حەشدا شەعبی بۆ دووبارە جینۆسایدكرنا ئێزدیان هاتیە شنگالێ
تۆرا لالش یا راگەهاندنێ/رائد غانم
ژبەر هاتنا حەشدا شەعبی رەوشا شنگالێ ئالۆزبوویە و ئەرەبێن دەوروبەر یێن دەست دگەل داعش دا هەین ڤەگەریانە سەر جیێن خۆ ڤە،هەڤدەم هەبوونا هێزێن چەكدارێن بێ یاسا بوویە رێگر ل هەمبەر هەر تشتەكی ل شنگال دا بێتە كرن و گەر رێیا سحێلا دووبارە بێتە ڤەكرن رەنگە خێزانێن ماین جارەكا دی ڤەگەرنە كەمپان ڤە ل هەرێما كوردستانێ،قایمماقێ شنگالێ ژی ئاشكەراكر هاتنا حەشدێ بۆ دووبارەبوونا جینۆسایدا كوردێن ئێزدی یە و پلانا حكومەتا عێراقێ ئەوە جینۆسایدێ وندا بكن.
(شاكر مەحموود) ئاوارەیەكی شنگالێ یە گۆت:ئەو تشتێن ژبەر داعشێ ماین ل شنگالێ حەشدا شەعبی برن و كەس نكارت ڤەگەرت و هەموو كارێن خراب ئەنجام ددەن رێ هەموو ل خەلكێ شنگالێ گرتینە و ناهێلن هاتن و چۆنێ بكن و حەشد قەبوول ناكت رێ ل هەمبەر خەلكێ ڤەبن و چ رێزێ ل ئێزدیان ناگرن،دیسان ئەگەر رێیا سحیلا ڤەبت ژی جارەكا دی دێ ڤەگەرن ناڤ كەمپان ڤە و چ مفایی ناگەهیننە خەلكێ مە و هێشتا گوند و كۆمەلگەهێن باشوورێ چیایێ شنگالێ ژ مین و تەقەمەنیا نەهاتینە پاقژكرن و هەتا پێشمەرگە ڤەنەگەرتە شنگال ئەم ژی ڤەناگەرین.
رێڤەبەرێ ناوچەداریا سنوونێ(نایف سەیدۆ)ئاشكەراكر،هەر ل رۆژا رزگاركرنا شنگالێ دا وان ئالایێ كوردستان بلند كرن و دەرگەهێ ناوچەداریێ و رێڤەبەریێن دی ڤەكرن و كارێن خۆ بەردەوام كرن راستە تا رادەیەكی خزمەتكاری نەبوون لێ ژیان خۆش برێڤە دچۆ و سنوور ژی دپاراستی بوون پێشمەرگە ل وێدەرێ بوون ژ ئالیێ ئێمناهیێ ڤە هیچ ئاریشەك نەبوون،پشتی حەشدا شەعبی هاتیە شنگال رێڤەبەریا ناوچەداریێ ژی خۆ ژ سنوونێ ڤەكێشا و دەوام نەكرن،ژبەركو شنگال هاتە داگیركرن و لسەر خۆ قەبوول نەكرن ل بن ئالا داگیركرا دا بمینن ،گۆتژی وەختێ هێزێن پێشمەرگەی و ئالایێ كوردستانێ ل وێدەرێ نەبن ئەم نكارن ڤەگەرنە شنگال و جارەكا دی دەست ب كارێ خۆ بكەینە ڤە،ئەگەر رێیا سحێلا هاتبا ڤەكرن ئەو خێزانێن ل شنگالێ ژی ئاكنجی دیسا دێ جارەكا دی ڤەگەرن ناڤ كەمپان ل هەرێما كوردستانێ و سەرەرای گرتنا رێ ل هەمبەر خەلكێ ژمارەكا مەزن هاتینە ناڤ كەمپان و ژیانا خۆ دبەنە سەری.
قایممقامێ قەزا شنگال(مەحما خەلیل)دیاركر،هاتنا حەشدا شەعبی بۆ شنگالێ دووبارەبوونا جینۆسایدا كوردێن ئێزدی یە و پلانا حكومەتا عێراقێ ئەوە جینۆسایدێ وندا بكن و شنگال نەئێتە ئاڤاكرن و ژبەر هاتنا وان خەلك ڤەناگەرن،ژبەركو چ بنەمایێن یاسایی ل نك وان نینن و مەترسی لسەر ژیانا خەلكێ هەیە،حكومەتا فیدرالی چ تشت بۆ دەڤەرێ نەكریە و تەنها فتنێ دروست دكت،پشتی هاتنا حەشدا شەعبی بۆ دەشتا نەینەوا و ب تایبەت شنگال ئەو جینۆسایدەكا دی بوو،ئەم چاڤەرێ بوون ژیان ڤەگەرتە ڤە لێ بەغدا ئاستەنگیا دروست دكت،لەوا خەلك ڤەناگەرت و رێز ل وان نائێتە گرتن و مافێ وان یێ یاسایی و ئایینی و نەتەوی نینە دێ چاوا ڤەگەرن.
سەرۆكێ ئەنجوومەنێ قەزا شنگالێ(وەیس نایف)خویاكر،حكومەتا فیدرال پلان لدوڤ پلانێ ژبۆ تێكدانا رەوشا دەڤەرێ هەبوون داكو وێ پێكڤەژیانا ل شنگال هەی ژ ناڤ ببەن،نهۆ هاتنا حەشدا شەعبی رەوشا شنگالێ ژبەرێ ئالۆزتر كریە و ئەو ئەرەبێن دەوروبەرێن شنگالێ یێن دەستێ وان ل ناڤ داعشێ دا نهۆ یێ ڤەدگەرنە سەر جیێن خۆ و ئەگەر بڤی رەنگی بت خەلكێ شنگال نازڤرن ژبەر رۆژ بۆ رۆژێ رەوشا دەڤەرێ بەرەف خرابیێ ڤە دچت،دەم هات خەلكێ مە بزانت لسەر ئەردێ چ رووددەت هەر ژ رۆژا(3/8/2018)ێ هەتا ئیرۆ پلان لدوڤ پلانێ حكومەتا عێراقێ دژی خەلكێ شنگال رادبت و هەول ددەت ژێك جودا بكت و شنگالی وەلاتێ خۆ بهێلن و دەربەدەر ببن،گۆتژی ئەو كەسێ دەست درێژی لسەر ئاخا مە كری هیچ وەختی جیێ وی ل ناڤ مەدا نینە و ئەو كچ و ژنێن كەفتینە دەستێ داعشێ دا شەرەفا هەر شنگالیەكی ب شەرەفن،ژبەركو شەرەفا هەموو شنگالیا ئێكە و ئەردێ وان ئێكە،دەم هات ئەم رابن سەر خۆ و رێ ل وان كەسان بگرن ئەوێن بازرگانیێ ب شنگالێ دكن و جارەكا دی دەست ب ئاڤەدانیێ بكن و ئەگەر ناڤمالیا مە نەهاتە رێكخستن ژیان ڤەناگەرت و ئەڤ گرۆپێن چەكدار زێدەگاڤیا لسەر شنگالێ دكن و چوو مفایەكی ناگەهینێ.
سەرۆكێ فراكسێونا برایەتی وپێكڤەژیانێ ل ئەنجوومەنێ پارێزگەها نەینەوا(بەرەكات شەمۆ) بال كشاندە سەر ریگریكرنا ئاڤەدانكرنا شنگالێ و راگەهاند،هەبوونا وان هێزێن چەكدار یێن كو چ یاسا نینن بووینە رێگر ل هەمبەر هەر تشتەكی ل شنگال دا، لەوما دخوازین ئەو هێز شنگالێ چۆل بكن و رادەستی شنگالیا بكن،ئاشكەراكر ژی گەلەك پرۆژە لبەر دەست هەبوون ل شنگالێ ئەنجام بدەین لێ كەس نكارت دەست ب هەر پرۆژەیەكی بكت ژبەر هەبوونا حەشدا شەعبی و پەكەكێ،هەروەسا رێكخراوێن سڤیل و خێرخوازی ژی ژ ترسا وان گرۆپان دا نكارن خزمەتا خەلكێ شنگال بكن،داخواز دكەین قادا نێڤ دەولەتی ب چاڤەكی مەزنتر بەرێ خۆ بدەنە شنگال و گرنگیێ پێ بدەن دهەر بوارەكی دا.
تُتاح هذه الصورة أيضا في: کوردی