ل رۆژهەلاتا منبج دوو گۆند هاتنە کونترۆلکرن و ٢٢ چەکدارێن داعش ژی هاتنە کوشتن
ئێن ئارتى
ل رۆژهەلاتا باژێرێ منبج ٢٢ چەکدارێن داعش هاتنە کوشتن و دوو گۆندێن دی ژی ل نێزیک وی باژێری ژلایێ شەرڤانان ڤە هاتنە کونترۆلکرن و نها بەرف ناف جەرگێ باژێرێ منبج د پێشڤەچوونێ دانە.
ئاژانسا نووچەیێن هاوار ئەڤرۆ ١٩ێ حوزەیرانا ٢٠١٦ێ بەلاڤکریە، ئەنجومەنێ سەربازی یێ منبج د چارچووڤەیا ئۆپراسیۆنا “شەهیدێ فەرماندە فەیسەل ئەبو لەیلا” بۆ کونترۆلکرنا منبج گۆندێن یاستێ و نەخیل کو سێ کیلۆمەتران ژ رۆژهەلاتا باژێرێ منبج دویرە کونترۆلکرنە.
ئاژانسا نووچەیێن هاوار ئاماژە ب وێ ئێکێ ژی کریە، د شەر و پەڤچوونێن وان گۆندان دا ٢٢ چەکدارێن داعش ژلایێ شەرڤانان ڤە هاتنە کوشتن.
ئەو ئێک ژی ئاشکرا کریە، ل رۆژئاڤایێ باژێرێ منبج شەرڤان چوونە ناڤ جادە و تاخێن وی باژێری و ژبلی نەخوشخانەیا منبج، فولکەیا سەرەکی یا منبج، کو دکەڤیتە سەر رێیا منبج – حەلەب ل رۆژئاڤایێ وی باژێرێ ژلایێ شەرڤانان ڤە هاتییە کونترۆلکرن.
دوهی ١٨ێ حوزەیرانا ٢٠١٦ێ نووچەیێ وێ ئێکێ هاتە بەلافکرن کو د بوردومانا فروکەیێن جەنگیێن سوپایێ تورکیا دا سەرکردەیێ چەکدارێن داعش ل منبج هاتییە کوشتن.
ل رۆژا ١ێ حوزەیرانا ٢٠١٦ێ ئۆپراسیۆنا “شەهیدێ فەرماندە فەیسەل ئەبو لەیلا” بۆ کونترۆلکرنا منبج دەستپێکریە، و ژ وی دەمی هەیا نها زێدەتر ژ ١٠٠ گۆندێن مەزن و بچوک ژ رووبەرەکێ زێدەتر ژ هزار و ٤٠٠ کیلۆمەتران چار گووشە ل دەوروبەرێ منبج هاتنە کونترۆلکرن و رێکێن ناڤبەرا رەقە و سنوورێ تورکیا ژی ژلایێ شەرڤانان ڤە هاتنە کونترۆلکرن.
تُتاح هذه الصورة أيضا في: کوردی