دەست ب هلدانا گۆڕێن بكۆم یێن خێزانا دای شەمێ هاتە كرن
باسنيوز:
قایمقامێ قەزا شنگال بۆ (باسنیوز) دیار كر، دەست ب ڤەكرنا گۆرێن بكۆم یێن قوربانیێن خێزانا دای شەمێ ل شنگال هاتەكرن كو ل سالا 2014ێ ژلایێ تیرۆرستێن داعش ڤە خێزانا دای شەمێ هاتیە گولەبارانكرن و ناڤ گۆرێن بكۆمدا هاتینە ڤەشارتن.
مەحما خەلیل، قایمقامێ قەزا شنگال بۆ (باسنیوز) راگەهاند كو: “ل سەر داخوازیا دای شمی قوربانیێن جینوسایدا شنگال كو هەموو ئەندامێن مالباتا وێ هاتینە گرتن و رەڤاندن ژلایێ تیرۆرستێن داعش ڤە سالا 2014ێ گەلەك جاران دای شمی داخواز كر گۆرێن بكۆم بهێنە ڤەكرن و هەستیێن زارۆكێن خۆ راكەت ببەت ناڤ گۆرستانێ دا ڤەشێرت ل سەر داخوازیا دای شمی دەست ب ڤەكرنا گۆرێن بكۆم یێن خێزانا دای شمی ل شنگال هاتیە كرن. نوكە دەزگەهێ شەهیدان دگەل نوژداریا داد یا عێراقێ قەستا شنگال كرینە بۆ ڤەكرنا گۆرێن بكۆم”.
قایمقامێ قەزا شنگال، ئەوژی ئاشكەرا كر كو: “گۆرا قوربانیێن خێزانا دای شمی كەڤتیە دۆریانا تل عزێر ناڤبەرا شنگال و شلۆ، ئەو جه یێ خێزانێن ئێزدیان تێدا هاتینە رەڤاندن و بێ سەروشینكرن وپێدڤی بوو زووتر ئەڤ گۆرێن بكۆم بهێنە ڤەكرن چونكو هەموو بەلگەنا بۆ جینوسایدا شنگال وپێدڤیە مافێن قوربانیان نەهێتە بەرزەكرن”.
مەحما خەلیل، ئەوژی گۆت: “پتر ژ 30 كەسان ژ مالباتا دای شمی بووینە قوربانی ل جینوسایدا شنگال گەلەك ژی ناڤ گۆرێن بكۆمدا هاتینە كوشتن. هەردەم دای شمی داخواز كر روفاتێن قوربانیێن خێزانا وێ ناڤ گۆرێن بكۆم بهێنە دەرئێخستن. ئەڤە داخوازیا ڤێ دایكا ئێزدی یە لەورا نوكە دەست بكارێ دەرخستنا روفاتێن خێزانا دای شمی هاتە كرن داكو هەموو بهێنە دەرخستن ل گۆرستانێ بهێنە ڤەشارتن”.
ناڤهاتی ئەوژی گۆت: “جهێ دلخۆشیا مەیە ئومید وداخوازیا دایكەكا ئێزدی بهێتە بجه ئێنان. ئەڤە چەندین سال بوون دای شمی داخواز دكر گۆرێن بكۆم بهێنە ڤەكرن. ئەم داخوازێ ژ دەزگەهێن شەهیدان دكەین ولیژنێن ڤەكرنا گۆرێن بكۆم دەست ب ڤەكرنا هەموو گۆرێن بكۆم ناڤ شنگالێ دا بكەن هەموو ببنە بەلگەنامە بۆ جینوسایدا شنگال وكەس و كارێن قوربانیێن ژی بهێنە قەرەبوو كرن و تیرۆرست بهێنە سزادان”.
ل جینوسایدا شنگال 82 گۆرێن بكۆم هاتینە چێكرن ژلایێ تیرۆرستێن داعش ڤە ناڤ ڤان گۆرێن بكۆمدا ئێزدی هاتینە گولەبارانكرن هەتا ژی ل گوندێ كۆچۆ گۆرێن بكۆم یێن هاتینە ڤەكرن. هێشتا پتریا گۆرێن بكۆم ل شنگال ماینە نەهاتینە ڤەكرن. دقوناغا ئێكێدا 104 روفات هاتنە رادەستكرن بۆ كەس و كارێن قوربانیان نوكە ژی دهێتە چاڤەرێكرن هەیڤا بهێت قوناغا دویێ دا روفاتێن 41 قوربانیێن ناڤ گۆرێن بكۆمدا بهێنە رادەستكرن بۆ كەس و كارێن وان. دێ ل گوندێ كۆچۆ هێنە ڤەشارتن وهێشتا روفاتێن گەلەك قوربانیێن جینوسایدا شنگال ناڤ گۆرێن بكۆمدا ماینە نەهاتینە دەرئێخستن”.
ل سالا 2014ێ تیرۆرستێن داعش هێرشی سەر شنگال كرن پتر 360 هزار ئاوارەبوون قەستا هەرێما كوردستانێ كرن هەتا ئەڤرۆكە ژی پتریا ئاوارێن شنگال ناڤ كەمپان وخانیێن هەیكەلدا ماینە نەشیاینە بزڤرنە شنگال هەروەسا ژی پتر ژ شەش هزار كچ وژن و زارۆكێن ئێزدی هاتنە گرتن و رەڤاندن هەتا نوكە ژی بتنێ حكومەتا هەرێما كوردستانێ پشتەڤانی ل رزگاركرنا رەڤاندیێن ئێزدی كریە ب پشتەڤانیا نڤیسینگەها رزگاركرنا رەڤاندیێن ئێزدی پتر ژ سێ هزار و 500 كەس ژ هەردوو رەگەزان رزگار بووینە.
تُتاح هذه الصورة أيضا في: کوردی
