بنگەهێ لالش ل سەر ئاستێ كۆمەلگەها نێڤ دەولەتی و كوردستانێ رۆلەكێ كارا گێرایە
دەنگێ لالش،ئیڤان حەجی
دگەل دەربازبوونا 24سالان ل سەر دامەزراندنا دەستەیا بلندا بنگەهێ لالش یێ رەوشەنبیری و كۆمەلایەتی كو ئێكەمین دەزگەهە دماوێ بۆری دا ل سەر خزمەتا خۆ بەردەوامە،ئیرۆ ژی وەك بنگەهەكێ رەوشەنبیری و نشتیمانی و ئەكادیمی ل قادا نێڤ دەولەتی و هەرێما كوردستانێ دا كاریە ببتە پرەك دناڤبەرا خەلكێ و دەستهەلاتێ دا ب تایبەتی ژی بۆ ڤێ قۆناغێ رۆلەكێ گەلەكێ پیرۆز و كارا ل سەر ئاستێ كۆمەلگەها نێڤ دەولەتی و كوردستانێ گێرایە،كو بوویە مەلبەندەكێ رەوشەنبیری و جڤاكی بۆ ئێزدیان و هەر كوردەكی.
رۆژنامەڤان(حكیم حكمت) دیاركر،بنگەهێ لالش یێ رەوشنبیری وكومەلایەتی دەستەكەفتەكێ هەرە پیرۆزە بۆ كوردێن ئێزدی پشتی سەرهلدانێ هاتیە دامەزراندن ب ژمارەكا خەمخۆرا ئەڤ بنگەهە دامەزراندن، ئیرۆ ژی وەكی بنگەهەكێ رەوشەنبیری و نشتیمانی و ئەكادیمی ل قادا نێڤ دەولەتی و هەرێما كوردستانێ دا كاریە ببتە پرەك دناڤبەرا خەلكێ و دەستهەلاتێ دا ب تایبەتی ژی بۆ ڤێ قۆناغێ رۆلەكێ گەلەكێ پیرۆز و ئەكتیف ل سەر ئاستێ كۆمەلگەها نێڤ دەولەتی و كوردستانێ دا گێرا،هیڤیدارم بنگەهێ لالش ب تایبەتی ژی قوناغا پشتی نەمانا داعش ل ڤان دەڤەرێن كوردستانی وەك شنگال و باشیك و بارزان ب ئاوایەكێ باشتر بەرنامەیەكی پتر دوارێ هشیاریا نەتەوەیی دا خزمەتا خەلكێ ڤان دەڤەران بكت،بۆ هندێ پتر پەیاما نشتیمانی و پەیاما سەركەفتنا پێشمەرگەی بگەهنتە ڤان دەڤەرێن كوردستانێ.
مافپەروەر(سعود مستو)گۆت:هیڤیدارن دیدارێن رەوشنبیری و ئەكادیمی و زانستی ئەڤێن گرێدای ناڤچێن ئێزدیان تەوەرێن سەرەكی بن د كارو چالاكێن بنگەهێ لالش دا و پلانێن باش بێنە دانان كا چ هاتیە گۆتن و ببتە راپۆرتەكا تایبەت و بێتە بەلاڤەكرن و كار ل سەر بێتە كرن و نەكو تەنها بێنە ئەنجامدان،داخوازیا مە ئەوە بنگەهێ لالش ب ئەركێ خۆ رابتن و هەلبژارتن د دەمێ خۆ دا بێنە كرن و ئالیەتا وان ب شێوەیەكێ دنێ باشتر بێنە پێش و ئەم دخوازین ئەو گەنجێن خودان شیان و ئەكادیمی و ژێهاتی ژ ناڤ نفشێن نوو یێن ئێزدیان بەشداربن دڤی بنگەهی دا،دا بەرهەمەكی باش بێتە د رێزێدا داكو ئەو پرەنسیپێن بنگەهێ لالش ل سەر هاتیە ئاڤاكرن پتر زەنگین بت.
رەوشەنبیر و ئێك ژ دامەزرینەرێن بنگەهێ لالش(عزەدین سەلیم)دبێژت:بیرۆكا دامەزراندنا بنگەهەكێ رەوشەنبیری بۆ ئێزدیان د سەرێ مە هەموویان دابوو دسالین حەفتیان دا،بەلێ ژبەر حكومەتا بەعس مە نكاری ل دەمێ حكومەتا هەرێما كوردستانێ چێبوویی و كوردستان رزگاربووی مە دەنگێ خۆ گەهاندنە لایەنێن سیاسی و جهێن پەیوەندیدار ب ڤان كارا گەلەك ب باشی پێشوازیال مەكرن ل 12/5/1993 مە بنگەهێ لالش دامەزراند ل دهۆكێ،ئێك ژوان دامەزرێنەرا بووم مە پرۆگرامەك دانا بۆ ڤی بنگەهی ئێك ژوانا ئێك بوونا گۆتارا ئایینی یا ئێزدیان چ رۆژنامە یان گۆڤار یان بەلاڤۆك دەركەڤن یان سمینار بێنە گۆتن نە د جودابن ژ ئێك،داكو جێوازی دناڤبەرا ئێزدیان دا نەبت ژلایێ ئایینی ڤە یا دی ژی كۆمكرنا قەول و بەیتا و یا هەرەگرنگ ژلایێ نەتەوەی ڤە ئەم ئێك دەنگ بین ئەڤە ئارمانجا سەرەكی یا بنگەهێ لالش بوو،ژبلی پێناسا ئێزدیاتیێ ئەم بۆ خەلكەكی دیاربكن ب هەر رێیەكێ چ رۆژنامە یان گۆڤار یان هەر تشتەكی هەبتن و سوپاس ژی مە كاری ئەم ڤی كاری ب باشی ب رێڤە ببن و بنگەهێ لالش بوو مەلبەندەكێ رەوشەنبیری و جڤاكی بۆ ئێزدیان و هەر كوردەكی،دیسان مە پەرتوكخانەیەكا گەلەك زەنگین چێكر و كەلەپور و رێ ورسم و تێدا پاراست و بنگەهێ لالش رۆژ بۆ رۆژێ پێشكەفت حەفتیانە مە چالاكی ل دەڤەرێن ئێزدیان ئەنجام ددان و پەیوەندیێن مە گەلەك بهێز كەتن دگەل دەزگەهێن رەوشەنبیری و جڤاكی و سیاسی،هەروەسا بوو زمانێ ئایدولۆجی و بیرو باوەرێ ئێزدیان لەوما هەر نڤیسەرەك و ڤەكۆلەرەكێ هەبا قەستا لالشێ دكر و مفایەكێ باش ژێ دكر و تشتێ هەری گرنگ پرانیا قەول و تێكستێن ئێزدیان هاتنە كۆمكرن و بەلاڤەكرن،داخوازیا من ئەوە كا ل سەر چ شێوازی بنگەهی َ لالش هاتیە دامەزراندنە هەر ب وی شێوەی بێتە ب رێڤەبرن ب تایبەت د وارێ ئێكگرتنا گۆتارا ئایینی یا ئێزدیان ڤە راستە یا باش بووی بەلێ هێشتا دڤێت كار ل سەر بێتە كرن،ژبەركو هتا نۆكە مە چ پەرتۆكێن ئایینی یێن سەدا سەد دروست ل سەر ئێزدیاتیێ چێنەكرینە،ئەم بێژن ئەڤە تێكست و ئایدولۆجی و هزر و بیرو باوەریێن مە تێدا بن و دیسان ژی ئێكگرتنا گۆتارا نەتەوەی ژی كار ل سەر بكن دا ئەم هەموو ببنە ئێك هزر و بیرو باوەر و پێكڤە بێنە گرێدان.
بەرپرسێ لژنا رەوشەنبیری ل دەستەیا بلندا بنگەهێ لالش(شەمۆ قاسم)دیاركر،بنگەهێ لالش ئێك ژ بنگەهێ هەرێ سەرەكی یێ ب ئێزدیان ڤە گرێدایە و ئێكەمین دەزگەهە كو دڤێ ماوەیی دا پتر ژ 24سالی بكارت ل سەر خزمەتا خۆ بەردەوام بتن و ئەم سوزێ ددن كو بنگەهێ لالش هەر ل سەر وێ خەباتا خۆ بتن و بێ سەكناندن،تشتێ هەرە سەرەكی مە كاری بكن ئەو ناما بنگەهێ لالش ل سەر هاتیە ئاڤاكرن بگەهینن و ئەو ئارمانجێن هاتینە دانان ئەم بجه بینن و گەلەك ژوانا ژی مە بجه ئینانە ب هاریكاریا حكومەتا هەرێما كوردستانێ و خەلكێ مە،لەوما ئەز دكارم بێژم ئێكەمین دەزگەهە بكارت پەیوەندیێ و بەردەوامیێ بدەتە كارێ خۆ،چنكو پشتەڤانی ژلایێ مللەتی و حكومەتێ ڤە هەیە.
تُتاح هذه الصورة أيضا في: کوردی