هێرشا داعش و كارتێكرنا جڤاكی ل سەر شنگالێ
حەجی مغسو حسو
شەهید:
هەلبەت مرۆڤ لسەر دین وخاك وشەرف وناموسا خۆ شەهید دبت وشنگالیێن ئێزدی ب هزاران لسەر دەستێ رێكخراوا تیروریا داعش هاتنە شەهید كرن،داعش پشتی زالبوون لسەر خاك وگەلەك حەشار گەهێن ئارتێشا سوری كرن نووتری، چەك وتەقەمەنی وتانك وتوپ ومدرعاتێن دژی قازیفێن درع بڕ ب دەست خۆڤە ئانین و ب وان چەكێن قورس هێرش كرنە سەر پێشمەرگەهێن ل شنگالێ ب تایبەت ل (گر عزێر و سیبا شێخدر و گر زەرك)ب هاریكاریا عەرەب وكورمانجێن خائین بەرگیری هاتە كرن ژ لایێ مێر خاسێن شنگالیا وپێشمەرگەی ڤە،لێ مخابن چەكێن د دەستێن وان دا دلاوازبوون بەرامبەری چەكێن د دەستێن تیرۆرستان دا لەورا نەشیان بەرگیریێ بكەن ب سەدەهان گەنج و زەلامێن شەر كەر شەهیدبوون ل سەنگەران ومدەرعاتا دا سەر لەشێن وان جهێن خۆ بەرنەدان هەتانی شەهیدبوون، پشتی داعش دەست دانایە سەر گوندان ب سەدان پیر و گەنج و زاروك وئافرەت سەر ژێكرن وكوشتن وگەلك برن هاتنە ڤەشارتن ب گوڕێن كوم وەك گوندێ كۆچۆ، ڤان تاوانا كارتێرنەكا مەزن ل ناخێ مرۆڤێ ئێزدی كر دەمێ خێزان بێ باب یان دەیك یان خویشك وبرا دمینن ئەو خێزانە دێ بێ بەهر بیت ژ لایەنێن سەوزی وبابینیێ ودایكینیێ وبێ سەمیان هەلبەت دێ بیتە خێزانەكا ژێك ڤەبووی وئەوێن دی ماین ژ خێزانێ دی بی خوی وخودان مینن ژ لایێ كۆمەلایەتی دێ جڤاكەك پەیدابیت جڤاكەكی ژێك ڤەبووی وكارتێكرنا وێ دمینیت دەمەكی درێژ وناهێتە قەرەبوونكرن لدویف پیڤەر و بەهایێن كۆمەلایەتی یێن بەربەلاڤ.
بی ژن و ئێتیم:
ل شەر وشورا و پشتی وان ژی ئاسەوار وئەنجام ل قادێ دیار دبن بوو نموونە شەرێ عێراقێ وئیرانێ هەشت سالا ڤەكێشا ول پشت خۆ بتر ژ (ئێك ملیۆن)شەهید و ئێخسیر وهندابووی وئێتم وبی ژن ژ جۆرێن ژیێ جۆرا وجۆر وهەتا نهۆ ژی ئاریشێن وان نەهاتنە چارە سەركرن ژلایێن جووت بوونێ وملك ومای و ئاریشێن جڤاكی كارتێكرنا وێ یا نەرێنی هەیە لسەر جڤاكێ عێراقێ ب گشتی. هێرشا درندیا داعش ب هەزاران خێزان و زارۆك و ژن وئێتیم مان بێ كەس وكار وب سەدان چارەرەنڤیسێ وان نەیێ دیارە ئەڤ گشت پێتڤی هاریكاریێ و خودانكرنێ نە ژ بلێ ئاریشێن دیاردا نەشووكرنێ وزێدەبوونا بی ژنا وئێتیما ودەعارێ،لەورا دڤیا دەولەت ژیانا ڤان یا بژینەوەی دابین بكت دا بكارن ژیانەكا ئازاد و سەربەست و شەرەف مەند بژین.
گۆرێن ب كۆم:
د هەبوونا مێژووی دا ئێزدی ل سەر عەردێ میزو بوتامیا دژین زكێ ڤی عەردی تەژی بوویە ژ لەشێن ئێزدیا ،ب هەبوونا دیرۆكێ ب تایبەت پشتی هاتنا ئاینێ دبێژنێ ( ئەسمانی) هەر گوندەكی ئێزدی لێ دئاكنجی گورێن ب كۆم لێ هەنە(74)جارا تووشی فەرمانێ بووینە نێر ب گشتی دكوشتن وژنك و زارۆك سەبیدكرن ودفرۆتن لدویف شەریعەتا خۆ، هەتا نهۆ ب دەهان گۆڕێن ب كۆم هاتینە دیتن وب دەهان ماینە لدویف پێزانینا وهەتا نهۆ نێزیكی 20% عەردێ شنگالێ د دەستێن كافرێن داعش داینە،گەلك ژ ئێزدیان هاتنە بن ئاخكرن ب ساخی لدویف دیدەڤانێن دیتین ویێن ژ مرنێ رزگاربووین ولدویف راپۆرتێن نێڤ دەولەتی ب هزاران خەلكێ شنگالێ نە د دیارن د بەرزەنە ( زەلام ، زارۆك ، ژن، پیرە مێر ، پیرە ژن ..وهتد) وگەلك ژ وان برینە دەولەتان وەكی سوریا وسعودیێ و جەزائر وتونس وئەفغانستان وهندێ… وهتد.
پەككەفتی:
دەمێ ئاگرێ شەر پەیدادبیت پاشماوێن وێ گەلەك تشتن وەكی( بریندا و پەكەفتی) ،ئاگر تەر وهشك دسۆژیت هندەك ژ وان بریندار ساغ دبن وهندەكێن دی ژی پەككەفتی دمینن ئەو ژی هند دكارن كاربكەن و هندەكێن دی نەشێن كاربكن ،ژ بەر جۆرێ پەكەفتیا وان ئانكو پێتڤی هاریكاریێ نە ، هەموو پەككەفتی دڤیا حكوومەت ب ئەركێ خۆ بزانت كو هاریكاریا وان بێتە كرن دا نەبنە عللەت لسەر كەس وكارێن خۆ ژ لایەنێ چاڤدێریێ و ساخلەمیێ ڤە ،دا بكارن ژیانا خۆ ب ئاسایی رێڤە ببن.
دیل ونەدیار:
ئەم ل چەرخێ 21ی دژین دڤیا ئەم بزانن مەترسیا جەنگا ل گشت جیهانێ ول عێراقێ ب تایبەت هندی مە دیتی دەولەتا عێراقێ د جەنگادایە دگەل دەرودەردۆرێن خۆ ژ بەر هندەك هۆكارێن نە رەوا وەك زالبوون یان چاڤسوری، ئەنجامێن وان شەرا ب هزاران ئێخسیر وكوشتی ونەدیار ل عێراقێ هەنە،ئاریشێن وان وخێزانێن وان هەتا نهۆ نەهاتینە چارەسەركرن،نهۆ ل شەرێ داعش ل شنگالێ وچەندین دەڤەرێن دی یێن عێراقێ ب هزاران ئێخسیر ونەدیار هەینە كەس چ ژ وان نزانت هەتا شەر ب دوماهیك نەهێت خێزانێن وان دی دحالەتەكێ دەروونی وساخلەمی وخەموكی نەباش دا دێ ژین،ودێ گشت ئاریشێن وان مینن هەلاویستی هەتا تشتەكی ژ وان دزانن، ب سەدان كچ وژنێن ئێزدیان ل بازاران دئێنە فرۆتن ودئێنە بكارئینان بۆ مەرەمێن سكسی وئەڤە ب خۆ تاوانە دژی مرۆڤاتیێ ،ل ڤێری ئەم دبێژن كانێ مرۆڤاتی؟ كانێ ئەوێن دبێژن دینێ مە یێ خودێ ناسە؟ كا چ كرینە بەرامبەری ڤان كافرێ دەولەتا ئیسلامی(داعش) ؟ كانێ هەلویستێ دەولەتێ ئیسلامی؟ ئەری چنكو ئەم ئێزدینە ئەڤە ب سەرێ مە ئینانە؟.
سەبیكرن ل درێژیا مێژوویێ دا:
كەسێ چاڤدێرێا مێژووێ بكەت دێ بینیت كا چاوا ئێزدی تووشی فەرمانا بوونە هاتنە بن بركرن ب هەر هۆكارەكا هەبیت ژ ئەسكەندەرێ مەقەندونی و زەرەدشتیا وفارسا وعەرەبا وئوسمانیا و ل ژێر ناڤێ (الله أكبر)ره و ریشالێن ئیرهابێ وتوندی وتیژیێ د هندەك ئەحزابێن ئیسلامی دا هەنە وهەر جارەكا دەرفەت بكەفتێ دێ نینوكێن خۆ یێن خراب دەر ئینن ئەو رەوشتە دئێتە دیاركرن د چاڤپێكەفتنێن والن دگەل میدیا ورۆژناما وەكی هندەك كەسا ژ وان دبێژن ئێزدی موسلمانن !!! ،نابێژیت باب و كالكێن من دئێزدی بوون و ژ رێ كەفتن!! ئەم ل چەرخێ 21 ێ ئێكێ دژین دڤیا هزرێن خۆ بگهۆرن وكاربكەن ل سەر هزرێن مرۆڤاتیێ نە دژی مرۆڤان.
دەربەدەركرن:
ژ بەر ڤان قەیرانا وشەرا و سیاسەتەكا شاش وتائیف گێریێ وفەقیریێ مللەتێ عێراقێ ب ملیۆنا دەربەدەر بوون ناڤخۆیی و ژ دەرڤەی عێراقێ ب تایبەت كەسێن خودان باوەرنامە وزیرەك ژ هۆكارێن نە ئارامیێ ونەبوونا دەرفەتا كاری گشت خەلكێ قەستا دەڤەرێ ئێمناهی لێ هەی كرن،ئێزدی ژ كەڤندا كۆچ دكن وهەتا نها ژی بەردەوامە ژ هۆكارێن ( دەرفەتێن كاری ، وژ بەر ئێمناهیێ ،و فەرمانا 74ێ) یا ب سەر شنگالێ وباشیك وبەحزانێ دا هاتی،ئێزدی هەست دكت كوعێراق بگشتی نە وەلاتێ وی یە خو ناموو دناڤ دا بینیت ژ بەر سەرەدەریا ئاینێن دی دگەل وان لێ ل كوردستانێ هەتا رادەیەكێ زۆر باش دئێزدیان دگەهن و ل فەرمانا 74ێ ئەڤ چەندە هاتە سەلماندن و دیاركرن كا چاوا؟ خەلكێ كوردستانێ رەفتار دگەل ئێزدیان كر ب مرۆڤانە و زۆر باش جهێ رێزگرتنێ نە.
تُتاح هذه الصورة أيضا في: کوردی
