زێدەتری چار هەزار و 200ژن و زارۆكێن ئێزدی د دەستێ داعشێ دانە
باسنیۆز:
ڤیان دەخیل ل رونشتنا ئەنجوومەنێ مافێن مرۆی ل بارەگایێ نەتەوەیێن ئێكگرتی راگەهاند، نەتەوەیێن ئێكگرتی ل ب جینۆساید ناساندنا كەیسا ئێزدیان زۆر گیرۆبوو ،هەڤدەم داخواز ژی كر ب زووترین وەخت كەیسا تاوانێن داعش دژی ئێزدیان بدەنە دادگەها نێڤ دەولەتی یا تاوانان.
ئیرۆ سێشەمبوویێ 21/6/2016،ڤیان دەخیل، پەرلەمانتارا كوردا ئێزدی ل ئەنجوومەنێ نوونەرێن عێراقێ ل بارەگایێ نەتەوەیێن ئێكگرتی ل جنێف گۆت:”سوپاسیا نەتەوەیێن ئێكگرتی دكەین بۆ ب جینۆساید ناساندنا كەیسا ئێزدیان،بەلێ ئەم دبینین ب جینۆساید ناساندنا تاوانێن داعش دژی ئێزدیان،ژلایێ نەتەوەیێن ئێكگرتی ڤە زۆر گیرۆ بوو”.
ڤیان دەخیل گۆتژی پشتی هێرشا داعش بۆ سەر شنگال 5 هەزار و 800 ژن و زارۆكێن ئێزدی ژلایێ وێ رێكخراوێ ڤە هاتنە گرتن ئەم دبینین،نەتەوەیێن ئێكگرتی ڤیابا زۆر زووتر پێنگاڤێن جیدی كربان،بۆ ب جینۆساید ناساندنا وان تاوانێن دژی ئێزدیان هاتینە كرن.
وێ پەرلەمانتارا كوردا ئێزدی گۆتژی هەتا نۆكە 3 هەزار و 200 ژن و هەزار زارۆكێن ئێزدی ل دەستێ داعشدا ماینە و داخوازێ ژ نەتەوەیێن ئێكگرتی دكەین پێنگاڤێن خۆ بۆ ڤەگەراندنا وان چرتر بكن و هنجی زوویە وێ كەیسی بدەنە دادگەها نێڤ دەولەتی یا تاوانان.
ل روونشتنا ئەنجوومەنێ نەتەوەیێن ئێكگرتی سەرجەم وەلاتێن ئەندام ئیدانەیا وان تاوانێن داعش بەرامبەر ئێزدیان كر و داخواز كرن ب زوترین وەخت كەیسا تاوانێن داعشێ بدەنە دادگەها نێڤ دەولەتی یا تاوانان.
تُتاح هذه الصورة أيضا في: کوردی