تۆرا لالش
ب هەلکەفتا یۆبیلا زێڕین یا شۆڕەشا گولانێ و ل ژێر دروشمێ (چیایێ شنگالێ هەر دێ مینت مەلبەندێ مێرخاس و عەگیدێن شۆرەشا گولانێ) بنگەهێ لالش تایێ باعەدرێ ب هەڤکاری دگەل لیژنا ناوچا باعەدرێ یا پارتی دیموکراتی کوردستان سمینارەک بۆ سەرۆکێ دەستەیا بلندا بنگەهێ لالش بەڕێز (سعيد جردو) رێکخست ل دۆر بابەتێ (ڕۆلێ قارەمانەنەیێ دەڤەرا شنگالێ د شۆرەشا گولانێ دە) ل باخچێ هۆلا باعەدرێ یا بیرەوەریا.
ڕێ و رەسمێن سمینارێ ب رێڤەچوون ب ئامادەبوونا ژمارەکا بەرپرسێن حکومی و حزبی و جەماوەری ل باعەدرێ و دەڤەرێ و پێشمەرگەه و مالباتێن شەهیدێن شۆرەشا گولانێ و کەسایەتیێن جڤاکی و رەوشنبیری و موختار و مامۆستا و تەخ و پێکهاتێن جودا یێن باعەدرێ و دەڤەرێ.
پشتی چەندەکێ ڕاوەستیان وەک رێزگرتن بۆ شەهیدێن بزاڤا ڕزگاری خوازا گەلێ کورد سەروەرێ وان بارزانیێ نەمر ،بەرپرسێ بنگەهێ لالش باعەدرێ بەڕێز (خلات باعەدری) بخێرهاتنا هەموو ئامادەبوویان کر و بەحسا ڤێ هێڤاریا رەوشەنبیری کر و گرنگیا سمینارێ دا رۆنکرن .
پاشی سمیناربێژی ب پیرۆزباهی کرنا یوبیلا زێڕین ل پێشمەرگەه و مالباتێن شەهیدا دەستپێکر و رۆناهی ئێخستە سەر چەند خالێن گرنگ مینا ئەگەرێن سەرهەلدانا شۆرەشا گولانێ و سیاسەتا رژێما ژناڤچوویی ب خراپکرنا گوندان و تاخان ل شنگالێ و دەربەدەرکرنا خەلکی و کۆمەلگەهێن زۆرەملی و حجزکرنا مولک و ئەملکێن پێشمەرگەهان یێن هۆز و هەردوو ئاینان، زێدەباری قەدەغەکرنا زمانێ کوردی دگەل زیانگەهاندنێ ب ژێدەرێن ئاڤێ یێن جوتیاران و گهۆرینا دیمۆگرافی و….
هەروەها د تەوەرەکێ دیتر دا بەڕێز ( سعيد جردو) تەکەز لسەر ڕۆلێ پێشمەرگەهێن شۆرەشا گولانێ کر پشتی سالا 1975 و بەردەوامیا رێکخستن و رێکخراوێن نهێنی و پشتەڤانیا پارتی دیموکراتی کوردستان ب سەرکردایەتیا سەرۆک بارزانی بۆ پێشمەرگەهێن شۆرەشێ هەروەها کارێ پارتایەتی و رولێ مالبات وئوجاغێن شنگال د پشتەڤانی و گەهاندنا هاریکاریان ژبۆ پێشمەرگەهان ،ئەڤە و چەندین رۆنکرن و زانیاریێن زێدەترل دۆر ناڤەرۆکا بابەتی بۆ ئامادەبوویان بەحسکرن.
ل داویێ دان و ستاندنەکا گەرم و گۆڕ لدۆر بابەتی سمینارێ دروست بوو ب چەندین پرسیار و رۆنکرن و بەرسڤدانا ژلایێ ئامادەبوویان و سمینار بێژی ڤە.
تُتاح هذه الصورة أيضا في: کوردی