تۆرا لالش
ب هەلکەفتا سالڕۆژا رۆژنامەگەریا کوردی، ئیرۆ رۆژا سێ شەمبوویێ رێکەفتی (22/ 4/ 2025) بنگەهێ لالش تایێ باعەدرێ و ئامادەیا باعەدرێ سمینارەک بۆ نڤیسەر و رۆناکبیر(سەبری سلێڤانەی) سازکر ل دۆر (کاریگەریا میدیایا سەردەم ل سەر گەنجان) ل هۆلا ئامادەیا باعەدرێ یا تێکەل ب ئامادەبوونا سەرۆکێ دەستەیا بلندا بنگەهێ لالش و شاندێ دگەل دا و بەرپرسێ لیژنا ناوچا باعەدرێ (نجیم الیاس) و شاندێ دگەل ودام و دەزگەهێن حکومی و حزبی ل باعەدرێ و مێهڤان و مامۆستا و قوتابیێن ئامادەیێ.
پشتی چەندەک وەک رێزگرتن بۆ شەهیدێن بزاڤا ڕزگاری خوازا گەلێ کورد سەرکێشێ وان بارزانیێ نەمر سمینارێ دەستپێکێر.
پشتی ناساندنا کورتیەکا ژیانا نڤیسەری ژلایێ سەرۆکێ دەستەیا بلند ڕێزدار (سەعید جردۆ) بۆ ئامادەبوویان، نڤیسەری رۆناهی ئێخستە رۆلێ میدیایا سەردەم وەک ئالاڤەک ژبۆ گەهاندنا پەیاما ڕاست و دروست بۆ جەماوەری ، هەروەها ب تیر و تەسەلی کاریگەریا وێ ل سەر هەموو جڤاکی ب تایبەت تەخا گەنجان بەحسکر، دیسان دناڤا ئاخفتنێن خۆ یێن بالکێش ئاماژە دا چەندین پرس و بابەتێن گرنگ و بالکێش ل دۆر کاکلکا بابەتی.
ل داویێ دەرفەتا دان ستاندنێ بۆ ئامادەبوویان ژلایێ بەرپرسێ بنگەهێ لالش باعەدرێ(م. خلات باعەدری) هاتە دان، کو د ئەنجامدا چەندین پرسیار، و دان ستاندن و مژارەکا ڤەکری و بەرهەمدار دناڤبەرا سمیناربێژی و ئامادەبوویان دروست بوو.
هەژی گوتنێ یە ئەڤ سالڕۆژە ژلایێ ئەڤان دەزگەهێن میدیا ڤە هاتە رۆمالکرن (k24 / کوردستان تیڤی / سەما تیڤی /دهۆک تیڤی /ڕادیۆیا شێخان/ روداو ).
تُتاح هذه الصورة أيضا في: کوردی
