانا کریارا سێکسی بووینە و دەست ب سەر ھژمارەکا زۆر یا حەبکێن سێکسی و دەرمان و پێدڤیێن دی یێن تایبەت بڤێ چەندێ ھاتیە گرتن، راستە ژلایێ قانوونی و تەندروسی ئەڤان سەنتەرا مۆلەت ل حوکمەتێ وەرگرتیە و ل ھەموو جیھانێ ژی ئەڤ جھێن مەساجێ ھەنە، بەلێ ل ھندەک جھا بۆ لەشفرۆشیێ ھاتینە بکارئینان).
نەبەز عەبدولحەمید گۆتژی: (حەفت سەنتەر ھاتینە گرتن و پێداچوون دێ د مۆلەتێن وان دا ھێتە کرن، ھەوێن پۆلیسان ژی دێ د بەردەوام بن بۆ نەھێلانا ئەڤێ چەندێ و رێکێ نادەین ب چ شێوەیەکی لبن ناڤێ مەساجێ و لەشفرۆشی ل ئوتێل و سەنتەرا بھێتە کرن و ئەو ئافرەتێن ھاتینە گرتن ژی دێ ھێنە ھنارتن بۆ دەزگەھێن پەیوەندیدار ھەتا بھێنە دەرخستن ل کوردستانێ و بچنە وەلاتێن خوە، چونکی ھەموو ئافرەتێن ھاتینە دەستەسەر کرن خەلکێ دەرڤەی کوردستانێ بووینە، نوکە مە پلان ھەیە پێداچوون ب دانا مۆلەتێن سەنتەرێ مەساجێ دا بھێتە کرن و ھەر سەنتەرەکێ رووبەرێ وێ ژ 300 مەترا کێمتر بیت مۆلەتێ نادەینێ و ل داھاتی دا ژی بتنێ مۆلەتا مەساجێ دێ دەینە ئوتێلێن چوار ستێر و پێنج ستێر، چونکی دێ پتر ھێنە کۆنتڕۆلکرن و سەنتەرێن تایبەت ب مەساجێ نامینن.
تُتاح هذه الصورة أيضا في: کوردی