تۆرا لالش
ئاڤەدانییا هەر وەلاتەکی پێشکەفتی ب پشتەڤانی و پالپشتیا گەلێن شارستانی و کەسایەتێن دلسۆز دەستپێکریە و هەموو هەول کەڤتینە کار پێخەمەت هەبوون و دروستکرنا جڤاکێن رەوشەنبیر و ژیر و زانا داکو هەڤرکیەکا زانستی دگەل ئەوان گەلێن شارەزا و سەرکەڤتی بکەن و شانازیێ ب پێشکەڤتنا وەلاتێ خۆ ببەن وەکو هەر وەلاتەکی خودان سەربۆر ل سەرانسەری جیهانێ.
بێ گومان پێنگاڤا هەرە گرنگ یا ئاڤەدانییا هەر وەلاتەکی ژ بیر و باوەریێن مکوم یێن کەسایەتی و رێبەرێن دلسۆز و خودان ئەختوباری د بوارێ سەرکێشیا گەل و وەلاتی دا هاتیە و پێشکەڤتنا تەڤایا جڤاکێن ساخلەم ژ هێزا سەرکردایەتیەکا دادپەروەرانە و گێرانا دەستهەلاتەکا بێ جوداهی و سەرکەڤتی دەستپێکریە و بزاڤەکا ب هێز پێخەمەت دانانا بنیاتەکا گەش بۆ نفشێن پاشەرۆژێ کریە.
کوردستان ژی ئێک ژ ئەوان وەلاتان بوویە، کو پشتی داوی پێ هاتنا قوناغا داگیرکرنێ و رزگاربوونا گەلێ وێ ژ نەهامەت و تەپەسەریا رژێمێن زۆردار و هەولدان بۆ دەستپێکا ژیانەکا ئازاد و خۆ بەرهەڤکرن بۆ ئاڤەدانییا جڤاکەکی سەردەم و شارستانی و دامەزراندنا دام و دەزگەهێن فەرمی ژ بۆ خزمەتا گەلێ خۆ و پێگیربوون ب سەروەریا یاسایی و کار کرنەکا دلسۆز بۆ پێشڤەچوونا وەلاتەکی پێشکەڤتی.
ئەو بوو پشتی سەرهلدانا پیرۆز و ئازادیا وەلاتی، ئێکرێزیا گەلێ کوردستانێ و پاراستنا دەستکەفت و بەرژەوەندیێن وێ یێن گشتی بوونە ئارمانجا تەڤایا هێز و ئالیێن سیاسی و رێککەڤتن دناڤبەرا وان دا ل سەر برێڤەبرنا کاروبارێن هەرێمێ ژ هەموو بواران ڤە هاتە کرن و دگەل ئێک پشکداری د چەندین کابینەیێن حوکمەتێ دا کرن.
گەلەک جاران ململانێ دناڤبەرا هێزێن سیاسی یێن کوردستانی کو پشکدار د حوکمەتێ دا ژ ئەگەرێ دەست تێوەردانا خەلکەکی بیانی پەیدادبوویە، هەروەها گەلەک ئاریشە و ئاستەنگیێن مەزن ژلایێ حوکمەتا فیدرال یا عیراقێ ڤە ژی دروست بووینە نەخاسمە کێشەیێن دارایی و مەرەم ژێ بابەتەکی سیاسی بوویە، و ئەڤ چەندە بوویە ئەگەرێ لاوازیەکا مەترسیدار ژ بۆ تێکچوونا رەوشا جڤاکی و دیسان کارتێکرنەکا نەرێنی ل سەر پێشڤەچۆنا ئاڤەدانییا وەلاتی ژ هەموو ئالیێن ژیان ڤە کریە.
لێ سەرەرایی ئەڤێ چەندێ ژی و بتایبەت پشتی دەست بکاربوونا کابینا نەهێ یا حوکمەتا کوردستانێ کو ب سەرپەرشتیا بەرێز مەسرور بارزانی هاتیە دامەزراندن رۆلەکی گرنگ گێرایە و هەر ژ دەستپێکێ ئاراستەیێن توند و رێگریەکا مەزن ل گەلەک کارێن نەرەوا کریە کو د هاتنە کرن و سنوور ژ بۆ هەر زێدەگاڤیەکێ هاتینە دانان و برێڤەبرنا کارێ دام و دەزگەهێن حوکمەتێ هاتینە رێکخستن و پێگیری کرن ب بنەمایێن یاسایی بوویە بریارەکا ڤەبر و ئاڤەدانییا وەلاتی ژ هەموو ئالیان ڤە ب هێز دەست پێکریە و پرۆژەیێن گرنگ هاتینە ئەنجامدان و دەرگەهێن ژیانەکا ئارام ژ بۆ تەڤایا خەلکێ کوردستانێ هاتینە ڤەکرن و وەلاتێ مە ژی کەڤتیە هەڤرکیێ د بوارێ شارستانیەتێ دا ل دەڤەرێ وەکو هەر وەلاتەکی پێشکەڤتی.
ئەڤە و سەرەرایی ئەوان هەول و بزاڤێن خرابکار کو چەند کەس و لایەنێن تێکدەر یێن کو بووینە کرێکارێن نەیارێن گەلێ کوردستانێ و پێخەمەت نەهێلانا ئارامیێ ل وەلاتی و راوەستیانا ئەڤێ ئاڤەدانی و پێشکەڤتنا سەردەمی کو ل سەردەستێ ئەندازیارێ ئاڤەدانییا کوردستانێ بەرێز مەسرور بارزانی هاتیە پێش و مللەتێ مە پێ سەرفەراز بوویی و خەونێن وان هاتینە بنئاخکرن و کابینا نەهێ بوویە ناسناڤێ ئاڤەدانییا وەلاتی و جهێ دلخۆشیا تەڤایا خەلکێ کوردستانێ.
ئیدریس زۆزانی
دهۆك ١٥ی تیرمەهێ ٢٠٢٦ێ
تُتاح هذه الصورة أيضا في: کوردی