ئەڤرۆ نیوز:
ل گوندێ سیدان ل ناحیا شێلادزێ یا سەر ب دەڤەرا ئامێدیێ ل سنوورێ پارێزگەھا دھۆک شکەفتەکا بچوک ھەیە کو ب ( کونە با ) دھێتە نیاسین ، د وەرزێ ھاڤینێ دا زێدەتری ھەشت پلەیێن سیلێزی ژ سپلێتێ سارتر و ھوون ترە و چەند دنیا گەرمترە ئەڤ کونە سارتر و ھوون ترە ، د بەرامبەر دا ل وەرزێ زستانێ ئەڤ کونە بایە گەلەک گەرمە.
دڤی واریدا “ئەیوب سیدانی ” وەلاتیەکێ گوندێ سیدان دیارکر کو چەند دنیا گەرم ترە ئەڤ کونە سار و ھوون ترە و بۆ ئەڤرۆ نیۆز گۆت: (ل گورەی وەرزێن سالێ ساراتی و ھووناتیا شکەفتێ ژی دھێتە گوھرین ، بەلێ ب رەنگەکێ گشتی د وەرزێ ھاڤینێ دا پلەیا ناڤا شکەفتێ کو ب کونە با دھێتە نیاسین دناڤبەرا شەش بو حەفت پلەیا سیلێزی دایە کو ئەڤ یەک ژی ھەشت پلەیان ژ سپلێتێ سارتر و ھوون ترە)
زێدەتر گۆت: (ل گورەی ئەوان زانیاریێن کو ژلایێ گوندیان ڤە ھاتینە زانین دبێژن ئاڤەکا بوش لژێر ئەڤێ شکەفتێ دچیتە خوارێ ، ژبلی ئەڤێ شکەفتێ ھندەک شکەفتێن دن ژی ل نێزیک ھەنە ب ھەمان شێوە سار و ھوونن ، و سالانە ھژمارەکا زۆر یا وەلاتیان قەستا ئەڤێ شکەفتێ دکەت ب مەرەما بوراندنا دەمەکێ خوش و سار و ھوون کرنا گیانێ خوە)
ئەڤ شکەفتە نێزیکێ پێنج میتران درێژە و مەترەکێ فرەیە و مەترو نیڤان ژی بلندە ،
“ئەقبال عومەر “وەکو گەشتیارەک سەرەدانا کونە بایێ کریە و بۆ ئەڤرۆ نیوز گۆت: ( ئەز لدوڤ ناڤ و دەنگیێن ئەڤێ شکەفتا ب ناڤ کونە با ھاتیمە و دبین مکو پلەیا وێ گەلەک سار و ھون ترە ژ سپلێتێی و ھەتا خوە دبیت پلەیا وێ بھێتە ژێر پێنج پلەیا سیلێزی کو ئەڤ یەک ژی زورە و لەشێ مرۆڤی ب تەمام سار دبیت ، بەلێ تشتێ نەخوش ئەوە ئەڤ شکەفتە گەلەک یا بەرتەنگە و ئەگەر لایەنێن شولەژێ پیچەک بەرفرەە بکە ندێ بیتە ئێک ژ جھێن گەشت و گوزار و خەلکەکێ زۆر قەستا ڤێرە کەتن ژبەرکو ھێشتا چوو جھێن گەشت و گوزاری لێ نەھاتینە درۆستکرن خەلکەکێ زۆر قەستا ڤێرە دکەت )
ژبەرکو ھەوایێ ساراتیا شکەفتێ بھێزە مرۆڤ ھەست ب لڤلڤینا سرۆشتێ ل رەخ و رویێن دەردورا شکەفتێ دکەت.
فەرھاد رەشید ئەو ژی وەلاتیەکێ دەڤەرا رێکانە دیارکر کو دکەڤن دا چوو تشت نەبوون ئەو بێھنا خوە بدەن بو رزگاربوون ژ گەرما ھاڤینێ و بۆ ئەڤرۆ نیوز گۆت: ( بەری نھا خەلکێ مە دشکەفتێ، مینا ئەڤی َکونە بایێ و روباران بێھنا خوە ددا ، و وەکو دیارە ئەڤ کونە بایە گەلەک سارە و چوو کەس ژی نکارن ژ ١٠ خولەکان زێدەتر بمینن دڤێ شکەفتێ ڤە ئەڤە زێدەباری کو ھەوایێ وێ ساخلەمە و بۆ تەندرۆستیا مرۆڤی گەلەک باشە)
ژبەرکو ھژمارەکا زۆر یا وەلاتیان قەستا شکەفتا کونە با دکەت ، ھندەک وەلاتێن دەڤەرێ ئەڤ یەک بخوە ب دەلیڤە دیتە بۆ فروتنا بەرھەمێن خوەیێن چاندنێ.
گوندێ سیدان ب دوراتیا ٣٠کم دکەڤیتە باکوورێ رۆژھەلاتێ ناحیا شێلادزێ ل سنوورێ قەزا ئامێدیێ ، سەرەکای کو دەڤەرەکا نە ئارامە ژبەر ھەبوونا بنگەە و بارەگایێن پەکەکێ و بوردومانا فروکێن تورکیا بەلێ دھەمان دەم دا رۆژانە نێزیکێ ٥٠٠ کەسان سەردانێ بو دکەن.