ئەگەرێن كۆچكرنا گەنجێن ئێزدی؟
ناسر شەهوانی
ئێزدی ئێك ژ كەڤنترین و رەسەنترین مللەتێن عێراقێ یە،ئەڤ مللەتە چاڤەرێ بوو كو ئێدی جارەكا دن زولم و زۆرداری و شەر و فەرمان ل سەر وان نەمینن و مرۆڤ ب شێوازێن توندرەو نائێنە كوشتن و دایك و باب و خوشك و برا ب زۆری ژ هەڤدوو نەئێنە ڤەقەتاندن،كچ و دایك ب زۆری ل بازاران نەئێنە فرۆتن، و ئێدی هەموو مرۆڤ وەكو مرۆڤ بێنە قەبوولكرن بێی بەرچاڤ وەرگرتنا جوداهیێن ئۆلی،مەزهەبی،نەتەوەیی،رەگەزی،رەنگی،ئاین و جڤاكی…هتد،لێ ئەوا دهاتە چاڤەرێكرن هەموو بوو خەون و وژدانا مرۆڤایەتیێ نەهاتە لڤاندن كو ل رۆژا 3/8/20014 رێكخراوا داعش یا تیرۆری ب شێوەیەكی درندانە و دوور ژ كریارێن مرۆڤایەتیێ هێرشی سەر دەڤەرا شنگالێ كر و مەزنترین تاوانێن دژی مرۆڤایەتیێ ل دژی ئێزدیان ئەنجام دان،كو ژ ئەنجامێن وێ هێرشێ ب هەزارێن كچ و ژن و زارۆك هاتنە گرتن و ل بازاران كرین و فرۆتن ب وان هاتە كرن و ب سەدان كەس بوونە قوربانی و ب دەهان گۆڕێن ب كۆم هاتنە دروستكرن ژ خەلكێ سڤیل.
ئەڤە هەشت سال ل سەر جینۆسایدا ئێزدیێن شنگالێ دەربازبوون و هەتا نۆكە پاشەڕۆژا خەلكێ شنگالێ نەدیارە و هێشتا جینۆسایدا ئێزدیان یا بەردەوامە ب هەزارێن ئێزدیان ئاوارەنە و ژیانا خۆ ل بن خیڤەتێن ئاوارەبوونێ دا دبۆرینن د رەوشەكا سەخت و دژوار و نەخۆش دانە و چ ماف بۆ وان نەهاتیە دابینكرن،لەوما حەزا خەلكێ مە بەرەف كۆچبەریێ دچت و ب بۆرینا وەختی ڕێژا كۆچبەریێ زێدە دبت،ژبەر گەلەك ئەگەران گەنجێن ئێزدی كۆچبەر و دەربەدەری وەلاتێن جیهانێ دبن، هندەك ژوان ژی ڤەدگەرت ژبەر بارودۆخێن سەخت و دژوار و فەرمان و جینۆساید و گرنگی پێنەدان و پشتـگۆه هاڤێتنا خەلكی و ب تایبەتی گەنجان كو رێژەیەكا زۆر ژوان خودان باوەرنامێن باشن و كەسێن زانستی نە لێ پووتە پێ نائێتەدان و د بێكارن.
هەروەسا نەبوونا خزمەتگۆزاریان و پرۆژێن كەرتێ تایبەت و نەبوونا دەلیڤێن كاری و گرانیا بازاری ئەڤێ چەندێ ژی كارتێكرن ل سەر هزرێن گەنجان كریە كو بەرەف وەلاتێن بیانی و جیهانێ كۆچ بكن ئەو ژی ب ڕێیێن نایاسایی و زەحمەت و مەترسیدار داكو ژڤێ ژیانا سەخت و دژوار یا ل وەلاتێ خۆ دبۆرینن رزگار ببن و بەرەف وەلاتێن باشتر و خۆشتر هەرن و جیێ ب ترس و هەژار و دژوار ل پشت خۆ بهێلن،بێگۆمان ئەڤ چەندە ژی وەسا بۆ مە دیار دكت كو ل عێراقێ مەترسیەك ل سەر نەمانا ئێزدیان هەیە ژبەركو دەمێ هەر مللەتەكی ئاخ و جوگرافیەت و زمانێ خۆ بجهـ هێلان ئەو مللەت دێ هێدی هێدی بەرەف كێمبوونێ و نەمانێ ڤە چت،لێ سەرەرای ئاوارەبوون و كۆچبەری و دەربەدەریێ و كوشتنێ و زۆرداریێ و تەعریب كرن و دەردەسەریێ، ئێزدی هەر ماینە و دێ مینن مللەتەكێ رەسەن و گرێدایی ئۆل و ئاخا خۆ و خەونێن تیرۆرستان و هاریكاریێن وان نائێنە بجهئینان.
تُتاح هذه الصورة أيضا في: کوردی