بنتاگۆن: هێزێن مه ژ عێراقێ ناهێنه ڤهكێشان
ئهڤرۆ نيوز:
رۆژنامهكا ئهمریكی بهلاڤكر، ئهمریكا یا بهرههڤیان دكهت بۆ ڤهكێشانا ههموو هێزێن خوه ئهوێن ل ئهفغانستانێ ماین كو دو هزار و 500 سهربازن ڤهكێشیت، د ههمان دهم دا وهزارهتا بهرگریا ئهمریكی راگههاند، د نوكه دا چ پلان نینن بۆ ڤهكێشانا هێزێن ئهمریكی ئهوێن ل عیراقێ ماین كو ئهوژی دو هزار و 500 سهربازن.
رۆژناما (ملیتاری تایمز) یا ئهمریكی د راپۆرتا خوه دا بهلاڤكر” دانوستاندن د ناڤبهرا وهزیرێ بهرگریا ئهمریكی (لوید ئۆستن) و فهرماندێ فهرماندهیا ناڤهندی یا هێزێن دهریایی (فرانك ماكنزی) ههبوون و ماكنزی راگههاند گو هێزێن وان و ههڤپشكێن وان ل ناتۆ دێ ل عیراقێ مینن بۆ ب دووماهی ئینانا شهری دژی داعشێ”.
وێ رۆژنامێ دیاركر ژی” سهرهرای ژناڤبرنا خیلافهتا داعشێ، راپۆرت ئاماژێ دكهن كو زێدهتر ژ 10 هزار چهكدارێن ههڤسۆز ل گهل داعشێ ههتا نوكه یێن ل عیراقێ و سووریێ ماین، بهلێ وی فهرماندێ ئهمریكی ئاشكراكر كو فشارێن گرۆپێن دژی ههبوونا هێزێن ئهمریكی ل عیراقێ یێن ههین بۆ خوهڤهكێشانا وان هێزان ژ عیراقێ”.
ژ لایێ خوهڤه وهزیرێ بهرگریا ئهمریكی د داخۆیانیهكێ دا ل بارهگایێ هێزێن ناتۆ ل بهلجیكا راگههاند بوو” هێزێن مه ئهركێ خوه ل ئهفغانستانێ بجهئینایه، بهلێ ل عیراقێ هندهك گرژی ههبوو ل دهستپێكا سالا 2020، دهمێ جڤاتا نوونهرێن عیراقێ دهنگ ل سهر دهركرنا هێزێن ئهمریكی ژ عیراقێ دای” دیاركر ژی” یا گرنگه ئهم بزانین كو حوكمهتا عیراقێ دخوازیت هێزێن مه ل وی وهلاتی بمینن، ههرچهنده دهلیڤه بۆ ههبوو ل سالا بۆری كو بریارا خوه ب ههلوهشینن، بهلێ ئهو ژ مه دخوازن ئهم بمینین، چونكه وان پێدڤی یا ب مه ههی بۆ بهردهوامبوونا شهری دژی داعشێ”.
وێ رۆژناما ئهمریكی بهلاڤكر ژی كو د نوكه دا ئیدارا سهرۆكێ ئهمریكی جو بایدن ههبوونا هێزێن ئهمریكی ل عیراقێ د ههلسهنگینیت و دبیت دێ هندهك رێنما و بریار ل پاشهرۆژێ ههبن ل دۆر ههبوونا هێزێن ئهمریكی ل عیراقێ.
تُتاح هذه الصورة أيضا في: کوردی