وێنەگر خالد خودێدا:هەموو جەژن و هەلكەفتێن ئێزدیان من ئەرشیفكرینە
تۆرا لالش یا راگەهاندنێ
وێنەگرێ گەنج(خالد خودێدا) خەلكێ كۆمەلگەها شاریایە،پشتی كارەساتا ب سەرێ خەلكێ شنگالێ دا هاتی ب رێیا فۆتۆ و فیدۆیا دەست ب وێنەكرنا دەردەسەریێن ئاواران كر،هەروەسا هەر جەژن و هەلكەفتەكا ئێزدیان هەبت وهاتیە كرن ئەرشیفكریە،نۆكە ژی بەرهەڤیێن ڤەكرنا پێشانگەهەكا فۆتۆگرافی دكت.
دەربارەی كارەساتا شنگالێ وێنەگر”خالد خودێدا”بۆ رۆژناما دەنگێ لالش دبێژت:”پشتی كارەساتا ب سەرێ شنگالێ دا هاتی ل 3/8/2014ێ،من ب رێیا فۆتۆ و فیدۆیا دەست ب وێنەكرنا دەردەسەریێن ئاواران كر ل كۆمەلگەها شاریا و چوومە ناوچەدارییا سنوونێ و چیایێ شنگالێ و دیمەنێن من دیتین وێنەكرن و كرنە فۆتۆ و فیدیۆ و كرینە ئەرشیف كو ل پاشەرۆژێ دێ دەست ب كارەكی كەم وەك پێشانگەهە یا فۆتۆگرافی ئەگەر هاریكاریا مادی هەبت”.
زێدەتر گۆت”: قوتابیەكێ ئێزدی ب ناڤێ(سەلال) ل زانكۆیەكا وەلاتێ تایوانێ دخوونت دێ پرۆژەكی ژبۆ دانەنیاسینا ئێزدیان ل وی وەلاتی ئەنجامدەت،داخوازا فۆتۆیێن من كریە یێن كارەساتا شنگال و ئازارێن ئێزدیان و نێزیكی 90وێنەیان من بۆرا دروستكرن و فرێكرینە،هەروەسا لگەل رێكخراوەكێ كاردكەم و پرۆژەك هەیە بۆ ماوێ پتر ژ سالەكێ،ژبۆ ڤەكرنا پێشانگەهەكێ ل وەلاتەكێ بیانی و پێشانگەها من ب شێوەیەكێ ڤەكۆلین ل سەر كارەساتێ یە و هەر بەشەك ژ وێ ڤەكۆلینێ جەژن و هەلكەفتێن مەنە بۆ وی وەلاتی دێ دیاركن”.
خودێدا دیاركرژی ئێك وێنە جەرگێ مرۆڤایەتیێ دهەژینت،وێنە تشتەكێ پیرۆزە و وێنە بخۆ دئاخڤت وپەیامەكە و شۆرەشەكە و پەرتۆكە و ناسناما كارەساتەكێ دیار دكەتن،هەروەسا هەر جەژن و هەلكەفتەكا ئاینێ مە ئێزدیان هەبت وهاتیە كرن چ ل پەرستگەها لالشیان ژ دەرڤە یان چ ل وەلات شێخ بت من خرهەینە وەك فیدیۆ و فۆتۆ ،ئارمانج ژێ ئەرشیفكرنا وانە و هندا نەبن،چ فیدیۆ یان فۆتۆ من كرینە ناڤ فلمێن دكیۆمێنتێ دا و بۆ كەیسا جینۆسایدێ ژی من یێت ئامادەكرین،دیسان من داینە رۆژنامەڤان و هەڤالاڤان.
ل دۆر كارێن داهاتی وێنەگری خویاكر:”نۆكە من بەرهەڤیا پێشانگەهەكا فۆتۆگرافی كریە وەك فۆتۆ من بەرهەڤی كریە و فۆتۆیێن باش من ژێگرتینە كو كارتێكرنا خۆ هەبتن وتایبەت ب كارەساتێ ڤە گرێدایی نە و هەر چار وەرزێن من یێن كۆمكرین،ئەگەر هاریكاریا من بێتە كرن دێ ڤەكەم،مەرەم ژێ نەتنێ بۆ خەلكێ مە پێشانگەه بێتە دیاركرن و من دڤێت ژچارچۆڤێ ناڤخۆیی دەركەفت و بۆ خەلكەكێ دی دیاربتن و ل كوردستانێ دێ ڤەكەم و ئەگەر هاریكاری هەبت دێ ل دەرڤە ژی ڤەكەم”.
وێنەگرێ ناڤبری دەرچوویێ پەیمانگەها هونەرێن جوانە و مامۆستایێ شانۆیێ یە ل قوتابخانێ و ئەندامێ تیپا شاریا یا هۆنەری و ئێكەتیا وێنەگرێن كوردستانێ یە و دگەل تیپا شاریا و رێكخراوێن NGO ب ئەنجامدانا چالاكیێن شانۆیێ رادبت،هەروەسا دو و پێشانگەهێن تایبەت ب فۆتۆ ڤەكرینە،زێدەباری فلمەكێ دكیۆمێنتاری ل سەر پێكڤەژیانا ئاشتیانە ل عێراقێ ل سالا 2010،هەروەسا پشكداری دچەندین شانۆگەریا و ئوپەریتا و پانورامادا كریە،دەرهێنان و نڤیساندنا چەندین شانۆیان كریە.
تُتاح هذه الصورة أيضا في: کوردی