حكوومەتا عێراقێ ناوچەداریا سنوونێ پشتگۆه هاڤێتیە و ب ئەركێ خۆ رانەبوویە
تۆرا لالش یا راگەهاندنێ
ئەندامێ جڤاتا ناوچەداریا سنوونێ(سلێمان فانۆ)د دیدارەكێ دا لگەل رۆژنامەیا دەنگێ لالش بەحسێ رەوشا ناوچەیێ دكت و ئاشكەراكر كو رەوشا ئێمناهیێ ل سنوونێ یا باشە،هەتا نۆكە 6380 خێزان ل دەڤەرێ ئاكنجینە،راگەهاند ژی حكوومەتا عێراقێ ب ئەركێ خۆ رانەبوویە هەمبەری دەڤەرێ كو ئیداری گرێدایی وانە و بۆ ماوێ چەند چەرخان پشتگۆه هاڤێتیە.
ل دۆر رەوشا ئێمناهیا سنوونێ،ئەندامێ جڤاتا ناوچەداریا سنوونێ”سلێمان”دیاركر:”ناوچەیا سنوونێ ل 19/12/2014ل سەر دەستێ هێزێن پێشمەرگەیێ قارەمان و ب سەرپەرشتیا راستەوخۆیا سەرۆكێ هەرێما كوردستانێ(مەسعوود بارزانی) و ب پشتەڤانیا فرۆكەیێن هەڤپەیمانیا نێڤ دەولەتی ژ دەستێ تیرۆرستێن داعشێ هاتە رزگاركرن،ژ وی دەمی رە هەتا ئیرۆ رۆژ رەوشا ئێمناهیێ ل سنوونێ یا باشە”.
سەبارەت هەبوونا گوندێن ئەرەبان ل دەردۆرێن سنوونێ”فانۆ”ئاشكەراكر:”ل دووڤ پێزانینێن مە گوندێن عەرەبان یێن نێزیكی سنوورێ وەلاتێ سووریا نینن،بەلێ ژمارەكا گوندێن سنووری یێن عێراقی هەینە كو كۆنترۆلكرینە ژبال هێزا یەپەكێ یا كوردی ڤە و هندەك خەلكێ وان گوندان ل مالێن خۆ دانە و ژئالیێ ئیداری ڤە ئەو گرێدایی ناوچەیا سنوونێ نە”.
دەربارەی ڤەگەریانا خەلكێ پشتی رزگاركرنا سنوونێ،ناڤهاتی گۆت:”بەری رزگاركرنێ نێزیكی 1500خێزانان ل چیایێ شنگالێ مابوون و پشتی ئازادكرنێ و هەتا ئیرۆ رۆژ،خەلك ب شێوەیەكێ سست ڤەگەریان و نۆكە ژمارا خێزانان یێن ل دەڤەرێ 6380خێزانن ژخەلكێ دەڤەرێ و یێ قەزا شنگالێ و ناوچەیێن گرعزێر و قیروان پێك دئێن”.
سەبارەت هەلویستێ خەلكێ هەمبەری رەوشا سنوونێ ژ ئالیێ ژیانێ ڤە”سلێمان فانۆ”راگەهاند:”هەلویستێ خەلكێ نەیێ باشە،ژبەركو ئەوان خزمەتكاریێن سەرەكی یێن ژیانێ وەك كارەب و ئاڤێ ژ دەست داینە،دیسان هەبوونا گەلەك جهێن چەكدار یێن نەشەرعی و سەیر”.
ژلایەكێ دیڤە دەربارەی هەبوونا خیڤەتان ل ناوچەداریێ و چیایێ شنگالێ دا،ئەندامێ جڤاتا سنوونێ ئاماژەكر:”ب شێوەیەكێ فەرمی ل نك حكوومەت و نەتەوەیێن ئێكگرتی و رێكخراوێن نەحكوومی خیڤەت ل ناڤ سنوونێ دا نینن،بەلێ ژمارەكا خیڤەتان ل ناڤ چیایێ شنگالێ دا هەینە و وەك كۆمان خەلك لێ ئاكنجیبووینە و ئەو دناڤبەرا خۆدا كاروبارێن خۆ ب رێڤە دبەن”.
هەروەسا ل دۆر ژیانا وەلاتیان ل ناوچەداریێ گۆت:”وەلاتیان هێدی هێدی دەست ب ژیانا خۆ كریە،بەلێ هەتا نۆكە ب رێژەیەكا كێم،جهێن بازرگانی و بازار ل پتریا دەڤەران هاتینە ڤەكرن و هەینە،بەلێ دۆریانا قەسەبا سنوونێ بوویە جهەكێ سەرەكی و مەزن كو پتریا وەلاتیان سەرەدانێ دكن ئەوێن ل كۆمەلگەهان و ل ناڤ چیایێ شنگالێ دا،كو گەلەك پێتڤیێن وەلاتیان یێن رۆژانە لێ هەینە”.
ژئالیێ خزمەتكاریان ڤە ژی دیاركر:”خزمەتكاری گەلەك كێمن و ب تایبەت كارەب و ئاڤ ،زێدەباری خزمەتكاریێن دیتر یێن سەرەكی،پشتی رزگاركرنێ هندەك پرۆژێن كچك ل ناوچەیێ هاتینە بجهئینان ژبال رێكخراوێن مرۆڤایەتی ڤە و تێرا هەموو دەڤەرێ ناكن،ژ ئالیێ چاندنێ ڤە نێزیكی نیڤا خودانێن بیرێن ئرتوازی ئەڤ سالە چاندنا خۆ كرینە،بەلێ حكوومەتێ هاریكاریا وان نەكریە ب چوو شێوەیەكی وەك پشتەڤانیا مادی”.
ئەندامێ جڤاتا ناوچەداریێ،ل دۆر ڤەكرنا فەرمانگەهێن حكوومی ل سنوونێ دبێژت:”پتریا فەرمانگەهان ڤەكرینە،بەلێ هەتا نۆكە فەرمانگەه ڤەكرینە ل دەڤەرێن پارێزگەها دهۆكێ وەك فەرمانگەها رەگەزنامە و بارێ شارستانی،چنكو رێژەیەكا مەزن ژ خەلكێ دەڤەرێ هەتا نۆكە ئاوارەنە ل وان دەڤەران”.
دیسان سەبارەت پێشكێشكرنا هاریكاریان ژبال جڤاتێ ڤە خویاكر:”ئەم جهەتێ حكوومی یێ ئێكێ نە كو رابووی ب كۆمكرنا پێزانینێن وەلاتیان و ئێخستنا ناڤ و پێزانینێن وان د دۆسەیەكا تایبەت دا،داكو رادەستی هەموو جهەتێن حكوومی یان مرۆڤایەتی بكەین یێن بڤێت خزمەتەكێ پێشكێشی وان بكت،دیسان ئەم دخوازین ب رێیا جهەتان ب داخوازیێن وەلاتیان و رادبین ب هەماهەنگیێ لگەل رێكخراوان و جهێن دی،بۆ ئاسانكرنا كارێن وان و كاركرن لگەل وان دا بۆ دابەشكرنا هەرهاریكارییەكێ پێ رادبن بۆ وەلاتیان،رۆلێ رێكخراوان ژی نە ل ئاستێ پێتڤی یە،سەرەرای ئەو جهەتێ هەری گەلەكن یێن كار دكن ل دەڤەرێ،چنكو ژێرخانە ل دەڤەرێ یا ژناڤچوویی”.
ژلایێ پەیداكرنا ژێدەرێ داهاتی ژبال خەلكێ ل ناوچەداریێ ڤە”سلێمان فانۆ”دا دیاركرن كو رەوشا خەلكێ نەیا باشە،ژبەر نەبوونا ژێدەرێن مەعیشەتێ و داهاتی ب شێوەیەكێ پێتڤی،پتریا خەلكێ پشت بەستنێ ل سەر ژێدەرێن خۆ یێن داهاتی یێن بەرێ دكن،بەلێ كێمبوونا رێژا داهاتی ل جڤاكی دا ژ ئەگەرێ سەكنینا پتریا پرۆژەیانە،هندەك وەلاتی هێشتا یێ پشت بەستنێ ل سەر چاندنێ دكن بۆ مەعیشەتا خۆ،بەلێ نەبوونا پشتەڤانیا حكوومی و ژ كاركەفتنا پتریا پرۆژەیان وەل وان كریە بسەكنن ژ كاری و پتریا خودانێن پەزی ژی پەزێ خۆ ژ دەست دان دەمێ دەست ب سەرداگرتنا داعشێ بۆ دەڤەرێ،هندەكێن دی ژی پشت بەستنێ ل سەر مووچەیان دكن.
ل هەمبەر ئەركێ حكوومەتێن عێراقێ و هەرێمێ بۆ ناوچەیێ”سلێمان فانۆ” رۆنكر:”حكوومەتا عێراقێ ب ئەركێ خۆ رانەبوویە هەمبەری دەڤەرێ كو ئیداری گرێدایی وانە بەلێ پشتگۆه هاڤێتیە نە ژ رزگاركرنێ وەرە،بەلكو بۆ ماوێ چەند چەرخان،حكوومەتا هەرێمێ ژی یا كێمتر خەمە ددەرهەقێ دەڤەرێ دا و ئەڤ چەندە ژی دزڤرت بۆ قەیرانا ئابووری و دارایی یا تێرا دەرباز دبت”.
ل دۆر تەرخانكرنا بوودجێ بۆ ناوچەداریێ “فانۆ”ئاشكەراكر:”چوو بوودجەیەك بۆ ناوچەیێ نەهاتیە تەرخانكرن ل سالا 2016ێ و هەتا دوو سالێن بۆری ژی ،لەوا داخوازێ ژ حكوومەتا ناڤەندی دكەین بوودجەیا دەڤەرێن مە دەست پێ بكت و تەرخانكرنا بوودجەیەكا زێدە بۆ بارودۆخێن جودا ل دەڤەرێ”.
ل داویێ ژی و دەربارەی پێتڤیێن ناوچەداریێ دیاركر:”سنوونێ پێتڤی هێزا كارەبێ و پرۆژێن ئاڤێ و ئاڤاكرن و نووژەنكرنا قوتابخانان و پێشئێخستنا كەرتێ ساخلەمیێ وسپاندنا یاسایێ ل سەر هەموویان و ئاڤەدانكرنا پرۆژێن وەرزشی و لاوان و گەشتیاری ل دەڤەرێن جودا یە،هەروەسا دابینكرنا ئێمناهیا ناڤخۆیی وگرتنا سنووران لگەل وەلاتێن دەورووبەر و پشتەڤانیكرنا مادی و مەعنەوی بۆ هەموو خودانێن پیشەیان ،زێدەباری هاندانا رێكخراوێن نێڤ دەولەتی و مرۆڤایەتی بۆ كاركرنێ ل دەڤەرێن مە”.
تُتاح هذه الصورة أيضا في: کوردی