عێراق.. کورتئینان د بودجەیێ گشتیێ ٢٠١٧ێ دا ژ ٢٦ ملیار دۆلاران زێدەترە
ئێن ئارتى
ئەندامەکێ لژنا دارایی ل پەرلەمانا عێراقێ راگەهاند، کورتئینان د بودجەیێ گشتیێ عێراقێ دا بۆ سالا ٢٠١٧ێ،نێزیکی ٢٦ ملیار و ٦٠٠ ملیۆن دۆلارن کو دکەتە ٣٢ ترلیۆن دینار.
سەرحان ئەحمەد ئەندامێ لژنا دارایی ل پەرلەمانا عێراقێ ئاشکرا کر، بودجەیێ گشتیێ عێراقێ بۆ سالا ٢٠١٧ێ، ١٠٢ ترلیۆن دینارن کو دکەتە نێزیکی ٨٥ ملیار دۆلار، داهاتێ نەفتێ و داهاتێت دی ژی د بودجەی دا ب ٧٠ ترلیۆن دیناران کو دکەتە ٥٨ ملیار دۆلار دهێنە مەزاختن.
ئەوی پەرلەمانتاری ئەو چەند ژی راگەهاند، گوژمێ کوتئینانێ د بودجەیێ گشتی دا بۆ سالا ٢٠١٧ێ، ٣٢ ترلیۆن دینارن کو دکەتە نێزیکی ٢٦ ملیار و ٦٠٠ ملیۆن دۆلار و ب رێیا وەرگرتنا قەرێن دەرەکی ل سندوقا ناڤدەولەتیا نەختینە ئەو کورتئینان دێ هێتە تژیکرن.
ئەندامێ لژنا دارایی ل پەرلەمانا عێراقێ ئەو چەند ژی ئاشکرا کر، بهایێ بەرمیلەکێ نەفتێ د بودجەی دا ب ٣٥ دۆلاران هاتیە مەزاختن و ئەڤ بهایە ژی د نهادا بهایەکێ هەژی و دروستە.
ب هەڤبەر دگەل سالا ٢٠١٦ێ دا، بودجەیێ گشتیێ عێراقێ بۆ سالا ٢٠١٧ێ کێمترە، چونکی بودجەیێ گشتیێ ئیسال پێکدهات ژ ١١٣ ترلیۆن دیناران کو دکەتە نێزیکی ٩٤ ملیار دۆلار، کورتئینانا وێ ژی ٣٠ ترلیۆن دینار بوون کو دکەتە ٢٥ ملیار دۆلار.
تُتاح هذه الصورة أيضا في: کوردی