دەقێ راگەهاندنا سەرۆکاتیا هەرێما کوردستانێ
گاڤ نيوز:
کۆمبوونا هەرچار سەرۆکاتیێن هەرێما کوردستانێ ب دوماهی هاتە و سەرۆکاتیا هەرێمێ د راگەهاندنەکێ دا دیار کر: ئەڤرۆ رۆژا دوشەمبی 28-2-2022 ب سەرپەرشتیا نێچیرڤان بارزانی، سەرۆکێ هەرێما کوردستانێ هەرچار سەرۆکاتی، سەرۆکاتیا هەرێما کوردستانێ، پەرلەمانێ کوردستانێ، حکومەتا هەرێما کوردستانێ و جڤاتا دادوەری یا هەرێما کوردستانێ ل سەرۆکاتیا هەرێما کوردستانێ کۆم بوون.
د کۆمبوونێ دا دانوستاندن ل سەر بریارا دادگەها فیدرالا ئیراقێ یا رێکەفتی 15-2-2022 دەربارەی یاساسیا نەفت و غازێ یا هەرێما کوردستانێ هاتە کرن. د ڤێ دەربارێ دا کۆمبوونێ دوپاتی ل سەر وێ یەکێ کر کو بریارا دادگەها بلندا فیدرالا ئیراقێ جهێ قەبویلکرنێ نینە و هەرێما کوردستانێ دێ ل سەر کارپێکرنێ ب مافێن خۆ یێن دەستووری بەردەوام بیت و ب چ رەنگان دەستان ژ ماف و دەستهەلاتێن خۆ یێن دەستووری بەرنادەت و هەمی رێکێن یاسایی و دەستووری بۆ پاراستنا ماف و دەستهەلاتێن هەرێما کوردستانێ دێ گریتە بەر، ژبەر ڤان ئەگەرێن ل خوارێ:
1- بریارا داگەها بلندا فیدرال دەق و گیان و بنەمایێن دروست یێن سیستەمێ فیدرالن و بنپێکاریەکا زیق و ئاشکرا یا ماف و دەستهەلاتێن دەستووری یێن هەرێما کوردستانێ یە.
2- بریارا داگەهێ ب رەنگەکێ نەئێکسەر بجهئینانا نەدەستووری یا دەستووری یە، ژبەر کو بوویە ئەگەرێ ژێوەرگرتنا دەستهەلاتەکا دەستووری یا هەرێمان و دانا وان ب دەستهەلاتا فیدرال کو ئەڤەژی ل گەل دەستهەلاتێن دادگەها فیدرال ناگونجیت و پەشێمانبوونە ژ سیستەمێ فیدرالی.
3- دادگەهێ د بریارا خۆ دا پشت ب یاسایێن سالێن 1976 و 1985ێ یێن ئیراقێ بەستیە کو یاسایێن ناڤەندی نە و ل گەل بنەمایێن دەستوورێ نوی یێ ئیراقێ یێ سالا 2005ێ هەڤدژن کو سیستەمێ حکومەتا ئیراقێ ژ ناڤەندی بوویە سیستەمەکێ فیدرال و ب ئاشکرایی دەستهەلاتێن هەرێم و پارێزگەهان و دەستهەلاتێن فیدرال هاتینە دابەشکرن.
4- هەرێما کوردستانێ وەسا دبینیت کو ئەڤ بریارە ژبلی بنپێکرنا دەستووری و سیستەمێ فیدرالە، د هەمان دەم دا وەسا دبینیت کو مەرەمێن تایبەت ل پشت هەنە و بێلایەن نینە، ب تایبەت کو ئیراق د رەوشەکا گەلەک هەستیار و ئالۆزا سیاسی دا دەرباز دبیت و لایەنێن سیاسی مژویلی دانوستاندنانن داکو ل سەر دیتنا چارەیەکێ بۆ دەرکەفتنێ ژ ڤێ رەوشا سیاسی بگەڕن، ئەڤ بریارە دێ رەوشێ ئالۆزتر کەت.
5- ئەم دوپات دکەین گرێبەستێن نەفتی یێن هەرێما کوردستانێ ب پشتبەستن ب یاسایا نەفت و غازێ یا هەرێما کوردستانێ و دەقێ ماددەیێ (112) یێ دەستوورێ ئیراقێ هاتینە کرن، ئەڤە د دەمەکی دایە دەستهەلاتێن فیدرال پشتی بۆرینا (17) سالان نەشیاینە ئەرکێ خۆ یێ یاسایی ب دانانا یاسایەکێ بۆ نەفت و غازێ بجهـ بینن، زێدەباری دەستپێشخەریێن هەرێما کوردستانێ ل سالا 2007ێ و پەشێمانبوونا حکومەتا فیدرالا وی دەمی ژ وی رەشنڤیسێ هەڤپشک یێ یاسایا نەفت و غازێ یێ رێککەفتن ل سەر هاتیە کرن.
6- ئەم ب گرنگ دزانین دادگەها بلند یا فیدرال یاسایەکا نوی ل گۆرەی حوکمێن ماددەیێ (92) یێ دەستووری دەربێخیت و ئەرکێن وێ ل گۆرەی دەستووری بجهـ بینیت، هەروەسا هەموو سازیێن دەستووری ل گۆرەی دەستووری یاسا بۆ بهێنە دەرکرن و دان کو ئەو یاسا گەرەنتیا بجهئینانا سیستەمێ فیدرالی نە.
د ڤێ دەربارێ دا، سەرۆکاتیا هەرێما کوردستانێ ل گەل هەموو لایەنێن سیاسی یێن ناڤخۆیا هەرێما کوردستانێ و ئیراقێ و جڤاکا نێڤدەولەتی بۆ گرتنەبەرا هەر رێکارەکێ بۆ بەڕەڤانیکرنێ ژ مافێن دەستووری یێن هەرێما کوردستانێ، دێ بەردەوام بیت. هەروەسا پەڕلەمانێ کوردستانێ دێ رێکارێن یاسایی و دەستووری یێن پێدڤی گریتە بەر و جڤاتا دادوەری یا هەرێما کوردستانێ ژ پێگەهێ خۆ یێ دەستووری ڤە دێ ل گەل ناڤەندێن دادوەریێن ئیراقێ بەردەوام بیت بۆ دوپاتیکرنێ ل دەستووریبوونا مافێن هەرێما کوردستانێ.
حکومەتا هەرێما کوردستانێ ژی وەک هەردەم ل سەر بنەمایێ دەستووری بۆ چارەکرنا کێشەیان ئامادەیە و دێ ل سەر دانوستاندنێن ئاڤاکەر ل گەل حکومەتا فیدرال، دوستێن ئیراقێ و جڤاکا نێڤدەولەتی بەردەوام بیت و پشتەڤانیێ ل سەر چارەکرنا کێشەیان ل گۆرەی بنەمایێن دەستووری کەت.
تُتاح هذه الصورة أيضا في: کوردی