هاریكاریێن بۆ كچ و ژنێن رزگاربووی ل كەمپان دئێنە پێشكێشكرن نە ل ئاستێ پێتڤی نە
دەنگێ لالش،جیهان عەبۆ 
بەرپرسا رێكخراوا داك بۆ گەشەپێدانا ژنا ئێزدی راگەهاند،هەتا نۆكە گەلەك پێنگاڤ هاتینە هاڤێتن ژلایێ رێكخراوێن حكوومی و نە حكوومی ڤە،ژبۆ هاریكاریكرنا كچ و ژنێن رزگاربووی یێن ئێزدی ل ناڤ كەمپان دە،هەڤدەم ئەڤ هاریكاریێن دئێنە پێشكێشكرن نە ل ئاستێ پێتڤی دانە،خواست ژی حكوومەتا هەرێمێ ئەو گرتیێن ددەستێ داعشێ دا ماین رزگاربكت.
سوزان سەفەر،بۆ دەنگێ لالش خویاكر:”كچ و ژنێن رزگاربووی پشتی دئێنە رزگار كرن گەلەك كەس ژ مالباتا وێ ووندا بووینە ، پتریا وان هاتینە كوشتین و لێ وی دەمێ دئێت دناڤ كەمپێ دە دژیت و ژیانەكا سەخت و دژوار دژیت،لەورا ئەو پێتڤی قەرەبوكرنێ نە ژ ژئالیێ دەرونی و جەستەی و مەعنوی و مادی ڤە ،هەردیسان پێتڤیە دەلیڤێن كاری بۆ رزگاربوویان بێنە ڤەكرن،هەتا كو ژ سروشتێ ناڤ كەمپێ دوور بكەڤن،گۆتژی هاریكاریێن ل ناڤ كەمپا دئێنە پێشكێشكرن نەل ئاستێ پێتڤینە،چنكو هەر رێكخراوەكێ پرۆژەیەك هەیە بۆ ماوەیەكێ دەست نیشانكری و دگەل داوی هاتنا پرۆژەی چوو دیڤچوون ل سەر وان ژنێن رزگار كری نائێتە كرن،ئاشكەراكر ژی حكوومەتا هەرێمێ ئۆفیسەكا تایبەت بۆ رزگار كرنا گرتییان ڤەكریە،لێ هیڤیا مە ژ حكوومەتێ ئەوە ئەوا هەول و پلانێن زێدەتر هەبن بۆ رزگاركرنا وان گرتیێن ددەستێ داعشێ دا ماین”.
سەفەر ئەو چەندە ژی دیاركر:”جڤاكێ ئێزدی ب چاڤەكێ مەزن و دلۆڤانیاكا بەرفرە بەرێ خۆ ددەنە كچێن رزگاربووی ،هەر كچەك دەمێ رزگاربت كۆمەلگەها ئێزدی و كەس و كارێن وان ب شێوەیەكێ كەیف خۆشی ل پەرستگەها پیرۆزا لالشێ پێشوازیێ لێ دكن” .
تُتاح هذه الصورة أيضا في: کوردی