ڕێڤەبەرا كاروبارێن ڕزگاربوویان:ڕزگاربوویێن ژ دەستێ داعش ل دەرڤەی وەلاتی ژی بن دێ هەیڤانە مووچەی وەرگرن
تۆرا لالش:
هێشتا ئێش و ئازارێن كچ و ژنێن ڕزگاربوویێن ژ دەستێ تیرۆرستێن داعش ل كەمپان و ژ دەرڤەی كەمپان د بەردەوامن و وگەلەك ژ وان دژیانەكا سەخت و دژوار دا دژین و تووشی نەخۆشیێن دەروونی بووینە و نەهاتینە چارەسەركرن،هەڤدەم ڕێڤەبەریا كاروبارێن ڕزگاربوویان دبێژت:ماستر كارد بۆ 354 ڕزگاربوویان دێ ئێتە چێكرن و هەیڤانە دێ مووچەی بسەر واندا بەلاڤ كەین،ئەڤجا چ ل عێراقێ بژین یان ژی ژ دەرڤەی وەلاتی.
ڕزگاربوویا دەستێ داعش(ملكیا سالح) بۆ دەنگێ لالش دیاركر،ب ڕاستی جیێ داخێ یە پشتی بۆرینا هەشت ساڵان ب سەر جینۆسایدا ئێزدیان ل سەر دەستێ ڕێكخراوا داعش یا تیرۆری ل(3/8/2014) هەتا نۆكە ئێش و ئازارێن ڕزگاربوویێن ژ دەستێ تیرۆرستێن داعش د بەردەوامن و گەلەك ژوان كچێن ڕزگاربووین ب شێوەیەكی باش و رژد ژلایێ ساخلەمیێ ڤە نەهاتینە چارەسەركرن،ب مخابنی ڤە هەتا ئیرۆ ڕۆژ ڕەوشا هندەكان ژێ گەلەك یا سەخت و دژوارە و ئاریشێن وان د بەردەوامن وگەلەك ژوان تووشی نەخۆشیێن دەروونی بووینە و نەهاتینە چارەسەركرن،ئەڤ چەندە ژی بۆ گرنگی پێنەدانێ دزڤرت ژلایێ ڕێكخراوێن مافێ مرۆڤی و جیێن شۆلەژێ ڤە،هەر دیسان پێتڤیێن ڕزگاربوویان زێدە دبن لەوران پێتڤیە پووتە ب داخوازیێن وان بێتەدان و بێنە قەرەبووكرن،چنكو پتریا وان پێتڤی ب هاریكاریێ نە ،ئەڤجا چ هاریكاریا مادی بت یان یا مەعنەوی.
هەروەسا(ئەحلام قاسم)ئێك ژ ڕزگاربوویێن ژ دەستێ تیرۆرستێن داعش بۆ دەنگێ لالش گۆت:ب شێوەیەكی گشتی ڕزگاربوویان پێتڤی ب ژیانەكا باش و ئارام و سروشتی هەیە و ل بن چاڤدێریەكا ساخلەم دابن،داكو ئەو زوڵم و زۆرداریا ل وان هاتیەكرن ژبیر بكەن،لێ سەرەڕایی ڕەوشا وان یا سەخت و ب زەحمەت و تووشی نەخۆشیێن لەشی و دەروونی و ساخلەمی دبن هاتینە پشتگوه هاڤێتن ژلایێ حكومەتا عێراقێ و سەرجەم ڕِێكخراوێن مرۆڤایەتی و سازیێن نەحكومی ڤە،هەتا نۆكە گەلەك ژوان كچێن ڕزگاربووین ل ناڤ كەمپان دا دژین و نەهاتینە چارەسەركرن و ڕەوشا وان گەلەك یا سەخت و دژوارە و ئاریشێن وان دبەردەوامن،ئەڤ چەندە ژی بوویە جیێ دلگرانی و نەخۆشیێ بۆ ماڵ و خێزانێن وان و كارتێكرنەكا مەزن ل سەر ساخلەمیا وان بوویە و ل جەم وان بوویە ئەگەرێ پەیدابوونا ئاریشێن دەروونی،داخوازێ ژ حكومەتا عێراقێ و كوردستانێ و جڤاكێ نێڤ دەوڵەتی و ڕێكخراوێن مرۆڤایەتی دكەین گرتیێن ئێزدی یێن هێشتا ل بن دەستێ تیرۆرستێن داعش ماین رزگار بكەن، ب زووترین دەم هاریكاریا كچێن رزگاربووی بكەن داكو بێنە قەرەبووكرن ئەوژی ژلایێ ماددی و مەعنەوی ڤە،هەروەسا پێتڤیە بلەز چارەسەریا وان بێتە كرن داكو جارەكا دی خۆ دناڤ جڤاكێ ئێزدیان دا بگونجینن و د ژیانەكا خۆش و ئارام دا بژین.
ڕێڤەبەرا ڕێڤەبەریا كاروبارێن ڕزگاربوویێن ژ دەستێ داعش(سەراب ئلیاس) بۆ دەنگێ لالش ئاشكەراكر، بێگۆمان مانا ڕزگاربوویان بۆ دەمەكێ وەسا درێژ و د رەوشەكا سەخت و دژوار یا دناڤ كەمپان دا دێ ئاریشێن دەروونی و ساخلەمیێ ل جەم وان چێبن،ڕۆلێ حكومەت و ڕێكخراوان د ڤان سالێن بۆری دا بەرامبەر ئێش و ئازار و نەخۆشیێن رزگاربوویان ل كێمیێ دایە،لێ پشتی یاسایا ڕزگاربوویان (قانون الناجیات) ل ساڵا 2021 هاتیە پەسەندكرن، مە ژی وەكو ڕێڤەبەریا كاروبارێن ڕزگاربوویان كاریە خۆ ل وان بكەینە خودان و هاریكاریا پتر ژ 400 ڕزگاربوویان بكەین،ژوانژی دەرخستنا بەلگەنامە و ڕەگەزنامە و كێماسیێن كەلوپەلێن دیتر وەك پێنگاڤەكا دەستپێكی،پشتی بەرهەڤكرن و ڕێنمایێن یاسایی دێ ئێنە پەسەندكرن و قەرەبووكرن ئەوژی ژلایێ ماددی و مەعنەوی ڤە و دێ ماستەر كارد بۆ وان ئێنە چێكرن و ئەو كەسێن دكەڤنە ناڤ ئەڤێ یاسایی دا ئەو ژن و كچێن رزگاربووی یێن ئێزدی و توركمان و مەسیحی و شەبەك و دیسا زارۆكێن ل بن 18 سالیێ و زەلامێن ڕزگاربووی ژ كۆمكووژیان بن،هەتا نۆكە بڕیار هاتیە دان كو ماستر كارد ژ 354 كەسان را بێتە دەرئێخستن،هەروەسا 123 كەسان ژی ماستر كارد وەرگرتینە و ب شێوەیەكی فەرمی هەیڤانە دێ مووچەی بۆ وان دابەش كەین و ئەڤ پرۆسە بۆ ڕزگاربوویان یا بەردەوامە،ئەڤجا چ ل عێراقێ دا بژین یان ژی ژ دەرڤەی وەلاتی،هەر دیسان ل سەر پێشكێشكرنا هاریكاریان ب مەرەما گونجاندنا وان ل ناڤ جڤاكی دا ئەم دێ دبەردەوام بین،ئەڤ چەندە ژی پێنگاڤەكا گەلەكا گرنگە و دێ ئاریشە و پێتڤیێن وان د پاشەرۆژێ دا چارەسەر و جێبەجێكەین.
تُتاح هذه الصورة أيضا في: کوردی