كوردستان و ئێزدیخان خەمبارن ب وەغەركرن و ژدەستدانا كەسایەتیێ بەرنیاس(شێخ شامۆ)
ئلیاس نەعمۆ خەتاری
ب شێوەكی گشتی ل ناڤا جڤاكێ كوردی دا رەحمەتیێ شێخ شامۆ جیێ خۆ هەبوو ژ هەموو ئالیان ڤە،هەلبەت كەسەكێ سیاسەتمەدار بوو و كادرەكی پێشكەفتی بوو،ژئالیێ دیڤە كەسەكێ خودان شیانەكا مەزن بوو دبوارێ پەیوەندیێن جڤاكی و پێكڤەژیانا ئاینی دا دناڤا چارچۆڤێ كوردستانێ دا،لەوما شێخ هەڤاڵ و برادەرێ هەموو خەلكێ كوردستانێ بوو ب كچك ومەزناڤە،دگەل دام و دەزگەهێن هەرێما كوردستانێ هەڤال بوو دگەل پیاو و ئاینێن موسلمان وكرستیان وسوبی و هەموو ئاینێن كوردستانێ ب هەموو هەلكەفتان هەردەم دگەل دابوو.
ژ دەستدانا كەسەكێ خودان ئەزموون و خودان باوەری وخەباتەكا هۆیە مەزن خوسارەتەكا ئێكجار یە مەزن بوو بۆ مللەتێ ئێزدی و بۆ هەڤال و برادەر و مریدێن شێخی،ژبەركو جەنابێ شێخی جیەكێ تایبەت هەبوو دناڤا جڤاكێ ئێزدی دا خەمخۆر و خزمەتكاربوو بۆ بەلەنگاز و سێویان خزمەتكاربوو بۆ قوتابیان و رۆژنامەڤانان و نڤیسەران هەلگرێ خەم و كول ودەردێن مللەتێ خۆ بوو،شێخ شامۆ هێشتا گەلەك خلمەت ل پێشیا چاڤێن خۆ دانابوو و بۆ پاشەرۆژێ كربوونە ئارمانج شنگال و خەلكێ شنگالێ و ژیانا ل ناڤا كەمپان،بەردەوام دگەل دام ودەزگەهێن هەرێمێ وجیێن بلند گەنگەشە و دانوستاندن دگەل وان دكر داكو مللەتێ خۆ رزگار بكت و ژیانا وان خۆشتر لێ بكت،دیدار و پەیوەندیێن تایبەت دگەل جەنابێ بارزانی و سەرۆكێ حكومەتێ و سەرۆك وەزیران و رێڤەبەرێن گشتی بەڕدەوام ئەنجام ددان ژبۆ خزمەتا خەلكێ خۆ ژبلی پەیوەندیێن تێلەفونی،هەر كەسێ قەستا جەنابێ شێخی كربا ب چی هەوجەیێ با ڤالا ڤەنەدگەریاڤە و وەكی خلمەتا خۆ و مالا خۆ خەم لێ دخوار.
رۆلێ شێخ شامۆ رۆلەكێ هەری مەزن بوو بۆ گەهاندنا پەیاما رەوشەنبیری و زانستی وسیاسی وبتریا ژیانا خۆ بۆ خزمەتا خەلكێ خۆ تەرخانكربوو و دڵ و دەرگەهێ خۆ هەردەم بۆ خەلكێ خۆ ڤەكریە خودان پەیڤێن جوان دهەر هەلكەفت و كۆنگرە وسمیناران دا كو خۆ دكرە پرا هەرە مەزن دناڤا سەركردەیا حكومەتا هەرێما كوردستانێ و جڤاكا ئێزدی دا،دڤان شەش هەفت سالێن تالیێ دا بەردەوام خەمخۆر بوو ل ناڤا ئاواران وسەرەدانا وان دكر لبن خیڤەتا وهەیكەلێن خانیان ول نەخۆشخانان،ل دەرڤەی وەلاتی ل ئەورۆپا ب گشتی و ئەلمانیا ب تایبەت دیدارێن بەردەوام دگەل مللەتێ خۆدكرن و گوهداریا ئێش وئازارێن وان دكر،ب راستی ئەم نكارین دبێهنەكێ دا كەد و زەحمەت و خەباتا كەسەكێ مینا شێخ شامۆ د چەند رێزەكان دا تەمام كەین و ب داوی بینین،ژبەركو رەحمەتیێ شێخ كەد و خەباتەكا ئێكجار مەزن ل پشت خۆڤە هێلایە و ب مخابنی ڤە گەلەك ئارمانج هەبوون دگەل خۆ برن وبن ئاخكرن.
تُتاح هذه الصورة أيضا في: کوردی
