قاسم شەشۆ: هەبوونا پەکەکێ ل شنگالێ مەترسی ل دەستێوەردانا تورکیا ل دەڤەرێ دروست دکەت
ئێن ئارتى
قاسم شەشۆ فەرماندێ هێزێن پێشمەرگە ل شنگالێ راگەهاند، مانا هێزێن پەکەکێ ل شنگالێ مەترسیێ ل دەڤەرێ دروست دکەت. هەڤدەم پەکەکە راگەهاندیە، هێزێن وان ژبۆ پاراستنا خەلکی ل دەڤەرێ ماینە.
قاسم شەشۆ د هەڤدیتنەکێ دا دگەل ماڵپەرێ ئەلسومەریە نیوز راگەهاند” هێزێن پارتا کرێکارێن کوردستانێ ( پەکەکێ) رۆلەکێ نەرینی ل چیایێ شنگالێ هەنە کو چێدبیت مەترسیێ بۆ دەڤەرێ دروست بکەت و شنگاڵ بکەتە گۆرەبانا شەری و مەترسیا دەستێوەردانا تورکیا ژی هەیە”.
شەشۆ داخاز ژ هەڤپەیمانیێن نیڤدەولەتی و حکومەتا عێراقێ و حکومەتا هەرێمێ ژی کر فشارێ بێخە سەر پەکەکێ هەیاکو دەڤەرێ جول بکەن و بکارن ئیمناهیا دەڤەرێ بپارێزن.
شەشۆ گوت”پرانیا ئێزدیان داخازێ دکەن پەکەکێ چیایێ شنگالێ جول بکەن”.
گوت ژی” پەکەکێ ب دەهان زارۆکێن ئێزدی بریە ناڤا رێزێن خۆ کو ئەڤە ژی بن پێکرنا یاسایێ نیڤدەولەتی و مرۆڤی یە”.
ئەڤ داخویانیا شەشۆ د دەمەکی دایە دۆهی د داخویانیەکێ دا ژبۆ ئێن ئاڕ تی ، قایماقامێ شنگالێ جارەکا دی پەکەکێ ب وێ ئێکێ تۆمەتبار کر کو رێگرە ل هەمبەری ڤەگەریانا ئاوارەیان ژبۆ شنگالێ و گوت ”قەبیل ناکەین شنگال ببیتە جهەکێ سەربازی”.
د هەمبەردا پەکەکە ئەڤان تۆمەتان رەت دکەت و دەربارێ ڤێ ئێکێ خدر سالح سەرۆکێ جڤاتا ئاڤاکرنا شنگالێ سەر ب پەکەکێ ژبۆ ئێن ئاڕ تی راگەهاند، ژبۆ پاراستنا خەلكی ل شنگالێ نە. و ئەو کەس و ئالیێن داخازا ڤەکشانا هزێن پەکەکێ دکەن نوێنەراتیا هەموو خەلکێ شنگالێ ناکەن.
گوت ژی، هێزێن پەكەكێ زێدەتر ژ ٥٠٠ شەهید داینە بۆ شەنگال و ئامادەیە بپارێزیت.
قەزایا شنگال سەر ب پارێزگەها نەینەوا و ١٤٠ کیلۆمەتران ژ ناڤەندا باژێرێ موسلێ دویرە.
چەکدارێن داعشێ ل رۆژا ٣ێ ئابا ٢٠١٤ێ هێرش کرنە سەر شنگالێ و کۆنترولکرن.
د هێرشا چەکدارێن داعش بۆ سەر شنگالێ زێدەتر ژ ٥ هەزار وەلاتیێن ئێزدی هاتن کوشتن و زێدەتر ژ ٥ هەزار وەلاتیێن ئێزدی ژی هاتنە رەڤاندن کو پرانیا وان ژن و زارۆک بوون و زێدەتر ژ ٤٠٠ هزار ئێزدی ژی ئاوارەبوون.
رێکەتی ١٣ێ تشرینا دووەما ٢٠١٥ێ ژی هێزێن پیشمەرگە و یەپەگێ و یەپەژێ و ب پشتەڤانیا فرۆکێن هەڤپەیامانان باژێرێ شنگالێ ژدەستێ چەکدارێن داعشێ کۆنترولکرن.
تُتاح هذه الصورة أيضا في: کوردی