هەلبژارتنێن پەرلەمانێ عێراقێ برینێن ئێزدیان كورتر لێ كرن
ئەمین شەمۆ
هەلبژارتن پرۆسێسەكا دیموكراسی یە ل بەهرا پتریا وەلاتێن دیموكراسی و پێشكەفتی،بەلێ ژبۆی گەلێن رۆژهەلاتا ناڤین و ب تایبەتی كێمینەیان دەردەسەری و خۆلی سەری یە،پشتی وێ جینۆسایدا بسەرێ گەلێ ئێزدی هاتی ل(3/8/2014)ێ ئێزدیان ژی وەكو هەموو مللەتێن دی یێن عێراقێ هیڤی هەبوون هەلبژارتنێن پەرلەمانێ عێراقێ ب شێوەیەكی دادپەروەرانە بێنە كرن و دوور ژ توند و تیژیێ و ئەنجام دلخۆشكەربن و هەر چاوا بت چەند پەرلەمانتارێن ئێزدی یێن خودان شیان و وێرەك بگەهن پەرلەمانی داكو بكارن داكۆكیێ ل مافێ گەلەكی جینۆساید كری بكن و هەر چاوا بت هندەك ئێش و ئازارێن مللەتێ ئێزدی سڤك بكن.
پشتی ئەنجامێن هەلبژارتنان هاتین راگەهاندن هاوكێشە بەرۆڤاژی لێ هات و ئێزدیان هەست ب مەغدوریەكا مەزن كر و برینەكا دی ل دلێ جڤاكا ئێزدی دا ڤەبوو و بارێ دەروونی یێ خەلكێ مە تێكچۆ ب تایبەتی خەلكێ شنگالێ چنكو ژلایێ مێژووی ڤە ئێكەم جارە پشتی سالا(1947)ێ كو كەسەكی ژ دەڤەرا شنگالێ نەچتە پەرلەمانێ عێراقێ ئانكو پشتی(71) سالانە ئێكەم جارە شنگال بێتە بێ بەهركرن ژ پەرلەمانێ عێراقێ ئەڤە ژی جیێ پرسیارەكا مەزنە و جیێ نە رازیبوونێ یە ل نك خەلكێ شنگالێ ب ئێزدی و موسلمان و مەسیحی ڤە،هەردیسان ژلایێ جوگرافی ڤە ئەنجامێن ڤان هەلبژارتنان جڤاكا ئێزدی لسەر دوو بەشان هاتە دابەشكرن دەڤەرا شنگال كو چ كاندید ژێ دەرنەكەفتن بۆ پەرلەمانێ عێراقێ و دەڤەرا وەلات شێخ (باسكی شێخا) كو سێ كاندیدێن ئێزدی فرێكرنە پەرلەمانێ عێراقێ ئەڤەژی خالەكا گرنگە و جیێ ئاماژە پێ دانێ یە، دیسان ژلایێ دەروونی و سایكولۆجی ژی ڤە خەلكێ مە هەست دكت چ حساب ژبۆ دەنگێ وان نەهاتیە كرن و هاتینە پشتگۆهاڤێتن و بارێ دەروونی یێ وان تێكچوویە و هەتا رادەیەكی باوەری بڤێ پرۆسێسا هەلبژارتنان ژی نەمانە و ئەڤێ چەندێ ب (جینۆسایداهەلبژارتنان) ددەنە خویاكرن.
ژبەر ڤان خالێن مە دیاركرین ئەڤجا پێتڤیە لسەر سەركردایەتیا سیاسی یا كوردستانێ قەرەبوویا خەلكێ مە یێ ئێزدی بكن و ب تایبەتی ژی خەلكێ شنگالێ و هندەك پلە و پۆستێن دیتر بدەتە وان چ یێن كارگێری یان سەروەری یان سیاسی و حزبی بن و هەڤسەنگیەكێ دناڤبەرا دەڤەر و ناڤچەیێن ئێزدیان دا بكت،داكو برینەكا دیتر ل برینێن ئێزدیان زێدە نەبت.
تُتاح هذه الصورة أيضا في: کوردی