نێچیرڤان بارزانی و شاندهكێ ئەمریكی كۆمبوون
رووداو- هەولێر
نێچیرڤان بارزانی لەگەڵ شاندێكی لیژنەی كاروباری سەربازی ئەمریكی و باڵیۆزی نوێی واشنتن لە بەغدا كۆبووەوە و “هەردوولا هاوڕابوون رێگای سەربازی تاكە رێگا نییە بۆ كۆنترۆڵكردنەوەی موسڵ”.
رۆژی یەكشەممە 4-9-2016 نێچیرڤان بارزانی، سەرۆكوەزیرانی هەرێمی كوردستان لەگەڵ شاندێكی ئەمریكی كۆبووەوە، كە پێكهاتبوون لە سیناتۆر مارتن هێنرچ، لە لیژنەی كاروباری سەربازیی ئەنجوومەنی پیران و دۆگلاس سیلیمان، باڵیۆزی نوێی ئەمریكا لە عێراق و كین گرۆس، كۆنسوڵی گشتی ئەمریكا لە هەرێمی كوردستان.
بەپێی راگەیێندراوێكی ماڵپەڕی حكومەت، لە كۆبوونەوەكەدا شاندی ئەمریكا ستایشی خەڵك و حكومەتی هەرێمی كوردستانیان لە پێشوازیكردن لە ئاوارە و پەنابەران كردووە و ئاماژەیان بە سەركەوتنە بەردەوامەكانی پێشمەرگە لە شەڕی داعش كردووە.
لای خۆیەوە نێچیرڤان بارزانی پیرۆزبایی دەستبەكاربوونی باڵیۆزی نوێی ئەمریكا لە عێراق كرد و سوپاسگوزاریی هەرێمی كوردستانیشی بۆ سەرۆك و گەلی ئەمریكا دووپاتكردەوە، كە هەر لە سەرەتای هەڕەشە و هێرشەكانی داعشەوە بۆ سەر هەرێمی كوردستان هاوكاری سەربازییان پێشكەش كردووە و هۆكارێكی گرنگ بوو هاوكێشەكان لە بەرەكانی جەنگ بۆ بەرژوەندیی پێشمەرگە گۆڕانكاری بەسەردا بێت.
ماڵپەڕی حكومەتی هەرێمی كوردستان ئاماژەی بەوەشكردووە، نێچیرڤان بارزانی پوختەیەكی دەربارەی دوا سەردانی خۆی و شاندی یاوەری بۆ بەغدا و كۆبوونەوە و گفتوگۆ و دیدارەكانی لەگەڵ بەرپرسانی پلە باڵای عێراقی خستەڕوو.
لە راگەیێندراوەكەدا هاتووە، كە هەردوولا هاوڕابوون كە رێگەی سەربازی تاكە رێگە نییە بۆ كۆنترۆڵكردنەوەی موسڵ، بەڵكو پێویستە لایەنی سیاسی و مرۆیی پرسەكەش لەبەرچاو بگیرێت و لەو بارەیەشەوە پێویستە هاوكاریی تەواو لە نێوان هەرێمی كوردستان و حكومەتی عێراق و هاوپەیماناندا هەبێت، بەتایبەتی بۆ قۆناخی دوای كۆنترۆڵكردنەوە شارەكە و ئاشتەوایی لەنێوان پێكهاتەكانی شاری موسڵ دروستبكرێت و ئاسایش و ژیانێكی ئاساییان بۆ دابینبكرێت.
تُتاح هذه الصورة أيضا في: کوردی