هەفت سال بسەر جینۆسایدا ئێزدیان دەرباز دبن
بەختیار قادر
جینۆسایدا شنگالێ ئەوا ل(3/8/2014)ێ ب سەرێ ئێزدیان دا هاتی لسەر دەستێ درندەترین رێكخراوا تیرۆری یا بناڤێ داعش،تاوانەك بوو ل دژی هەموو پرەنسیپ و پیڤەرێن مرۆڤایەتیێ ل جیهانێ، چنكو كرێترین تاوان دەرهەقی ئێزدیان هاتن ئەنجام دان بگرە ژ كوشتن و گرتن و دەربەدەری و ئاوارەی و كۆچبەری و تالانكرن و وێرانكرنێ،ئارمانج ژێ قركرن و سەپاندنا گهۆرینا ئاینی ب دارێ زۆرێ و نەهێلانا جڤاكا ئێزدی بوویە ژبەركو ئاینەك جیاواز بوویە ژ هزرا گەنی و توندرەویا داعشێن هۆڤانە، پشتی ژناڤبرنا ڤێ رێكخراوا تیرۆری و بۆرینا هەفت سالان بسەر جینۆسایدێ را مخابن ئێزدی هێشتا درەوشەكا نالەبار و پر ب زەحمەت دا دژین و رەوشا شنگال ژی بەرەف ئاقارەكێ نەدیار ڤە دچە.
ل رۆژا(3/8/2014)ێ كو دبە رۆژا رەش دەما رێكخراوا داعش یا تیرۆری هێرشی شنگال كری و دەست بسەر دەڤەرێ دا گرتی و تاوانێن ل دژی مرۆڤایەتیێ دەرهەقی خەلكێ شنگال ب تایبەت ئێزدیان ئەنجام دان، ل وێ هێرشا قرێژێن داعش دا ل رۆژێن دەستپێكێ ب دەهان وەلاتیێن بێ گۆنەه یێن ئێزدی یێن نكارین خۆ قورتال بكن هاتنە گولەبارانكرن و كوشتن دناڤ گۆڕێن بكۆم دا و ب هەزاران كچ و ژن و زارۆك و زەلام كەفتنە دناڤا دەستێ تیرۆرستان دا و ل قوتابخانان دا كچ و ژن و زەلام ژێكجوداكرن و دەستدرێژیا جەستەیی كرە سەر كچان و ژنان و كرین و فرۆتن ب وانا كر و بۆ چەندین جیان ڤەگوهاستن،هەروەسا بۆ قورتالكرنا گیانێ خۆ ب هەزاران خەلك ئاوارەی دەڤەرێن هەرێما كوردستانێ و پەنابەری وەلاتێن تووركیا و سووریا بوون و ب دەهان مەزارگەهێن پیرۆزێن ئێزدیان پەقاندن و مال و مولكێ خەلكێ تالان و وێرانكرن.
ئەڤە هەفت سال بسەر جینۆسایدا ئێزدیان را ل شنگال دەرباز دبن هێشتا چارەنڤیسێ ب هەزاران كچ و ژن و زارۆك و زەلامێن ئێزدی یێ دیار نینە و ب دەهان گۆڕێن بكۆم لبەر گەفێن ناڤچۆنێ نە و نەهاتینە هلدان و پرانیا مەزارگەهێن ئاینی نەهاتینە نووژەنكرن و ئاڤاكرن ڤە و ئاوارێن دەڤەرێ ژی دناڤا ژیانەكا پەریشان و دژوار و سەخت دا ل ناڤا كەمپان دا دژین و تیرۆرستێن ئەڤ كریار دژی ئێزدیان ئەنجام داین ل ئاستێ نێڤ دەولەتی نەهاتینە سزادان و پاشماوەیێن داعش ل دەڤەرێن جودایێن شنگالێ نەهاتینە راكرن،ئەڤ تاوانێن دژی ئێزدیان هاتینە كرن ب هەموو پیڤەرێن جیهانی جینۆسایدن و هەتا نهۆ ژلایێ چەندین وەلاتێن جیهانی ڤە دانپێدان بڤی كەیسی هاتیە دان و ب جینۆساید ناساندینە و ئەڤە پێنگاڤەكا هەرە گرنگ و دلخۆشبوویە كو تیرۆرستێن داعش و هەر كەسێ دەست لگەل دا هەی بگەهنە سزایێ خۆ.
ل ڤێ بیرەوەریا دلتەزین دە داخواز دكەین رەوشا شنگال ئاسایی ببت و هەموو هێز و گرۆپێن نەشەرعی ژێ بێنە دوورخستن و یاسا سەروەر بت و رێككەفتنا دناڤبەرا حكومەتا هەرێما كوردستانێ و عێراقێ دا بێتە بجهئینان، چنكو تاكە چارەسەری بجهئینانا وێ رێككەفتنێ و ڤەگەریانا هێزێن پێشمەرگەیێن كوردستانێ بۆ شنگالێ یە و هنگی ئیدارا شەرعی وێ بكارە دەست ب كاروبارێن خۆ بكت و ئاوارە ژی ڤەگەرنە سەر جی و وارێن خۆ ڤە و دووبارە دەست ب ژیانا خۆ یا ئاسایی بكن.
تُتاح هذه الصورة أيضا في: کوردی