خەلكێ شنگالێ ئێمناهی و ئاڤەدانی دڤێت!
عەمار خەلەف
هەفت سال بسەر كۆمكوژیا ئێزدیان دەربازبوون ئەو رۆژا رەش كو بسەر مللەتێ ئێزدی دا هاتی دڤێ رۆژێ دا زارۆك و پیر و گەنج هەموو پێكڤە ژ مالێن خۆ دەركەفتن و نەدزانی دێ بەرەف كوڤە چن!و بەرێ خۆ دەنە چیایی بتنێ ئەو ژی چیایێ شنگالا خۆراگر ل هەموو دەما،هەفت سال بۆرین جارەكا دی بیرهاتنێن رەش ل بیرا مە هاتن و خەم و برینێن دەیك و بابان نوو بوونەڤە.
ئەڤە هەفت سالن ژ ئاوارەبوونێ و بێ قیمەتیێ و حالێ مللەتی هەر ئەو حالێ بەرێ یە، و هێش خوشك و دەیكێن مە ل بن پەردا ترسێ و زولم و زۆرداریێ دانە د زیندانێن رێكخراوا تیرۆرستیا داعشێ دا،هەتا نهۆ چارەنڤیسێ ب هەزاران گرتیێن ئێزدی یێ دیار نینە و ب هەزاران زارۆك ئێتیم و سێوی بووینە،و هێش چاڤێن وان ل هەمبێزا دەیك و بابێ خۆنە و هێش چاڤێ وان ل چاڤەرێبوونەكا بێ مفایە، و پرسیارەك ل ڤر دئێتە پێش چاڤ ما گونەهێ ڤان زارۆكان چی بوو كو ئێتیم و سێوی ببن و گونەها وان چی بوو شەڤەكا زووی ژهەمبێزا دەیك و بابێن وان بێنە قوت كرن و ژخەوا شرین رابن! بوونە هەفت سال هێش چارەنڤیسێ مللەتێ مە یێ بەرزەیە و هێش هەستیكێن دەیك و خوشكێن مە ژ ئەردێ نەرابووینە، ل(3تەباخا 2014)ێ دەمێ كۆمەلكوژی بسەرێ ئێزدیان دا هاتی ل شنگالێ ژمارەیەكا مەزن ژ خەلكێ وێ دەڤەرێ دەربەدەری هەرێما كوردستانێ بوون و ل كەمپێن باشوورێ كوردستانێ ئاكنجی بوون و ژمارەیەك ژی ل چیایێ شنگالێ مان و بەرگری ژ ئاخ و كەرامەتا مللەتێ خۆ كرن و ب سەدان خورت و كەچێن مە هاتنە كوشتن و ب هەزاران ئێزدی چۆنە ژدەرڤەی وەلاتی،لێ بلا مرۆڤ نان و خۆیا خۆ حەرام نەكەت كو خەلكێ كوردستانێ ب گشتی و خەلكێ دهۆك و زاخۆ ب تایبەتی پێشوازیەكا بێ سنوور ل مللەتێ ئێزدی كرن و هەموو جۆرێن هاریكاریان بگرە ژ ئاهێن خوارنێ و كەلوپەلێن جۆرا و جۆر دانێ و هەتا دەرگەهێن مال و قوتابخانە و مزگەفتان بۆ مە ڤەكرن و ب هەموو شێوەیان هاریكاری ئارەستە كرن،هەكە ئەم ب شێوەیەكێ گشتی بەرێ خۆ بدەینە شنگالیان ئەوێن ل ناڤ كەمپێن ئاوارەبوونێ دا ژیانا خۆ دەرباز دكن ژیانا وان گەلەك یا خرابە و چارەنڤیسێ وان یێ دیار نینە و راستی گەلەك كێشەیێن جڤاكی دروست دبن و ژیانا ئاواران دناڤ كەمپان دا یە دژوارە.
هەكە ئەم بەرێ خۆ بدەینە وێ چەندێ بۆچی خەلكێ شنگالێ ناڤەگەرنە سەر مالێن خۆ یێن دناڤ كەمپان دا پشكەك ژوان دبێژن ئەگەرێن نەڤەگەریانە مە بۆ سەر مال و حالێ خۆ ل شنگالێ گەلەكن،ژوان ژی ژیان ل شنگالێ نینە! و چ خزمەتگۆزاریێن پێتڤی لێ نینن،د نۆكە دا ل شنگالێ گەلەك ئالیێن سیاسی و چەكداری هەنە ئەم ناڤەگەرن چنكو ئەو ئالیێن سیاسی یێن ل شنگال دبنە سەدەمێ نەڤەگەریانا مە،بێگۆمان گەلەك هێزین لەشكەری ل شنگال هەنە و هەر ئێك ژ ئالیێ خۆڤە دبێژن مە قوربانی داینە و خۆ ب خودانێ شنگالێ دبینن و هەر خەلك ژی یێ دەربەدەرە و ئەگەر ئەم بەرێ خۆ بدەینە ئەوێ رێككەفتنا دناڤبەرا هەولێر و بەغدا دا ئەوا ل سالا بۆری هاتیە ئیمزاكرن لسەر شنگالێ كو ژ نەه خالان پێك دهات ژوان خالان ژی دەرخستنا هێزێن چەكدار ژ وێ ناڤچەیێ و دابینكرنا خزمەتگۆزاریان و بەرقراركرنا ئێمناهیێ و ڤەگەراندنا خەلكێ وێ بۆ سەر جیێن وان لێ هەتا نۆكە چ ژ ئەڤان خالا نەهاتینە جێبەجێكرن و دڤێت هەردوو حكوومەت پێنگاڤێن رژدتر بهاڤێژن داكو خەلكێ شنگالێ ب گشتی و یێ دناڤ كەمپان دا ب تایبەتی ژڤان ململانێن سیاسی رزگار ببن و چارەنڤیسێ وان ئێكلاببت.
داخوازا خەلكێ شنگالێ هەردەم ئەو بوویە ئێمناهی بەرقرار بت و هێزەكا شەرعی ل دەڤەرێ بت و مالێن وان دووبارە بێنە نووژەنكرن دێ ڤەگەرنە سەر جی و وارگەهێن خۆ ڤە،هەروەسا ترسا خەلكێ ئەوە ژی بۆ ماوێ چەند سالێن دیتر ژی ل ناڤا ژیانا كەمپان دا بمینن.
تُتاح هذه الصورة أيضا في: کوردی