وه‌زیرا كار: كرێكار ژبه‌ر گه‌فێن خودان كاران نه‌وێرن ل دادگههێ باخڤن
گاڤ نیوز
وه‌زیرا كار د رۆژا جیهانیا كرێكاران دا راگه‌هاند، ئه‌گه‌ر گه‌نج بزانیت مافێ وى ل كه‌رتێ تایبه‌ت ژى وه‌ك كه‌رتێ گشتى مسۆگه‌ره دێ ل وى كه‌رتى كار كه‌ت و ئاشكراكر، كرێكار ژبه‌ر گه‌فێن خودان كاران دترسن ل دادگههێ باخڤن.
كوێستان محه‌مه‌د، وه‌زیرا كار و كاروبارێن كۆمه‌لایه‌تى یا حكومه‌تا هه‌رێما كوردستانێ گۆت: ل هه‌رێما كوردستانێ 16 هزار كۆمپانى و 123 هزار كرێكار هاتینه ده‌سته‌به‌ركرن و ئه‌گه‌ر گه‌نج بزانیت مافێ وى ل كه‌رتێ تایبه‌ت ژى وه‌ك كه‌رتێ گشتى مسۆگه‌ره دێ ل وى كه‌رتى كار كه‌ت.
وەزیرا کار دوپاتكر، ره‌شنڤێسه‌كێ قانوونا كارى هاتیه ئاماده‌كرن و ل ڤێ مه‌هێ دێ بۆ جڤاتا وه‌زیران هێته ره‌وانه‌كرن.
كوێستان محه‌مه‌د دیاركر، قانوونا ده‌سته‌به‌را خانه‌نشینێ و كۆمه‌لایه‌تى ژى هاتینه ئاماده‌كرن و بۆ وه‌زاره‌تان هاتینه ره‌وانه‌كرن و پشتى جه‌ژنێ دێ كه‌ڤیته د به‌رنامه‌یێ كارى دا و دێ بۆ په‌ڕله‌مانێ كوردستانێ هێته ره‌وانه‌كرن.
ل دۆر كرێكارێن بیانى ژى گۆت: رێنمایێن ئینانا كرێكارێن بیانى هاتینه ئاماده‌كرن و بۆ سنۆرداركرنا ئینانا كرێكارێن بیانى بۆ وێ یه‌كێ زێده‌تر ده‌لیڤه‌یا كرێكارێ خۆمالى بهێته ره‌خساندن.
گۆتژى: نوكه پاره‌یێ سندۆقا خانه‌نشینیێ گه‌هشتیه 900 ملیا دینار و بڤێ یه‌كێ ژماره‌یا كرێكاران و كۆمپانیانێن هاتینه ده‌سته‌به‌ركرن زێده‌بوویه.
وه‌زیرا كار ئاشكراكر، هه‌ر كرێكاره‌كێ كێشه ل گه‌ل خودان كارێ خۆ هه‌بیت دشێت په‌یوه‌ندیێ ب هێلا گه‌رم یا 5500 بكه‌ت و ئه‌گه‌ر خودان كار نه‌هاته رایێ دێ بۆ دادگههێ هێته ره‌وانه‌كرن.
هه‌روه‌سا ئاشكراكر، 11 هزار و 850 خودان پێدڤیێن تایبه‌ت ل هه‌رێما كوردستانێ هه‌نه و پشتى جه‌ژنێ ژ ئالیێ لژنه‌یه‌كا تایبه‌ت یا پشكنینان یا نۆشدارى دێ هێن پشتراستكرن كو خودان پێدڤیێن تایبه‌تن و پاشى لیست دێ بۆ جڤاتا وه‌زیران هێته ره‌وانه‌كرن.
كویستان محه‌مه‌د ل دۆر په‌یوه‌ندیێن وان و سه‌ندیكایان دبێژیت: مۆرا حزباتیێ ب سه‌ندیكایێن كرێكاران ڤه دیاره و تا نوكه وان ل گه‌ل وه‌زاره‌تێ ئێك نه‌گرتى یه، ل ده‌مه‌كى جڤاته‌كا كارگێرى هه‌یه و هه‌یڤانه كۆم دبیت.
ئاشكراكر ژى پتریا كرێكاران ناهێنه دادگههێ گۆتنێن خۆ پێشكێش بكه‌ن و د ترسن ژ كارى بهێنه دویرخستن ب ئه‌گه‌را گه‌فێن خودانكاران و هه‌ر ئالیه‌كێ وه‌زاره‌تێ دابیته دادگههێ وه‌زاره‌ت سەرکەفتی بوویه، لێ ب ئه‌گه‌را كێمیا دادوه‌ران و سستیا كارێ دادگههێ ئێكلاكرنا دۆسیان ب سستى ب رێڤه دچیت.
ل دوماهى دیدارا خۆ كو فه‌رمانگه‌ها میدیا و زانیارى یا حكومه‌تا هه‌رێما كوردستانێ ل گه‌ل وه‌زیرا كار، كوێستان محه‌مه‌د كریه دبێژیت: ل هه‌ر جهه‌كى بنپێكارى همبه‌رى كرێكارى هاته‌كرن دێ به‌ره‌ڤانیێ ژ مافێن وى كه‌ین.
تُتاح هذه الصورة أيضا في: کوردی