تۆرا لالش
ئبرۆ پێتڤیە جڤاکێ کوردی بێ ترس ژ خۆ بپرسە راگەهاندن وان بەرەڤ کیدەرێ ڤە دچت؟ ئەرێ ئەو راگەهاندنا هەی خزمەتا خەلکی و جڤاکێ کوردی دکەت؟ ئەرێ ئەرکێ خۆ یێ دروست جێبەجێکریە؟ جهێ راگەهاندن ببە دەنگێ خەلکێ و گازندەیان بگەهینتە جهێن پەیوەندیدا و ئاخا پیرۆزا کوردستانێ بپارێزە، مۆرالا خەلکی ژبۆ وەلاتێ وان بلند بکەت یا بوویە ئامرازەک بۆ شەرێ سیاسى، بەرژەوەندیێن حزبی و شکاندنا هەستێن مالباتێن شەهیدان و پێشمەرگەهان.
خەلکێ کوردستانێ ب درێژاهیا دیرۆکێ پێخەمەت پاراستنا جڤاک، داب و نەریت، کەرامەت، ئاخا خۆ بەرەڤانی کرینە، ب هزاران گەنجان خۆ دایە شەهیدکرن د سەنگەرێن پێشیێ دا, لێ ئیرۆ راگەهاندنا کوردی گەلەک زەحمەترە ژ وی شەرێ بەری نهۆ دهاتە کرن دگەل کوردان.
ژ ئالیەکی ڤە راگەهاندنا ئۆپۆزیسیۆن دەستکەفت و پرۆژێن حکومەتێ ب شێوەیەکێ خراب نیشان ددەت و هەموان دکەتە ئاریشە، هەول ددەت حکومەتێ پێش چاڤێن خەلکێ رەش بکەت، ژ ئالیەکی دیتر ڤە راگەهاندنا پرۆفیشنال بێ هیچ بنەمایەکێ مرۆڤایەتى و ئەخلاقی ل پێش کارێ خۆ دانە هەر بابەتەکێ هەبت دروست دکەت ژبۆ دەستڤەئینانا لایک و کومێنتان، دبتە ئەگەرێ شکاندنا هەستێن خێزانێن شەهیدان و پێشمەرگان برینەکا دیتر ل دلێ واندا دروست دکەت.
راگەهاندنا جوگرافی، کارێ خۆ تنێ سنوردار کریە، بێ هیچ پيشەیەک یان سەر یاسا و برەنسیپێن راگەهاندنێ کار بکەت، کارێ خوە کریە مەلاقی ژبۆ دەست ڤە ئینانە بەرژەوەندیا خۆیا تاکی، بەشەکێ مەزن یێ جڤاکى ژبیر کریە، یا ژ هەموویان نەخۆشتر راگەهاندنا دەسهەلات و حکومەتێ یە، خوە ب بەلاڤکرنا بابەتێن بێ بەها مژوولکریە. لێ د راستی و واقعێ نهۆ تێدا دژین هەموو تشت نابنە هەوال، و هەموو هەوال ژى نابنە دەستکەفت. ئەگەر راگەهاندن ب راستى بکارە کارێ حکومەتێ بکەت، خزمەتگوزارى و پرۆژەیان ب شێوەیەکێ روهن و پێشەیی بگەهینت ئەڤە باشترین کارە ژبۆ حکومەت و خەلکێ.
راگەهاندنا کلاسیک ژى پێدڤى ب نوو بوونێ هەیە خۆ دگەل واقعێ نهۆ بگونجینە. ژبەرکو هەکە راگەهاندن دگەل گوهۆرینێن جڤاکى و تەکنەلۆجیایێ نەگهۆرن، دگەل دەمى
خەلک دێ دوور کەڤت. دهەمان دەمدا، راگەهاندنا ئاینى دڤێت گەلەک یا هشیار بت، بەلێ مخابن ئاین ژی بوویە ئامرازەکێ سیاسى، بابەتێن ئایینى ب شێوەیەکێ وەسا بەلاڤ دکەن کو قەدرێ ئاینى و پیرۆزیێن جڤاکى کێم دکەن، ب کارئینانا سوشیال میدیایێ تاک ژى بوویە بەشەکێ گرنگ ژ ژیانا مە یا رۆژانە لێ دگەل مفایێن وێ، بوویە ئەگەرەکێ سەرەکی ژبۆ زێدەبوونا بێرێزیێ، شکاندنا کەرامەتا خەلکی هتد… سەندیکا رۆژنامەنڤیسێن کوردستانێ سەر ڤان هەمی بابەتان بێ دەنگە رۆژ ب رۆژ توند و تیژی دناڤ جڤاکێ کوردیدا بەلاڤ دبت.
تُتاح هذه الصورة أيضا في: کوردی