ئێزدیان كچ و ژنێن خودان شیان هەنە پۆستێن كارگێری وەرگرن
تۆرا لالش:
بەرپرسا ناڤەندا ئافرەتان ل كۆمەلگەها خانكێ دیاركر،ئیرۆ دناڤا جڤاكا ئێزدیان دا كچ و ژنێن خودان شیان هەنە دكارن پۆستێن كارگێری وەرگرن و ب رێڤەببەن، بەلێ پلەیێن ئافرەتێن ئێزدی د زۆر نینن،هەتا نۆكە چ ئافرەتێن ئێزدی وەكو رێڤەبەر نەهاتینە دانان.
ل دۆر رەوشا كچ و ژنێن ئێزدی(دەولەت دۆمان) بەرپرسا ناڤەندا ئافرەتان ل كۆمەلگەها خانكێ بۆ رۆژناما دەنگێ لالش دیاركر،هەموو ئەو ئاریشێن بۆ مە دئێن ژلایێ هەڤژینان ڤەنە و ئاریشێن كچان هەكە هەبن ژی گەلەك د كێمن، رێگریێن هەمبەر ژنێ د جڤاكی دا ب رەنگەكێ گشتی بەرەف كێمبوونێ ڤەچووینە و وەكی بەرێ نەماینە،بتنێ هندەك رێگریێن ئاینی تێ نەبن،بەلێ ب شێوەیەكێ گشتی هندەك حالەت ژی یێن هەین بۆ نموونە ئەگەر ژنەكێ ب ڤێت بگەهتە پۆستەكی دێ بنەمال و جڤاك دا بنە رێگر،پێتڤی یە كچ و ژن د ئازادبن و رێگری دگەل وان نەئێنەكرن ژبەركو دێ بتریا وان د پاراستی بن ژ وان كچ یان ژنا بێهنا وێ د خانی ڤە تەنگكرن،گەلەك جاران كچا ئێزدی ژبەر گۆتنێن خەلكی نكاری یە كار بكت نەكو خەلك بەحسێ وێ ب نەرێنی بكت و بگەهتە وی رادەی كارتێكرنێ ل شووكرنا وێ ژی بكت.
هەروەسا گۆت:رەوشا ژنا ئێزدی ژلایێ كارگێری ڤە هەتا رادەیەكی یا باشە،بەلێ ژنا ئێزدی هێشتا وەكو پێتڤی پلە و پۆست ل جیێن بلند وەرنەگرتینە و گەلەك جاران رێگری ل هەمبەر هاتیەكرن بتنێ بۆ خۆ كاندیدكرنێ د هەلبژارتنان تێ نەبت،ب رەنگەكێ تایبەت هەكە زەلامەكێ ئێزدی پۆستەكێ مەزن ل دهۆكێ وەرگرت ئەگەر ژنا ئێزدی چەند شیان هەبن نكارت وی پۆستی وەرگرت دێ جڤاك بێژت ژنە،مە كچ و ژنێن خودان شیان هەنە دكارن پۆستان ب رێڤەببەن،بەلێ پلەیێن ئافرەتێن ئێزدی د زۆر نینن،هەتا نۆكە چ ئافرەتێن ئێزدی وەكو رێڤەبەر ل دهۆكێ نەهاتینە دانان.
دەولەت دۆمان ئاماژە ب وێ چەندێ دا ئافرەت د نۆكەدا زۆر ئازاد و خودان شیانن،چنكو دایك و باب ژی پشتەڤانن و یا گرنگ بۆ ئافرەتێ كو بگەهتە ئارمانج و هیڤێن خۆ،دڤێت پشتەڤانێن سەرەكی دایك و باب بن.
تُتاح هذه الصورة أيضا في: کوردی
